♥ CONSEILS BEAUTÉ N°1 ♥ : 10 Conseils Beauté Pour les Filles :* !

سلام الحبوبات تاوعي ... توحشتكم ... البارح شفتكم يوم توحشتكم واش ندير انا جاية هكذا ... الموضوع تاعنا اليوم ... شوية هدرة ... مدموزال ... تحب تهدر بزاف هههه كيما كامل يعرفوني ....

 يعني راح نحكوا في موضوع .. نعطيكم نصائح عامة ♥ ... اليوم راح تهدروا في مواضيع مختلفة ... بصح في اطار التجميل منبعدوش بزاف بزاف ... الوغ نبداو ...

النصيحة #1 : الماكياج .. 

الماكياج ... ما تكثريش ... والله ما تكثريش اكتفي ب écran Total ... يحميك من الشمس ماسكارا شوية كحل ... اذا حبيتي و بزاف ... ماشي مليح ليك و الله ... اتخيلي معايا ... وحدة تحط كل يوم ماكياج في وجها ... يعني تحط Fond de Teint , mascara , eyliner, blush , farapopier , rouge a levre ... يعني حمر حماير في السماء يطاير ... وحدة تحط لكل يوم هكذا ... نهار تخرج للاعراس دير ماكياج مايبانش فيها بلي تبدلت ولى زيانت ولى ... تبقى هي هي شغل ما خرجتش كامل للعرس شغل راهي عادي كيما تروح تقرى ... حتى اذا ثقلت الماكياج مايبانش عليها الجديد ... حتى نهار عرسها ما تتبدلش عادي هي هي .. بصح وحدة ما تحطش كامل ولى ما تحطش كامل ... نهار تروح للعراس و المناسبات تحط ماكياج... راح تبان حاجة زيادة فيها ... تبان تبدلت ... تبان بلي دارت حاجة في وجها ... تبان رايحة عرس ... بصح وحدة دائما تحط و بزاف ... تروح للعرس شغل ما دارت والوا ... الناس تعرفها كي دير ماكياج ... بصح وحدة ما ديرش راح ينتبهولها كثر ♥
ثاني حاجة ما اجي توصلي 40 سنة تلقاي روحك ايه ايه وجهك تعمر حفاري و ثقب ... و تجاعيد البشرة تاعك راح تولي ناشفة ... و باهتة تفسد ....
الوغ نصيحتي ما تكثريش مضر ليك و لوجهك قبل حاجة اخرى ... والله كل بنت شابة ماكانش بنت مزعوقة ولا شينة ... كل وحدة هايلة ... البشاعة ماشي للبنات ... كل وحدة وزينهاو كل وحدة وسر تاعها كيما يقولو بالفرونسي chaque une sont charme ... علاش نشوفو وحدة مزعزقة زوجت بوحد شباب ... خاطر هو شافها شابة و حبها كيما راهي لا ماكياج لا زوج ... الوغ حبي نفسك و اقتنعي بيها .. و ارموا على نفسكم هاذ الافكار العيانة الفشلانة ... زعمى نهار تنحيلوا المكياج و هو عمروا ما شافك بلى بيه ما ينخلعش مسكين ...
قتلكم ماكانش بنت مزعوقة ولى شينة كل وحدة و زينها ... و كل وحدة و السر تاعها ...
(سمحولي بلاك قسيت عليكم بصح لازم نهدر وجهة النظر تاعي لي كونطر لكي حرية اكتبي واش تخبي في كومنتار ) ...



النصيحة #2 : الطول المناسب للظفارك. 

يعني متوسط الحجم ... ماشي طوال بزاف ... و مشي قصار بزاف لي يحبوا يطولوهم ... ماشي طوليهم 5سم ههه لا لا حنونتي ... خطر عليك هاذااول شيء ... و خطر على لي قدامك ... ايماجيني ظفارك طوال بزاف ... و ترفدي يدك جيبيها ف لي قدامك ... تخبشيها ... برك ما نروحوش بعيد ... قادرة و نتي راقدة تخبشي روحك .... تعمي روحك ... ههه ما تقولوليش جامي صراتلكم ... تصرى بزاف هاذي ردوا بالكم ...



النصيحة #3 : les talons . 

