سلام البنات ...
انشاء الله تكونوا كامل بخير ... توحشتكم و نتوما ثاني علبالييي ... ههه اليوم
كيما راكم شوفو موضوعنا على الأسبوع الأصعب في اشهر عند البنات ... نعم انها
الدورة الشهرية راح نعطيكم نصائح خفيفة حول هاذ الموضوع ... الوغ تبعوني مليح مليح
.... راح نبداو ... اليوم موضوع بزاف بنات طلبوه مني و دايما يسقسوني واش ندير ؟
... عييت مليت ... ههه اليوم راح نعطيكم نصائح انا نديرهم ... خاطر بصراحة انا يقتلوني و يكملوني ههه ...
اول حاجة هي
الصطر أي الألم ... الوجع الدورة الشهرية بزاف منكم يعني منوا ... بصراحة انا
يطويني نولي نموت و نشهد ... كاين بزاف بنات يشربوا المسكنات ... يعني دواء ..
ويقلولي ما يقرش فينا الدواء ... ارواحي نقولك علاه ما سقرش فيك الدواء ... ببساطة
خاطر تشربيه مباشرة على كرش باردة ... و هذا هو الشيء لي يخليه ما يقرش فيك و هذا
شيء طبيعي ... الوغ انا واش ندير ... أولا نشرب تيزانة تاع النعناع ... يعني
النعناع حطيه في الماء و خليه يغلي ... و اشربيها ... ماشي سخونة تحرق و ماشي
باردة ... اشربيها دفي كرشك ... باش تولي دافئة ... و اشربي حبة دواء ... و ارقدي
مباشرة ... راح بمجرد انك تشربي تيزانة ... راح بداي تحسي بالراحة ... كي تزيدي
الدواء و ترقدي ... بمجرد الاستيقاض راح تحسي بلّي كرشك حبست ... كرري هاذ الفعل
في النهار ... مثلا اشربي الصباح و اشربي قبل النوم .... و شوفي و تقولي ياسمين
قالت .... اذا نجحت معاك ما تنسيش تدعيلي ... هههه
ثانيا الأخطاء
الشائعة لي توقع فيها البنات ... المشي بالحفى يعني بلى بليغة في الدار يعني بلى
نعال ... لول ما علباليش ولى فهمتوني ... المهم هذا راح يحعلك ترفدي بزاف برودة في
رجليك ... و راح يدور عليك في فترة الدورة الشهرية و هذا هو لي يزيدلك الوجع ...
حاجة وحداخرى لاحظتها ... في الشتاء و البرد شفت بزاف بنات يلبسوا بابوش ... و
ثاني يطويو رجلين السروال يعني يقشطوه و يطلعوه ... هذا أيضا يسببلك الألم القوي
خاطر رجليك يبردوا و هاذ البرودة تطلعلك كامل ... أيضا الجلوس في الأرض .... الوغ
ننصحك تبعدي على هاذ الأفعال .... كاملين خاطر يدوروا عليك في فترة الدورة الشهرية
...
ثالثا البقاء
متمددة في الفراش طوال النهار ... يزيدلك السطر ... يعني الوجع ... يعني حركي روحك
شوية شوية ماشي بزاف بصح حركي روحك هكذا ... راح تخففي السطر عليك ...
رابعا ... بدلي الفوطة
كل 2 ساعتين ... ما تخليهاش عليك بزاف بزاف ... راهم يقولوا بلي راهي اجيب المرض و
ادير inféxion كي طولي بيها ... مكسيموم
5 سوايع ... الوغ انا نقول بدليها كل ساعتين و هذا افضل ... بزاف بنات ماتوا من
هاذ الشيء ... الوغ هاذي نصيحة ... خاصة في الأيام الأولى من الدورة ...
خامسا ... اذا
ما نفعتش معاك الطريقة الأولى من ازلة الوجع ... فانا نقولك هاذاك الكاس تاع
التيزانة قبل ما تشربيه .... حطيه اسفل البطن ... واقف بالطبع ... ماسي دفقيه ...
باس تدفى كرشك ... و هذا راح يساعدك باش تخففي الألم ....
سادسا .... افضل
ماركات الفوطة لي جربتهم ... elle
& elle, Always, Nana كامل هايلين بصح NANA و حدها صح هايلة ... المشكل انا ما نلقاهاش في
كامل الأسواق ... مخدومة من القطن مئة بالمئة ... و زيد ما تحسيش كامل بلي راكي
دايرة حاجة ... تخليك تحسي بالنعومة ... مانيش نجير في الاشهار ... راني نقول راي
تاعي فيهم ... هه هايلة ... كي ما نلقاش منهم نشري always أيضا رائعة ...
سابعا ... عند
شراء الفوطة انتبهي ... في ال paquets
مكتوب عادية ... سميكة ... طويلة ... انتي اشري
طويل جدا ... هكذا باش تكوني محمية ... اضا ركزي عالى كلمة سميكة ... باش تشربلك
مليح مليح ... هذا على واش لازم تركزي باش ما تنخلعيش فيها كي تحليها تلقايها
قصيرة ههه ... هكذا باش تحميك جدا ... كيما في ALWAYS انا نشري البنفسجية ولى زرقة ههه ماعلباليش
هاذاك اللون المهم طويل جدا ... و كي ما نلقاش نجيب الوردية ماكسي سميكة ...
ثامنا .... هههه
عادة غريبة راح يعتبروها هكذا البنات .... و كاين لي يديروها .... انا كي نكون في
هاذ الفترة تلبس الأسود فقط و حاجة طويلة ... وعلاش ؟ ببساطة ... اذا صرات اكسيدون
و خرجولي وااااااااااااااااااي صعبة صعبة ... ما يبانش في حوايجي بزاف ... و نلبس
حاجة طويلة ... هكذا باش نغطي اذا كاش ما صرالي بعيد الشر .... خاطر الأسود ما
يبان فيه والوا حتى الأزرق الغامق ... البني هاذ الألوان الداكنة ... الوغ هاذي
نصيحة أيضا ... في هاذ الفترة كلشي ممكن ... و ثاني كي تقعدي طلعي لا ليكات ولى
المعطف ولى الفيستى ... هكذا باش اذا كاش ما صرى ما تتمرمدش و تقدري تخبي بيها ...
وصلنا لنهاية الموضوع تاع اليوم ... انشاء الله
يكون عجبكم و كيما قتلكم البسوا حاجة في رجليكم ماشي تمشي هكذاك منبعد ادوري تبكي
يا عمري .... ما تقشطيش رجليك و اطلعي سروال في الشتاء و الله ما شي مليح لصحتك
... و البابوش ثاني ... ماتنسايش هاذوا ... ما تنسايش ثاني كي تقعدي طلعي تريكوا
ولى الحاجة الطويلة لي راكي لابستها من الفوق ... زيد البس الألوان الداكنة ...
زيد سخني كرس بتيزانة منبعد اشربي دواء ...
هاذوا هوما
نصائح اليوم انشاء الله يوكونوا فادوكوم ... نتلقاو في موضوع جديد ... اتهلاولي في
روحكم ... ما تنساوش تحطوا كومنتار اذا عجبكم ولى لا لا ... نتلقاو في موضوع جديد
انشاء الله و ربي يحفظكم و ينجحكم انشاء الله ♥
.
Commentaires
Enregistrer un commentaire
Commentaires