♥ PRODUIT TERMINE N°1 ♥ : Je rachète Ou pas ?!

سلام البنات اليوم موضوعنا هو اشياء خلاصتلي نعاود نشريها ولا لالا ... الوغ هاذ منتجات كانوا يعجبوني ♥ ... و حابة نعاود نشريهم ... و كاين لي ما نعاودش نشريهم ... تقدروا تقلرني بيني و بيكم باش شوفو اذا يولموكم و لى لالا على حساب نوع البشرة و الشعر ... ♥ الوغ نبداو ...

اول حاجة

هي mon coups de coeur يعني ههه للافضل تاع الافضل هي كريم baum مرطب للوجه اليدين كلش ... هي صغيييييييرة و محاينها كبار انا نعشقها ... تنحرقي ديريها .... تضربك شميسة ديريها ... تحرق كريم مزيل للشعر ديريها .... حابة ترطبي جيهة في جسمك ديريها سحرية والله عجيبة ... انا نعشقها ... بزاف يعرفوا بلي انا نحب la vaseline بصح كي شريت هاذي ما سحقيتهاش بزاف تخليت عليها فترة ... Alors هاذي Je rachète ... السعر ديالها نضن ما بين 300 da و 350 da .



ثاني حاجة

mascara wonderlash water roof 

ماسكارا و عليها الكلام تشد مدة طويلة يعني جهد نهار لي تخرجي فيه ... تشدلك ما تهبط ما طيح ما يصرالها والوا ... رموشك تكلع و توقف و تثبت يعني كي تمسيها تحسي بيها يابسة و شادة روحها ... انا صراحة حبيتها بزاف بزاف ... الوغ هاذي Je rachète و ننصحكم جربوها ... السعر تاعها هو 840 da غالية بصح تشدلك عام ♥



ثالث حاجة

Cream BB Spf 30 ... 

كريم تخبي الحاحات ماشي شابين في وجهك و تخليك تباني شغل ما درتي والوا في وجهك ... تحميك من الشمس ...فسها خمس استعمالات ... كريم نهاري ليلي مضادة للشمس و مرطبة للبشرة و كريم اساس ... انا حبيتها بزاف خاطر تشؤبها البشرة ديالك بلخف ... انا اصلي ما نحبش هاذ الاشياء يصح جربتها و صبت تشربها البشرة سريعا حبيتها بزاف ... الوغ Je rachète... السعر ديالها 700 da .




رابع حاجة

gèle douche Le Petit Marseillais ...  

ريحتوا شابة و هايلة و عجبني بزاف ... بصح ما عجبنيش ... دارلي الحساسية في جسمي ... الوغ Je rachète pas... السعر تاعوا نسيتوا هههه tellement ,ضرني ههه ... بصح هو مليح . 

خامس حاجة

cream VeryME ...

هايلة بالخوخ مخدومة ريحتها بزاف هايلة ♥ ... مرطبة للجسم فقط ... تخلي بشرتك تبرق ... و حنينة كيما تاع الاطفال الصغار ... هايلة تخلي في جسمك ريحة هايبة دوم... شفتوا هذيك الاشهار تاع انتي بنوتة ها العادة مش موبوطة ليش الشفرة ؟! ... استعملي الشفرة ... و استعملي هاذ المرطب بعدها ... شوفي النعومة على اصولها انا حبيتها يعني ... الوغ Je rachète ... السعر تاعها 500 da . 

سادس حاجة

la vasline original 

مستخلصة من زيت البلوط نضن ... هايلة كنت نغسل مواعن يديا يولوا حرش خاصة في رمضان و بزاف منكم علبالهم بلي نحبها هاذ الموصيبة خاطر ترطب اليدين ... مليح ... كنت نشمخ شوية يدي نشفهم شوية يعني يبقاو منديين و نديرها ... منبعد يلي شوية مزيتة نمسح يدي شوية شوية ... الوغ هكذا يديا يبقاو ناعمين هايلين ... يعني لي حابة ترطب يديها بسعر صغير انا ننصحها بها ... لي عندهم الاكزيما ثان... بصح صراحة Je rachète pas خاطر la vasline بكامل انواعها شابة و هاذي ريحتها شوية ما تبانش بصح كي دققي ماشي شابة ... الوغ حابة نشري وحدة تاع فراولة ولى قارص نحب الريحة تبقى في يدي .... السعر تاعها ما بين 50 da و 150 da ... شريتها من الصيدلية .



سابع حاجة

shampoing Sunsilk 

شريت واحد للشعر الجاف و المتقصف ... درت على la publicité تاعهم و يقولوا شباب و هايل ... ولي جربوه ثاني قالو شباب و ينعم .... انا غسلت بيه تقول غسلت بصابون حجرة ... ولى شعري يابس و حرش مالڨري كان جاف بصح ماشي حرش بيه ولى حرش و يبهدل ... واااااي ما ننساش النتائج تاعوا تبهديلة ... ولى شعري ماشي شعر كي صوف ... Je rachète pas ... السعر تاعوا نسيتوا هههه .



