سلام البنات
توحشتكم علبالي حتى نتوما توحشتوني ... نعم اليوم موضوع خفيف ضريف عليا و عليكم
... ناقشوا واحد الحاجات مع البنات ... على الحب على كلش الي يخص الحب كاين بنات
لازملهم واحد يضربهم بكف باش يفطنوا ... نعم الموضوع تاعنا اليوم BLA BLA ... عندي مدة درتلكم موضوع نهدروا
فيه هكذا و حتى اليوم باش جاتني القوة نكتبوا ... الوغ اسمعوني مليح الييوم و
استفادوا مليح مليح ...
اول حاجة هي
الثقة :
مدام هو ماراهش
راجلك و عاقد عليك و داك لداروا ... الثقة عمرها ما تكون مئة بالمئة ... خذي نصيحة
مني شحال من وحدة حشاوهالها ( عذرا على التعبير بصح باش تفهموا ) ... كاين حتى و
هو خطيبها حشاهالها و راح و خلاها والله على عيني جازت ... لي داولها دراهم ولي
دالها الشرف ( عذرا مي لازم تكونوا فايقين و شاطرين) ... المهم قلنا عمرك ما ديري
فيه ثقة عمية حتى تولي جايحة و الماء يجري من تحتك ... خليه بلي تثيقي فيه لدرجة
انوا ما تشكيش ... بصح انتي خلي يالوكان واحد بالمئة ... هذاك يكفيك تفيقي بيه و
ما يجيش يكلخلك و يروح ... ولا تفطني تلقاياه خادعك و تبداي تبكي و و و و ...
تصرعي راس صاحبتك ... كاين بنات لي يقولوا " حنوني والله ما يشوف في
البنات" ولا " انا حنوني يحبني و يموت عليا و جامي يشوف في غيري "
... يا عمري يحبك ما اختلفناش فيها ماعليش بصح ما يشوف في غيرك لا ياحليش ...
البنات راهم في الجامعات في الزنقة في الخدمة ياك رانا قريب نخدموا نجار ههه رانا
في كامل الميادين ... و هوما بالطبيعة تاعهم يشوف يشوف في اخرى كي تكون شابة و حطة
و كامل ... اصلا انتي يجوز عليك واحد زل و شباب شوفي فيه و تقولي يا عمري ... ماشي
باش كاش ما حبيتي مي هذي هي الطبيعة الانسانية ... كاين الي بالاك تغرّوا روحو و
يروح يهدر معاها ... و كاين شي رجال يكتفي بالنظر و كاين لي ما يقدرش ما يقربش
هههه النيمروا الخ ( ما رانيش نوسوس فيك اوكي ههه ماكلاه تروحي تداربي معاه كاين
لي نورمال ... الو غرانا نقولو الثقة العمية و هو مازال ماشي راجلك ماشي مليحة
بزاف .... راح تندمي عليها و قادرين كاين بزاف لي جربوها ضرك يقولولك عندها الحق
... حبي و اعشقي و اتمناي و كلش ... اعرفي كيفاش تحطي رجلك و وين تحطيها ... اصلا
كي نهار قررنا نمشيو في هاذ الطريق علبانا حرام ... مي ماتزيديش طيحي في الحرام
كتر و كتر ... يعني علبابك وا ش راني قاصدة ...
مهما بلغت ثقتك
في الشخص لي راكي معاه و تحبيه و مهما طولت معاه في العلاقة يعني بالعوام و العوام
انشاء الله دربتوا 10 سنين ما ديريش فيه ثقة 100 بال 100 هاذي نصيحة خذيها بعين
الاعتبار خاطر الشاب ماشي كيما البنت هاذي اول حاجة و ثاني حاجة الولد الغريزة
تاعوا عاملة هكذا يعني يضعف قدام ... المهم انت خذي حذرك دائما ما ديريش فيه
كونفيونص كامل هكذا تاع اديري معاه العجب ولا تمديلو تصاورك ولا اي حاجة خاطر في
الاخير راح ادور عليك كوني قوية لازم ( سامحوني بلاك كاين منكم يعتبروها وقاحة و
قلة ادب بصح صح كاين بزاف بنات بنيتهم و هو مهما بلغ درجو الحب ديالو ليها يقولها
انتي درتي معايا هكذا و هكذا مانقدرش نديك لداري حتى و يكون داير فيها الثقة
العمية و حاشا لي ما يستهلوش و كاين بزاف لي يدروا teste للبنت و يشوفا اذا تقبل و لا لالا و راكو تعرفوا
الباقي . ) المهم ما ديريش ثقة عمية حتى نهار تفطني تلقاي الماء يمشي تحتك و انت
لا خبر يعني قالك الوقاية خير من العلاج ....
المهم ماشي ديري ثقة فيه 100 بال 100 و تنعماي
على كلش عليه منبعـــد دوري تنوحي ...
ثاني حاجة
الرجال نصهم ولا اغلبيتهم اذكياء :
كيما هدرنا في
الاول على الثثقة ... يعني انتي من باب الحب و الثقة اديري فيه كونفيونص ...
علبالي ل درجة انوا لما يقلّك ارواحي للدار تروحي ... لما يطلب منك حاجات خاطيين
تقبلي ... ما رانيش نحكم عليهم ... خاطر انا ماشي خدمتي هاذي ما تفهمونيش غالط ...