تجنبيه ... تاخذي راي تاعي تجنبيه كي تروحي تقراي .... خاصة لي ما تعرفش تمشي بيه ... راكي تعذبي في روحك على واش ... على والوا ... ما تقدريش تمشي ... اصلا صاكك ثقيل ... راح تتعذبي ... بلاك تلقاي هبطة ولى طلعة تحصلي ... كي تروحي تقراي حاولي ... تكوني في ملابس و احذية مريحة جدا .... هكذا باش تكوني في راحة تامة ... و كلية ... الوغ اذا طالون صعيب عليك تجنييه. ..
ثاني حاجة اذا حبيتي تلبسي الطالون البسي ... تاع كل يوم ماشي تاع اللعراس ... هكذا ما توليش دمية ...




النصيحة #4 : العلك ( اللبان ) chwingum : 

كليه اختي كليه ... نورمال ماكانش لي يحاسبك... بصح ما ديريش نبولة و طرطقيها ... بصوت عالي الناس كامل يسمعوك شيء ماشي تاع انوثة ... راح يشوه صورتك مهمى كنتي جميلة ... تجنبي ردي بالك ... كاين ساعات تزلق حاولي ما ديريش الحس ♥



االنصيحة #5 : باش ما يتخبلش شعرك في الليل . 

كاين بزاف يرقدوا بشعرهم متلوق ... متعلبالهمش بلي هاذا مضر لشعرك ... راح يتعقد ... و يتخبل و من ثم يتقصف و يتكسر ... الوف ننصحك اديريلوا tourbillon في الليل . يعني تليميه كامل بالمساسك ... ولى ديري القردون و هاذا افضل حل ... ماشي عيب كاين يحشموا بيه ياك راكي وحدك بينك و بين روحك هههن والله افضل حل طبيعي للشعر ... شعرك يصبح هايل تقول بتي تليسي فيه. ... زيد على عاذا يطول شعرك ... اذا كنتي عيانة كانل احكميه بالشوشو ... المفيد في الامر ... ما تخليهش متلوق ... ختطر يتخربش ...


النصيحة #6 : اغسلي وجهك بالماء و الصابون باش تنحي الماكياج . 

تنظفي وجهك قبل ما ترقدي من الماكياج شيء مهم جدا جدا ... لازم اديريها ... و ثان اغسليه بالماء ... خاطر les lingettes مضرين للبشرة تاعك ... والله تجنبي هاذ الامر دايما نحي بيهم خطرة على خطرة ... ماشي دائما ... خاطر ماشي مليحة ... اغسلي وجهك بالماء و الصابون و نحي واش عندك ... و لازم تنحيه و ما ترقديش بيه ... خاطر يسبب الحب و الرؤوس السوداء

 

النصيحة #7 : امشطي شعرك كل يوم . 

لازم تمشطي شعرك كل يوم ..يعني كل صباح و كل عشية

قبل ما ترقدي ... هكذا راح تتجنبي تساقط الشعر ... لازم تمشطيه كل يوم ... خاطر

هذا مفيد للشعرك ...

النصيحة #8 : تجنبي الهالات السوداء . 

يعني تجنبي les cerne ... كيفاش؟ ... ساهلة الرقاد بكري ... ما تعييش نفسك بزاف. ... نقصي التخمام ... و اهم شيء اغسلي وجهك من الماكياج خاطر يسببلك الهالات السوداء. 

النصيحة #9 : الحصول على بشرة ناعمة و رطبة . 

لازم تشري les gels douche لي يتاولموا مع البشرة تاعك ... واذا انت من النوع لي عندهم بشرة حرشة ...لازم تواضبي على ان ترطبيها دائما بالكريمات ... هكذا راح تولي عندك بشرة ناعمة .... ايضا الغسل بالماء البارد راح يساعدك على شد البشرة . 

النصيحة #10 : المحافظة على وجهك . 

تجنبي النوم بالماكياج ... خاطر مضر ... تجنبي المسح

الماكياج ب les lingetttes ... مضر ايضا ... تجنبي الغسل بالماء الساخن ... هكذا تحتفظي على وجهك ... و زيد على هاذا كي تشري مواد تجميلية لازم تراعي نوع البشرة ديالك .... هكذا تحافضي على الوجه تاعك ... ايضا تجنبي تخبشي حب الشباب ... و تخربي فيه . 

لحقنا لنهاية موضوع اليوم ... نصائح 10 انشاء الله

تفيدكم ... راني هدرت على كلش بصفة عامة و بسيطة ... جدا ... انشاء الله يكونو

فادكم ... ما تنساوش تطرحوا الاسئلة تاعكم في البواطة لي عبى اليمين ... ولى

ادخلوا لا باج تاعنا ... و اطرحوا سؤالكم ... ما تنساوش تحطوا كومنتار في لا باح و هنا باش تشجعوا الاخرين يقراو الموضوع ... نحبكم الشابات و نتلقاو في موضوع جديد

  

.