ثامن حاجة

Mask Brésilien Kenachome ... 

الوغ هاذا ،un amour للشعر هايل وخلاص هايب هايل هايل ... كي تحلي البوقال تضربك ريحة هايلة تحبي تاكليه ههه ... زيد خفيف و يردلك شعرك هايل ... كاين لبزاف انواع الشعر .... هايل انا شعري جاف و مبوكلي و كي ينشف يتنفخ شوية خاصة في الصيف و البحر و تلف الشعر لي يجي منبعد ... بصح بهاذ الشيء وليت ما نعانيش منوا شعري هبط ... مهم كي تحطيه تحسي بفرق كبير ماساج للشعر هايل ... ديريه تخليه من 10 الى 20 دقيقة ... منبعد تمشطيه و تغسلي شعرك .... راح يعاون شعرك في السشوار ... هايل ... الوغ je rachète ... السعر تاعوا 140 da .




تاسع حاجة

savon Dermoviva ... 

هدرت عليه منقبل ... وراح نعاود نهدر بشكل سريع ... شريتوا زهر ...يعني قلت نجربوا و نشوف ... تبع الكذاب لباب الدار ههه انا تبعت الاشهار لباب الدار .... شريت واحد تاع الحب و هكذا نسيت واش مكتوب فيه خاطر عندي مدة ملي شريتوا ... انا كان الحب يخرجلي لي في وجهي ما نخبشوش بصح لي في كتافي و اهبط ... نخبش الوغ ولاو عندي البقع تبهديلة كبيرة ... نروح للاعراس ولى ههه يديا كامل ب les tâches ... شريتوا كنت نغسل بيه كل ما ندوش ... نحكم الصابون و نحطوا على البلاصة هذيك و في وجهي نغسل ختى زوج مرات .... آمنوا و لى لالا بصح ... البقع كامل راحولي ما بقى والوا في يدي حتى في وجهي و قل .... وليت نقدر نلبس و كلش تهنيت من البقع هاذوك .... الوغ ننصحكم بيه ... بصح انا je rachète pas ... خاطر صبت واحد عجبني كتر من هاذا مالڨري هاذا سحري ... راح نهدروا عليه في عاشر حاجة .السعر تاعوا ما بين 60 da و 100da.



عاشر حاجة

Savon Essentiel ... 

هدرت عليه ايضا نفس خدمت صابون dermoviva ... بصح شغل هاذا يخدم دوبل عليه يعني الضعف تاعوا على هذيك نفضل هاذا ... زيد هاذا ريحتوا تعجبني ... و يرغون خير ... ماعلبابيش ههه بصح انا نفضل هاذا ... هو يخدم خدمة وحدة كيما الاول .... في زوج عاجبوني بصح هاذا je rachète ... السعر تاعوا 300da .



الحاجة الاحدى عشر

creme Venus ... 

كريم مزيلة للشعر ... مليحة تنحي لمدة طويلة جدا.... لي شريتها انا تاع زيت اللوز ... ما عجبتنيش بزاف تحرق شوية ... لازم على وجه نظيف يعني لازم تكيسي وجهك ... هي افضل ما جربت لحد الان ... بصح je rachète pas هاذ النوع يعني تاع زيت اللوز ... نحوس نوع وحد اخر مليح اذا حبين تنصحوني في كومنتار ... السعر تاعها 100 da .



الحاجة الثاني عشر

Serum Andréa Dotti ... 

سيروم هايل ... ديريه قبل ما ديري سشوار ... يعني على شعر نصف مشمخ (مبلول) ... و ديريه منبعد ما تكملي سشوار ... نضمنلك بلي السشوار يشد في شعرك كثر من المدة لي موالف يشدلك فيها ... يعني ؤائع انا حبيتوا بزاف .... افضل سيروم جربتوا لحد الان. ... الوغ je rachète ... السعر تاعوا 100 da .



الحاجة الثالثة عشر

Talc de oriflamme ... 

هاذا ضرك تقولولي لواش ينفع ... ديريه تحت ابطيك قبل ما تخرجي (حاشاكم) ... ديري كمية منوا مليحة ... راح يمنع روائح العرق مهما تعرقتي طول اليوم ... راح ينفعك تتهناي من الرائحة ... هايل انا عجبني خدمة تاعوا بصح الؤيحة ما عجبتنيش الوغ هاذا كيفكيف ... Je rachète pas ... بصح نشري منوا برائحة اخر ... السعر تاعوا 300 da .




وصلنا لنهاية الموضوع ... راني هدرت على كامل واش خلاصلي و راح نعاود نشريه ... و لي ما نعاودش نشريه ... انشاء الله نكون فدتكم و لقيتوا حاجات كنتوا تحوسوا عليهم ... المهم نتلقاو في موضوع جديد انشاء الله ... لي عندها سؤال تطرحوا في لاباج ولى في كومنتار هنا ... نتلقاو في الخير انشاء الله ♥ :-* اتهلاو في روحكم ♥ بزاف .

-------------------------------------------------------------------------------------
المزيد من المعلومـــــآت :

.