البنات ماشي كامل لي داروها محسوب (...) ... المهم كي يطلب منك هاذ الشيئ راه
يديرلك تجربة ... راه يجرب فيك ... في فمك غي لا لا غير يطلب منك حاجة خاطية قولي
لا لا فورا ... خاطر كامل هكذا دارلهم تجربة في الاخير قالها انتي درتي و درتي
الوغ ما نجيبكش لداري ... كاين والله ما دارت والوا و قالوهالها ... الرجال ما
فيهمش لامان والله ... و اذا قلتيلوا لا لا و قالك ما لا نحبسوا ... هنا تفيقي بلي
هاذ السيد نيتوا خاسرة الوغ خليه يروح يتلف.
ثالث حاجة غيرتك
زايدة عليه و تحاولي تحكمي فيه :
اختي واسوموا
هاذا ؟ ... راجل عاودي انشوف ؟ ... ههه كيفاش حبيتي تحاولي تحكمي فيه مثلا وين راك
؟ ادخل ضرك ... ولا تهدري معاه بالخشانة و تباني واعرة ... تكرهيلوا حياتوا يلقى
وحدة تهتم بيه و ما ضلش تعيط عليه و تحكم فيه ... يخليك في اول فيراج ... الغيرة
ثاني كي تكتري منها تقتل الحب ... غيري ماشي ما تغريش ... بصح ماشي لدرجة انوا
تروحي عند البنت لي كان يهدر معاها تضربيها ولا تقوليلها بعدي عليه ... السيد هاذا
عزيزتي الحنونة راح يحس بلي راكي خانقاتوا ... يكره منك والله راح يتبدل عليك ...
كاين بزاف بنات هكذا والله كرهوا منهم ...
رابع حاجة
الراجل كي طفل الصغير :
الشـــآب كي الولد الصغيـــر يحب لي تهتم فيه تحوس عليه
تخاف عليه تبكي عليه كي تخاف عليه ... يحب الــي تهتم فيه رآح يحس بالراحة معاك
... الراحة المطلقـــة ... الي تصبرلو كي يكون فيه طباع عيــــآنة يعني عصبي ...
يتكيف ... منارفي مقلق ... يسب ... غيور ... و الله يااختي ما كاين راجل يجي هكذا
من عند ربي مافيهش هاذوا ... المرأة هي الي تعجنوا و تخبزوا كيما حبـــت هي ...
بالصبر بصح ماشي بالعيــــآط ... يعني حوسي عليه خافي عليه حبيـــــه قد ما تقدري
... نهـــآر يغلط معـــآك شنفي عليه ... ايه هاذي جيب نتيجة ... مور ما يهدر
معـــآك قوليلو رضيت خاطر مكانش لي تصبرلك كيفي ... اذا لقيت روح عندها ... سامحيه
حبيه ... والله يطيح فيك على الاخر يولي انتي ولا مكانش ... ماشي جيحي روحك بصح
حنا قالوا علينا كيدنا عظيم استعمليه ... كي تحبي خدمي عقلك ماشي قلبك برك ...
مكانش راجل مثالي ... انتي تعاونيه يولي كيما تحبي انتي و راح يبوسلك راسك منبعد
...
خامس حاجة و الاخيرة
ابقاي واعية :
مليحة ليك والله ... تحكمي عقلك مع مشاعرك و قلبك ... ما
تخليهش يطلعلك فوق راصك و يحكم فيك في وقت هو لي داير رايوا و واش يحلالو منبعد
يقولك خاطر انا راجل ... انتي ثاني مراة ... يشوفك ساكتتلوا بزاف راح ياكلك راصك و
جامي يتعدل و يولي ل طريق ... راح يبقى ب طباعوا الفوق قتلك اصبريلوا ... بصح يغلط
في حقك اهدري على حقك ماشي تسكتي كي الجايحة عليه ... هكذا راح يقولك هاذ البنت
نورمال ندير واش ندييرلها تبقى معايا و تحبني و جامي تخليني ... يعزيه في راصوا
... بيني شخصيتك و كوني قوية ... ما تخليهش يكتر عليك لازم تهدري على حقك كي يغلط
معاك ...
هاذا واش نقدر
نقول اليوم في هاذ الموضوع بالاك اليوم اعتبرتوني قاسية ولا قليلة الادب ولا غالطة
في واش قلت ... انا قلت واش نعرف واش شفت في صحباتي و فيا ... انا حبيت مرة في حياتي ... و خدعوني 2 مرات
... لي حابة تسمع حكايتي ... كاش نهار نحكيها ههه ... و انا عندي بزاف لي قراو
معايا الاولاد و كانوا يحكولي و واش يخموا ... علبالي ... انشاء الله ما تزعفوش
مني خاطر هدرت في موضوع حساس كسما هاذا ... الوغ الله ينجعل كل وحدة ضريتها تسمحلي
ماشي قصدي انا حبيت برك نشجعك باش تكوني قوية ... باش تكوني شادة روحك هذا ماكان
... كاين بزاف بنات صعيب يقتنعوا ... هه انا لبيت طلبكم على موضوع الحب ... حبيت
ندير نصائح للبنات باش يكونوا شاطرين ... هذا مكان ... ماشي قصدي نقلل الادب تاعي ولى
بصح الهدف تاعي توضيح بعض الامور ... اذا عجبكم الموضوع حطوا جام و كومنتار ...
اذا ما عجبكمش موضوع كيما هاذا ما يتعاودش انشاء الله ... لي عندها بروبلام ولا
حابة تحكيلي تدخل هنا ... و انشاء الله نقدر نساعد كل وحدة .... نتلقوا في الخير و
في موضوع جديد اتهلاو في روحكم ... و انشاء الله كل وحدة تدي لي حبوا قلبها ....
ســــــــــــــــــــــــــلام
-------------------------------------------------------------------------------------
المزيد من المعلومـــــآت :
.
Commentaires
Enregistrer un commentaire
Commentaires