♥ GRWM N°1 ♥ : Comment Je Me prépare Tout les Matin !

ســــلام البنات مدموزال مهبولة تحييكم اينما كنتم ... و تقولكم تحبكم يا البنات تاع 48 ولاية بدون استثناء ... شكرا على تشجيعكم ليا و شكرا على لي ميساج الحلوين تاعكم ... هه كيما راكوا شوفو راه جاكم ال blog   بحلة جديدة و بزاف حاجات المهم الشرح راهو هنا... كاين لي راهم شافوه ... الموضوع تاعنا اليوم هو ... كيفاش نوجد روحي صباح قبل ما نروح للمزيرية تاع لا فاك ... مع العلم انا وحدة فنيـــــــــــــآنة الى درجة كبيرة ... ههه الوغ شحال من وحدة طلباتو اليوم راني درتوا ... الوغ نبداو على بركة الله ...

في الليل قبل ما نرقد راني ن réglé   ال réveille واح ال 70 مرة هههه قتلكم فنيانة ... كيما زعمى نوض ال 8س30 تاع الصباح ... هه انا نريقليه ... 8:15 , 8:25 , 8:30 , 8:35  هكذا و دايراتو Vibreur  يعني ... يضل يصوني عند راصي ... و انا في نفس الوقت راني  نوض غير بلعقل بشوية ... هكذا نقدر نفطن في الوقت ... الوغ ننصحك ترقلي رفاي تاعك عشر دقايق قبل الموعد لي موالفة تنوضي فيه راح تنوضي في الوقت انشاء الله هههه يا الفنيانة .

الوغ بعد ما نوض صباح و انا مصروعة بيان سوغ ههه  ندخل للمرحاض (حشاكم) منبعد نغسل وجهي بالماء لا صابون لا زوج ما نكذبش ههه خاطر نعجز  ... ايه حنونة ماشي محسوب تفنين تروحي تغسلي وجهك بالماء السخون اولا يفسدلك وجهك و ثانيا عمرك ما تفطني ... الوغ الماء البارد هو لي يساعدني نفطن مع الصباح ...

منبعد ما نفطن و كامل نشوف شحال راهي ساعة نلقاها 8:40 ... ههه نشعل Lisseur  نخليه يسخن مابيد نلبس حوايجي ... الليسور تاعي يسخن بلخف بصح انا باش ما نضلش نستنى ... نكمل نلبس في خمس دقائق لازم ولا عشرة ههه بسرعة ...

مور ما نكمل نلبس نحل شعري نمشطو و بالطبع نليسيــــه مليح مليح  ... خاطر اصعب مهمة هنا هي شعري باش نمشطوا و يحكم روحوا ساعات نمشطوا 10 خطرات ... يروحلي كامل الوقت و ما ندير والوا في وجهي ...   مشكلة ههه ... كيما قلت نليسيه شوية شوية ... انا ندير القردون في الليل ... الوغ شعري ما يتخبلي بزاف يصبح شباب شوية ... و منبعد نمشطوا ...

كي نكمل من شعري ننتقل الى وجهي البشع هههه ... ما نحطش ماكياج انا لييكن في علم الجميع ... لا Contouring  لا والوا ... لا فوق عيني لا والا ... نحط ساعات ma Bb Crème ... ولا Ma Crème Essentiel  تحميني من الشمس ... خاطر البشرة تاعي لا تضررت يولي وجهي منمش ... نحطها في كامل وجهي ... منبعد نجبد رموشي بهذيك الحاجة لي تجبد الرموش نسيت اسمها ههه سمحولي ... منبعد نحط الماسكارا تاعي ... و هاذا ماكان

ساعات نحط شوية تاع Les Accessoires   كيما سنلة ولا خاتم ولا و ساعات لا لا ما نحط والوا ... انا من النوع لي نشريهم بصح ما نحطهمش بزاف بزاف هههه ...

الوغ منبعد ما نكمل هاذوا كامل نرفد صاكي و Ma veste   و نروح نلبس صباطي عند البـــآب ههه خاطر تبدى تعيط ماما .... ههه راكوا كامل تعرفوا الحكاية ....

بعد ما نلبس صباطي ... نشرب قهوتي في غرضي ... خاطر هي الحاجة الاهم في نهاري لي راح نجوزوا بعيــــــــــد هه حتى العشية ....

بعد ما نكمل قهوتي نلبس ال la veste  ... نزيد نعدل روحي في المراية ... و نخرج من الدار ...

الوغ هاذي هي كيفاش نوجد روحي مع الصباح ... كيفاش نلبس كيفاش نضم وقتي ... هاذوا كامل و الله نديرهم في نص ساعة برك ... ب الجرى نعم جميلاتي ... قتلكم في الاول انا فنيانة ... و ساعات كي ما يكفينيش الوقت ... ما نحط والوافي وجهي نخرج هكذاك ...

ههه انشاء الله يكون فادكم موضوع اليوم و راكوا عرفتوا معلومات جديدة على الفنيانة تاعكم ههههه ...لي عندها سؤال تطرحوا في لا باج ... ولى في حسابي الشخصي هنا ...  نتلقاو في موضوع جديد ... انشاء الله ... تلقاو في الخير انشاء الله اتهلاو في رواحكم ... مدموزال مهبولة تحبكم بزاف بزاف ... 

.