♥ JE VOUS EN PARLE N°4 ♥ : Séchoir et Lisseur Que J'utilise

سلام البنات ... انشاء الله تكونوا بخير و #جمعة_مباركة ليكم كامل ... الوغ اليوم جبتلكم موضوع جديد ماشي علة مواد تجميلية هه بصح ادوات تجميلية ... راح نهدروا على Un Séchoir + Lisseur لي شريتهم انا عندي وحد 3 سنين و مازال يخدموا عجب ♥ ... شريتهم زهر يعني قلت يا ينجحوا و يكونو ملاح يا لا لا ... بصّح صراحة تفاجئت من النتيجة خاطر كانت رائعة ♥ خاصة على Lisseur ... الـــوغ راح نبداو ...

اولا راح نهدرو على Lisseur

هاذ ال Lisseur تاع La Marque Calor ... شريتوا ب سعر 4200 دج ... هو يجي متوسط الحجم ماشي صغير بزاف و ماشي كبير بزاف ...

 فيه شاشة صغيرة Un Petit écran  فما تخرجلك درجة الحرارة ... فيه من 130 حتى 230 درجة ....

فيه ازرار منين تزيدي و تنقصي درجة الحرارة ... و وحدة منين تطفيه و تشعليه ... و اخرى اجي ملتحت ... هذيك القفل باش ينغلق و ما يبقاش محلول ... (معلومات عادية هاذي ) ...

واش فيه حاجة Spécial  عجبتني هي انه ... 30 ثانية و يسخن ... كي يكون يسخن هذاك العدد تاع درجة الحرارة ... مثلا درتيه في 230 ... هذيك ال 230 تبقى ت Clignoté  يعني تشعل و تطفى حتى يسخن ... عندما يسخن تحبس و تبقى مكتوبة 230 ... هكذا باش تعرفي اذا سخن و تقدري تستعمليه ولى لا لا ...

ايضا فيه حاجة اخرى تعجبني ... انه اذا ما نسيتيه مشعول و غفلتي و رحتي ... فهو يطفى 15 دقيقة بعد ما تنسيه ... يعني اذا نسيتيه مشعول و رحتي فهو يطفى وحدو ... يعني هاذا هايل ... ما تخافيه شاذا نسيتيه شاعل ... فهو يطفى تلقائيا ...

غير هاذا هو سهل الحمل يعني تحطيه في صاكك نورمال ... ماشي ثقيل ... حتى انو ماشي عريض ... ما يدرلكش الثقل ... اذا حمليتيه في صاكك ولى في الكابة ... حتى انو السعر تاعوا معقول ... و يخدم الشعر بطريقة رائعة جدا ... شعرك يهبط ... انا جربتواو حبيتوا صراحة بلى كذب ...

ثانيا السشوار :

هاذ السيشوار شورييتوا من La Marque GammaPiu   كيما لي يخدموا بيهم الحفافات تاعـــي هو Le g+5000    ... هايل يعني ... عندي شحال و انا نجبد بيـــــه شعري صبتوا رائع جدا ... كيما كامل لي سيشوار ... فيه السخون و الدافئ ... هاذا السخون تاعي صح سخون يجبد الشعر بشكل رائ ....

فيه 3 هاذوك لي يخرجوا السخانة ههه سمحولي منعرفش اسمهم ... كاين الرقيقة للشعر العادي ... و المتوسطة للشعر المجعد .. و العريضة كامل للشعر الجاف و العامر ...  يعني في البواطة مكتوب ... كل وحدة لواش تنفع ... يعني والله اذا حابة نتيجة كيما تاع الحفافة Résultat Professionnelle    ... هاذ الماركة هي الهايلة ... تقريبا كامل الحفافات يخدموا بيهم ...

شريتوا بسعر 3000 دج اذا مازالني شافية عليهم ... كي ترفديه ثقيل ... تحسي بلي حاجة ماشي اوبرك ... صحيح ... و كلش ... سامحوني ما لقيتش الصورة تاعوا ... بصح هوا باين نص البنات يعرفوه و ماش بعيد يكونوا يخدموا بيه 

 من خلال هاذ الموضوع حبيت نقولكم بلّي ماشي غير Les Grande Marque  كيما Braun  و غيرها من المركات لي المنتوجات تاعها يديروا اكثر من مليون دينار جزائري  هي لي تخدم ما تريال خشين و يخدم زين ... صح هوما النتيجة تعهم تكون هايلة على هاذوا ... بصح هاذا ما يمنعش انو الماركات الاخرين ماشي ملاح ايضا ... مثلا اليوم راكم اكتشفتوا ماركة جديدة تاع Les Lisseur  هي Calor   بسعر معقول و ضمان تشدلك ... انا شدولي 3 سنين و انا نخدم بيهم ... على هاذي حابة البنات يشاركوني بصورة للليسور ولى سيشوار لي تخدموا بيه هكذا باش نفيدوا بيه البنات لي حابين يشروا ... ابعثوا لا باج تاعنا ♥

الـــوغ وصلنا للنهاية الموضوع تاعنا تاع اليوم اذا عجبكم شاركوه مع صحباتكم ... ما تنساوش جــــآم صغير ... و ماتنسايش تقولينا التجربة تاعك و ال lisseur et séchoir   لي تستعمليهم ... في كومنتار ... ولى تشاركي في البـــوم الجديد في الصفحة تاع نصائحكم للبنات ... اتهلاو في رواحكم بزاف بزاف و نتلقاو في موضوع جديد انشاء الله يا ربي ... ربي يحفضكم كاملين ... نحبكم برشى برشى ...

.