♥ TAG N°3 ♥ : What's On My School Bag ?

ســــلام البنـــــآت ... مدموزال مهبولة تحيـــــيكم وين ما كنـــتوا ... و توقللكم توحشتكم ... شكرا على تفاعلكم معايا ♥ ... الوغ موضوع تاعنا اليوم هو واش كاين في صــــآكي لي ندي فيه كي نروح لا فاك .... كنت منقبل درتلكم في النصائح القصيــــرة شوية تاع افكــــآر ... الوغ اليوم راح تتعرفوا على واش ندي معايا في صـــــآكي ... كاين فيديوا في الانستغرام فيه كامل واش كاين في صــــآكي ... الوغ نبداو

عندي في صــــآكي الحاجات الضرورية لي نسحقها و نستعملها نهار كامل بعيد على الدار ... هاذوما بغيــــــر المفتاح و التليفون و و و هههه خاطر علبالي كاين لي تكومنتي و راح تقولي هاذ الشيء هههه ما ننساش باش نهدر عليهم ... برك نعتبرهم تابعين للصاك هاذوك ما يشقاش واحد يفكركم بيهم ...

عندي Pochette  صغيرة متوسطة ماشي كبيرة بزاف و ماشي صغيـــــــــــرة هههه المهم فيــــها ...

معقم لليدين صغير شريتــوا 140 da  ... علبالكم ناكل برى ... كاش ما نمس ... لول الغبار الوسخ ههه ... الوغ نستعملوا ســــآعات نعقم بيه يديا ههه ماغري كاين بزاف ما يحبوه شانا ما عندي حاجة فيه ... بصح يبقى في صــــآكي ... الوغ هاذا هو القاعدة .

عندي ايضا Des Lingettes  شريتهم 30دج للوحدة ... ريحتهم شابة فيهم 5 وقيلة ولا 10 ماشفيتش هههه ولى والله ما نتبهتش ... ضرك تقولوا واشن ؟ 5برك ؟ هههه قلت Pochette  صغيرة جاية داخل الصاك تاعي ... الو غزوك باكيات يكفوا في الصاك و ما يدوش بلاصة ريحتهم شابة ... و نسحقهم كي ندير معقم لليدين نمسح بيهم تروح الرائحة ... ساعات نمسح صباطي ... ساعات لازم نروح للمرحاض (حاشاكم) ملعلباليش ... ههه المهم ينصابوا و انا صح صبتهم ... دايمن كي نسحقهم نلقاهم ...

عندي بواطة صفيرة ديرة فيها La Vasline  ... هاذي نسحقها ليديا ... ساعات يولوا حرش الــــــــــوغ ... نسحقها دايمـــآ ... ساعات تحصلي الجرارة تاع la  veste  الوغ نسرح بيها ... الوغ دايما معايا كيفكيف ...

عندي هذيك الريحة Les Petits Extrait  يديروا 150 دج ... تكونوا شفتوهم ... نحبهم خاطر صغيــــرة ... ما تديش بلاصة ... و تنفع كي جيك ريحة عيانة ... ولى المهم ريحة مليحة ف الصاك خاطر تخلي ريحة شابة في الصاك .

الــــــــــــــوغ هاذوا هوما واش كاين في Ma Petite Pochette De Toilette  الوغ ماكالاه تقولولي هه لازم كابا ... انا هاذوا نديرهم في بلاصة صغيــــــــرة جدا جدا ... الوغ ما يكلوا ما يشربوا كي نديرهم في صاكي حتى ولو ما نستعملهمش كل يـــــــــوم ... نسحقهم نسحقهم .

ضرك نهدروا على فاش نكتب و باش نكتب ههه نهدروا شوية على القراية ... ههه الموصيبة ... الوغ .

انا ما نحبش نرفد الكراريـــــــــــس يعونـــــي ... ههه خاصة ضرك لافاك مانديهمش .... حتى ف الليسي كنت ما نكتبش .... الوغ واش درت شريت الاوراق يعني Les Feuilles Mobiles   تاع المصنف Le Classeur   نديهم معايا و نكتب فيهم .... و شريت Un Porte Document   فيه 17 revu    وقيلة المهم ما يلحقش 20 ... كل مقياس اي مادة ... دايرتها كامل كيف كيف ... و هكذا الثفل تاع الكراريس تهنيت منوا ... ما كنش الثقل بزاف ... الورق و المصنف ما يديليش البلاصة بزاف ... الوغ كيما قلت ... نكتب في الاوراق المنفردة ... و نلايم كل مادة في pochette    وحدة تاع Le Porte Document   هكذا ما عنديش الثقل في الصاك ... و مرتبين ما نودرهمش ...

عندي المقلمة ... ههه بزاف ضرك يتعجبوا المقلمة في الجامعة ؟؟ ... هههه انا جامي نسمح في الغالي وشبيكم ههه ... عندي مقلمة عادية ماشي تاع ميكي .... في كامل السيالات بالالوان .... الستيلو لكحل لي لازم يكون في مقلمتي ...Les Souligneure   ... نعم عندي كامل هاذوا ... و كل ما تحتاجه المقلمة من اشياء عندي ...

الــــــــوغ لحقنا لنهاية الموضوع حبيباتي قصير خفيف ضريف .... نشاء الله يكون فادكم ... و تعرفتوا على واش عندي في صاكي ... و ديتوا فكرة على واش لازم يكون عندكم في الصــــــآك ... نتلقاو في مواضيع جديدة انشاء الله ... حفظكم الله ... ما تنساوش تطرحوا شؤالكم في البواطة تاع لي ميساج ... ولى في لا باج ... بيزوا حباباتي ... نحبكم تبقاو على خير 

.