♥ ASTUCES N°2 ♥ : 7 Astuces Utile Pour vous ♥

سـلام البنات انشاء الله تكونوا بخير و على خير ... طوّلت عليكم علبالي واش اندير الله غالب ههه راكم عارفين بلي بديت المشروع لي كنت نخططلوا راني درت حاجة في حياتي ... انشاء الله ربي يوفقني ... الـــوغ شوية ما عنديش الوقت زيد على هاذا عميتها في السداسي الاول ... راني مخلطة هاذ اليامات ... الــــوغ قرررت نظم و قتي و المواضيع راح يولوا كل جمــــعة ... كل جمعة عندنا موضوع هكذا باش ما تقولوش نساتنا زيد على هاذا الحظور تاعي راح يكون شوية بقوة في الصفحة ... المهم بلى ما نطوّل عليكم ....

الموضوع تاع اليوم راح يكون على Les Astuces  لي نستعملهم في حيــــآتي اليومية في الشغل يعني شوية تدابير منزلية .. خيرتلكم مجموعة منهم و راني راح تهدرلكم عليها ... يعني موضوع على عفايس هكذا تسهل حياتكم ... الـــــــــوغ بلى ما نطول عليكم ...

اوّل حــــآجة : غسل الاحذيــــة .

استعملت طريقتين بلى عذاب ... ههه الاولى هي انوا نحط الصبابط في الغسالة La Machine a laver ... خاصة Les Convers  نحطهم في المشينة ينغسلوا ... و الله يخرجـــوا جدد كاين بزاف جربوها علبالي ... ههه انتي و ما تعقليهمش ...

الطريقة الثانية هي ... نعمر باسينة من الماء و نحط فيها مسحوق الغسيل انا نستعمل Ariel  خاطر هو الافضل لازالة البقع ههههه ماشي الاشهار و الله التجربة و راح نهدر عليه في باقي الحاجات ... كيما قتلكم نعمر باسينة من الماء و نحط مسحوق الغسيل و نخليهم ... نهار كامل ولى منبعد نجبدهم نحكهم شوية نشللهم و خلاص يخرجوا جدد ...

ثاني حاجة : غسل الاواني .

هاذي راح نعطيلكم خليط انا نستعملوا بزاف تبعوني ... نجيب قرعة فارغى تاع ISIS  نحـــط فيها شوية تاع ازيس و نحط معاه شوية ماء جافيل ... من بعد نكمل نعمر القرعة بالماء و نغلق القرعة ... منبعد نحطوا في وين راح نغسل المواعين ... رغوة + مضاد للجراثيم تخدميه وحدك في الدار .... و زيد على هاذا يساعدك على توفير شوية من ازيس ... و الله هاذا رائع جدا ... يعطيك رغوة تشدلك حتى تكملي ... و زيد على هاذا ريحة هايلة جربوها .

ثالث حــآج : الحل ضد البقع .

عن تجربة انا Ariel Machine  يعني خاصة تاع الغسالة سلكني شحال من مرة ... ساعات عند بقعة في حاجة تكون تاع خرجة ما جياش ديريلها ماء جافيل ... انا شوفي واش ندير ... نعمر باسينة ولى اي حاجة بالماء ... نديرلها مسحوق الغسيل اريال ... و نزيد نحط فوق البقعة هاذيك ... و نحطوا في البسينة و نخليه .... يوم كامل ولى ... منبعد نغسلوا ... و البقعة راحت .... درتها شحال من مرة و نجحتلي ...

رابع حاجة : عندك حاجة ماشي تاع غسيل و حابة تغسليها .

اذا عندك حاجة ماشي تاع غسيل و حابة تغسليها ... كيف كيف ديريها في باسينة و ديريلها مسحوق الغسيل ... و خليها ... منبعد شليلها مليح بالماء بدون ما تعصريها .. منبعد حطيها في Ceintre  وخليها تقطر مليح من الماء ... انسايها ههه ... و منبعد خرجيها للشمس ... هاطذا ماراح تفسدلك حاجتك ... هكذا 100 بال 100 ما تفسدلكش .

خامس حاجة : عند حاجة حابة تحديها بصح خفتي تحرقيها .

شحال من مرة نحبوا نحددوا حاجة بصح نخافوا نحددوها على جال نوعية القماش ... نخافوا نفسدوها الــــوغ ... اراوحي نعطيك الحل ... اولا حطي الحديد يسخن مليح ... جيبي هاذيك الحاجة ... جيبي من بعد قطعة قماش ولى ليزار Drap  حطيه فوقها ... Debranché  الحديد و حديها غير بالعقل ... و كي يبرد الحديد عاودي اشعليه و خليه يسخن ... حتى تكملي ... احسن حل ... علبالي ههه ضرك تقولولي ليه نضلوا نلعبوا هههه نقولك احرقيها مالى ... خاصة قماش تاع Satin  ولى La soie   ... تكون عندك Robe  تاع خرجة ههه باش ما تحرقيهاش ....

سادس حاجة : باش تمسحـــي مليح .

انا فنيــــآنةٌ ههههه والله ... الوغ خاصة كي نمسح نعيى من راصي ... الوغ ابتكرت حل ... قلت المسيح ماشي التسياق ... التسياق ساهل ... الوغ كيما قتلكم ابتكرت حل ... علبالي بلي بزاف تصرالكم ... كي يكون شوية تخنتيش في الارض و تمسحي ... انتي تديه من جيهة هو يولي و انا نكره حيـــآتي ... الوغ واش وليت ندير ... نكنس المكان اول حــــآجة نكنسوا مليح مليح من كلش ... يعني الاشياء الكبيرة كامل تروح ... حتى الصغير ... و نمسح على راحتــــي ... ما نتقلقش كامل ... كي يبقاو حاجات صغار ماشي حاجة ...

سابع حاجة : افضل طريقة باش تلمي الاوساخ .

كي نكونوا نمسحو ههه في الاخير كاين هاذاك لي ما يحبش يتلايم من الاوساخ لي تخرجيهم ... الوغ لازم تلايميه بيديك ... يعني كاين بزاف حاجات لازم تلايمي بيديك ماشي في المسيح برك ... الوغ ... شوفوا انا واش ندير ... نجيب ساشي Saché  ندخلوا في يدي ... يعني يولي كي القفاز ... من بعد نلايم كلش ... منبعد نقلب الساشي و يولي كلش الداخل ... بلى ما نمس باصابعـــي ... نعم لي قلك التفنين فن ما غلطوش ... تعلمتها على عمتي هههه .... الوغ دخلي يدك لايمي الاوساخ من بعد اقلب الساشي ... و اعقديه و هكذا راكي كملتي ...

ملاحظة : هاذ السبعة حاجات انا جربتهم و نخدم بيهم دائما دائما ههه ... يعني ما جبتش من راصـــي ...

وصلنا للنهاية موضوع اليوم خفيف علبالي ...هاذ المرة هاذا واش قدرت نجيبلكم يعني لي تفكرتهم ههه ... اذا عجبك الموضوع كيما هاذا يعني من هاذ النوع ... قولولي في كومنتار ... انشاء الله يكون عجبكم و انشاء الله يكونوا فادوكم شوية .... هه كيما قاتلي عمتي خطرة لازم تخدمي بعقلك ماشي بيديك برك هههه ... الــــوغ هاذي هي يعني ... نتلقاو في الخيـــر انشاء الله .... و اتهلاو في رواحكم ... ايـــــه ما تنساوش تزورو لاباج تاعي

.