♥ BLABLA N°2 ♥ : tu es Une Fille ☺

سلام البنات ... وحشتكم بزاف بزاف برشى برشى ... اليوم جيت و جبتلكم موضوع جديد معايا ... اليوم موضوعنا لا ماكياج لا تجميل لا تدابير منزلية لا والوا ... اليوم موضوعنا هو انتي لي راكي تقراي في هاذ الموضوع ... عدلي روحك مليح و اقعدي مليح عندي هدرة معاك ... انعم هه ما تخافيش ... راح نهدر موضوع حساس جدا جدا ... موضوعنا اليوم كيما شفتوا آسموا :" انتِ بنت " ...

في مرة وحدة قاتلي ... ياسمين ديرينا موضوع على نحن البنات ... كيفاش نقعدوا كيفاش ناكلو ... واش نهدروا و واش ما نهدروش ... قاتلي راكي عارفة البنات من عمر 16 الى ما فوق هو عمر تاع البنت يبداو يخطبوها ... انا فرحت للفكرة تاعها ... بصح زعفت خاطر راهي تخمم برك تعدل في تصرفاتها فقط لاجل الزواج ... باش يخطبوها ... هكذا فهمت اذا راني غالطة ... اسمحيلي ... انا اعتذر قدام مئات القارءات ... المهم ... موضوعنا اليوم هذا هو ... راح نغطيك أشياء ممنوع عليك اديريها لانها تقضي على انوثتك .

انتِ بنت 1 : لازم عليك الكلام بصوت منخفض و بشكل هادئ خاطر من قلّة الادب انك ترفعي صوتك ... قدام الناس انتي بنت لازم تكوني هادئ تمسكي اعصابك حتى ولو هذا صعب ... لازم ما ترفعيش صوتك ... مارانيش نقلك ههه خالي لي قدامك ... بصح يعني ما ترفعيه حتى تعيطي ما تخفضيه حتى ما يسمعوكش ... اتخيلوا معايا تكوني قاعدة في امان الله حتى تسمعي وحدة تعيط و تتبهلل و صوتها الناس تسمعوا ... ما تقولوليش ماكان ماراحلي في الناس كامل ما دخلناش في الناس ... بصح شوية راكي تمدي صورة ليك على روحك ... تحبي يقولوا عليك تبارك الله على ذيك التربية ... الصوت المرتفع هو شسء مزعج في الفتاة ... آمنيني والله ... لازم تهري غير بشوية جهد ما يسمعك لي قدامك ... ماشي الزنقة كامل .

انتِ بنت 2 : لبسك ... الستايل و الموضة شيء عادي كامل نحبوا نلبسوا و نبانوا ... و نكونوا حاجة كلاس ... نقولك بصراحة كاين زوج حاجات لازم تتجنبيها ... تريكوا القصير ... و السروال المزير عليك و الفيزوا ... كي نقول مزير عليك معناه انك من قياس 36 تشري سروال تاع 34 ... هذا يسموه راكي ديري فيها بلعاني ... اسمحيلي مي لازم نهدر معاك بصراحة ... كاين ضرك التاويل باش تكوني  Classe بحاجة مستورة و شابة ... كي قلت تريكوا قصير ... قلت يجي سوى سوى مع السروال ... ولى ادخلي تريكوا داخل السروال ... انتي حرة علبالي ... بصح يجي نهار تولي تخمي مع روحك ... و تقولي كنت قادرة نلبس حاجات شابين و مستورين ... ماشي شرت حاجة طويلة حتى الركبة ولى الرجلين ... عند ادنى حد هوا يغطيلك  Les Hanches  تاعك ... بصح ما ننكروش بلي حتى هاذوك لي حتى الركبة ... راهم شابين و يهبلوا ... نولوا لل فيزوا ... الفيزوا البسيه تحت السروال ... هاذاك داروه كيما  les Bas  برك ما فيهش الرجلين ... اذا حبيتي تلبسيه البسيه تحت  robe, liquette  طويلة ... السروال المزير عليك ... اشري سروال لا طاي تاعك ... ماشي طاي صغيرة عليك ... كوني بسيطة   simple  ماشي شرط عليك تكتري بش تباني و كامل ... البسي مليح و حاجة شابة ... بعدوا البلى عليكم ...

انتِ بنت 3 : كي تاكلي العلك ال   chwingum  جربي ما طرطقيهش ... خاطر هذا شيء مزعج جدا جدا جدا جدا جادا ... حن لما تمضغي امضغي بلى ما ديري الحس ... خاطر شيء راح يخليك تباني شوية شوية مهمى كنتي جميلة و كلاس ...

انتِ بنت 4 : نحن البنات ... معضمنا يعيـــف ههه نعم اكثركم يعيفوا ... بصح كاين لي يعيفوا في دارهم برك ... يعني لما يخرجوا برى ... يولوا نورمال ... الـــوغ فهميني كي تدخلي المرحاض العمومي ( حشاكم ) ... و تقضي حاجتك و كامل ... علاه تخلي الفضلات موراك ؟ علاه ما ترفديش حاجتك و ترميها في مكانها ؟ ... كاين بنات و الله العضيم كي تقوليلها تقولك واش دخلك فيا ؟ ... في داركم اديري هكذا ؟ ... هاذيك المسكينة لي تللايم موراك تقبلي عليها هكذاك ؟ ... الله يهديكم حبسوا علينا هذا ... خاطر صح حجة عيانا فينا ... كاين لي تخفالهم بصح من اليوم نتمنى ما تخفالكمش .

انتِ بنت 5 : في داركم اقعدي كيما تحبي ... شرعي رجليك ... طولي رجليك ديري رجليك في راصك ... قدام الغاشي ... عدلي في جلستك ... لايمي رجليك ما تحليهمش بزاف ... ما طلعيش رجلك ... كاين حاجات لا نقاش فيهم من بينهم هاذي ... لا تجلسي عدلي في جلستك ما تشرعيش رجليك .

هاذي هي النصائح لي حبيت نقدمها للبنــات اليوم في موضوعنا ... أشياء لاحظتها و حبيت نقولها ... سامحوني اذا غلطت ... ما رانيش على كامل ... كا رانيش نقول انتم هكذا ... راني نبه فيك باش ما طيحيش في أخطاء هكذا و تتجنبي أخطاء غيرك .. انشاء الله الرسالة و صلت و نتمتنى تشاركوا هاذ الموضوع باش يوصل على أوسع نطاق ... المهم موضوع اليوم خلاص و نلتقي في موضوع جديد انشاء الله ♥

.