♥ REVUE N°1 ♥ : Essayage Produit Oriflamme

سلام  فتيآت جيتكم اليوم sujet جديد هآذ المرة رآح نهدروآ على Les produits oriflammes ... عن تجربة خآصة نقولكم عندي عآمين و أنا نشري من هآذ la marque و كلّ ما نشري حآحة جديدة من عندهم جامي نندم عليها خاطر Super و الله ههه و ما رنيش نخدم عندهم تقولو تشكرهم باش تبيع هه لا لا جيت اليوم ننصحكم بيهم ... آلــوغ نبدآو .

حاجة الاولى لي جربتها و vraiment عجبتني : crème bb : شريتهآ 730 دج شوفو غير تحطيها على وجهك رايحة فم فم شوفي النتيجة و الفرق ... فم فم رآح يبان l'effet تاعها فيك ... تبيضلك وجهك يعني ماشي حتى تولي تباني خرجتي من ساشي فرينة ههه لا لا وجهك هو هو برك مشرق ماشي مغموم ... كي جربوها دسرو نص وجهكم و نص الاخر خليه عادي و ديري الفرق بروحك ... و حاجة وحد اخرى عجبتني فيها هو انو البشرة ديالك تشربها يعني ما تبقاش تزلق فوق وجهك ... كاين بزاف ما يحبوش les crème على جال هاذي و انا وحدة منهم .( page 44-45) 

crème BB

الاستعمالات دياولها :

1- كريم نهاري crème du jour
2- كريم ليلي crème de nuit
3- كريم الاساس fond de tein
4- تحميك من اشعة شمس و الله انا عندي مشكل كي نروح للبحر ولا نخرج في الشمس يخرجولي لي تاش في وجهي ضرك تهنيت منهم عاونتني بزاف .

حاجة ثانية Mascara : القديمة كانت bleu nuit و ضرك خضرة ههه ما تخافوش هي الداخل كحلة ... الاولى كانت تسيح شوية ماء ولا تدمع عينك تمسها تحول ههه بصّح هاذ الجديدة عجبتني بزاف خاطر عدلوها و ولات ما طيح ما والو تشدلك 24ساعة . ادير 630دج نهار كامل و شفارتيك يوقفوا bien (page44-45 

حاجة الثالثة صابون essentielle :  حاجة تبهر l'effet تاعو super و الله العظيم جربوه اذا ما عجبكمش انا نردلكم دراهمكم ... نستعملو مع الصبح كل صباح نغسل بيه وجهي ... شوفو يبياض وجهكم يتنحاو لي تاش اذا كان عندكم ... ينحي الحب ... ينقيلك وجهك يولي مشرق بزآف حتى راح ما تعقلوش روحكم ... كان عندي لي تاش في كتافي من الحب كان عندي كنت نخبشو dégueulasse و تعرفو الاسطورة تاع ما تخبشيش خاطر يبقاولك لي تاش الوغ صح بقاولي حتى وليت مانقدرش نلبس العريان ... غسلت بيه كنت نديرو غير على كتافي خطرة في الاسبوع .... والله راحولي كامل ولاو يديا صافيييين ... غسلت ثاني ب dermoviva الاخضر ثان ( page 18-19) 

حاجة الرابعة blush giordani : الحماير هايل يجي حبات حبات و بزاف شباب كي ديريه في وجهك ... ههه والله تولي حميمرة زين في خدودك ... انا نحب هاذ الشيء نحس روحي بو حناك ... ههههه خللص بزاف مكانش واش نشكر فيه كتر حلو و cute و شباب بصح يدير1000 وشوية نسيت عندي عام ملي شريتو بواطة كبيرة و يشد ...( page - 34-35) 

حاجة خامسة rouge a levre ONE : ما فيهش الاوان بزاف ... يجي rouge a levre و من داخل في ثقبة تخرج brillant levre ... يشد في الفم و الاوان شابين ثان و يبهيلك وجهك ... وأهم حاجة يشدلك بزاف والله هايل .( page 38-39) 

حاجة السابعة crème Universelle tendre Care : هآذي بوآطة صغيرة تقدري تديها معاك وين تحبي في الصاك ديآلك مخدومة بالعسل هاذي اول حاجة و نصكم يعرف بلي العسل هايل للبشرة ... بلا ما نطوّل تستعمل في الوجه في اليدين في الشوارب كيما حبيتوا ( page 24-25) 

حآجة الثامنة Crème VeryMe : آولا هي كريم للبشرة كريم الاساس للبشرة ... ههه ما نقدرش نعبرلكم على الاحساس لي تحسوه بعد ما تستعملوه ... يردلكم البشرة ناعمة و هآيلة ... خآصة بعد l’épilation يديكم و رجليكم ... و تندار في الوجه ... و تقدرو تستعملوه كريم تاع الشمس و الله النتيجة تاعو هايلة و ينحي البقع المهم هايل و يجي tube كبير و برآئحة المشماش .( page 46-47)

التاسعة و هي  Talc : الي رآه عندي عندو مدّة ملّي شريتو بصّح زآدو دآرو جدد Parfumé وآحد رآئحة الورد و وآحد بعطر الطبيعة كيما قلو هوما هههههه المهم يندار تحت الإبط تعرفي بصّح بدون رآئحة يعني يبقآي ريحتك الله الله و يدوم 24 ساعة   ( page -74-75) 

الحاجة الأخيرة و هي Very Me Eye Envy :   و هو Ombre a Paupière يجي صغييييور انا كي نروح للعرآس نديرو في la pochette صغيرة ... الالوآن هآيلة كاين بزاف الوان كل وحدة واش فيها ... مقاوم للعرق يعني ما يهبط ما والو يشد بلاصتو حتى تنحيه أنتي   

الملاحاظات : 

1- هاذ المواد غاليين شوية بصّح عندهم نتيجة فعالة و هايلة و جآمي تندمي عليهم ... و غاليين خآطر يشدوا 12 شهر يعني عآم ... يعني مدّة طويلة و انت تستعملي فيهم و ما يخلاصوش ... انا كنت نستعمل انا و ماما ... و مازالولي ... 

2- كي تروحي تشري كريم للبشرة أرجوك الله يحفضك شوفي قبل و لا لجميع البشرة ولا كل وحدة البشرة لي تناسبك ماشي عندك بشرة زيتية تروحي تشري تاع بشرة جافة ههههه ماشي كيف كيف إنتبهي 

3- رآيحيين نديروا موضوع واحدآخر خاطر درت كومند جديدة 

وصلنا للنهآية نشآء الله يكون فآدكم الموضوع الله شاهد بلّي قتلكم كامل المنتوجات لي ستعملتها و كامل خرجو عليّآ لي جربت من قبل هاذ الماركة تقولي واش ستعملت في كومنتآر ♥ لي حآبة شوف El catalogue تضغط هنا ♥ و راني حطيت كامل لي بآج تاع المنتوجات لي شريتهم ♥ 

الى موضوع قادم انشاء الله  ♥ 

Abonnez vous