♥ SCHOOL CONSEILS N°3 ♥ : Mon Histoire du BAC + des Petit conseils pour Le BAC ☺

سلام البنات ... علبالي بزاف نكم راهوا مشغول بالباك و الامتحانات ... و انشاء الله تقراو الموضوع هذا و تبارطاجوه على ابعد مدى ... مع كامل حبابكم لي رايحين يجوزا الباك هاذ المرة ... الوغ راني رايحة اليوم نحكيكم حكايتي مع الباك اليوم ... الباك لي هبلني و هبل الغاشي كامل ... مي نقولكم حاجة طلعلكم المورا ... راكم في نعمة و ي ططلعوا للجامعة انشاء الله تفهموا هدرتي مليح مليح ... المهم راني رايحة نجرب نختصر الحكاية ههه ... باش يطلعلكم المورال

الوغ انا كنت نقرى شعبة تسيير و اقتصاد ... يعني بزاف بزاف بزاف يعبروها الشعبة الاسهل كـــــــــــــــآمل .... ارحموني من هاذ العبارة السخيفة ... القراية دائما تساوي ماكانش حاجة ساهلة في القراية لازم بنادم يكسر رايوا .... نتقلق ك قولولي ايييه Gestion  ساهلة .... و حنى نقراو الرياضيات كيما تاع Les Scientifique   و المعامل 5 ... الوغ بركاو من هاذ العبارة ... خاطر يدور بيكم الزمان و تولوا تقراو في الجامعة ... علوم التسيير و التجارية خخخههه و اشوفوا الساهل تاع الصح ... ما تلقو غير صحاب التسيير و الاقتصاد يفهموكم هه ... الوغ حبسوا هاذ العبارة ههه

الوغ كيما قلت كنت تسيير و اقتصاد ... نقراو محاسبة ... الاقتصاد ... الرياضيات ... القانون ... التاريخ و الجغرافيا ... الشريعة ... الفلسفة ... الفرنسية ... الإنجليزية ... العربية ...

كامل هاذو انعم هههه ... عام كامل و انا نلعب ... الكراريس ما عنديش ... الكتابات ما نديش ... كنت حاطة راسي غير في المحاسبة يعني كنت نكتب و نتبع و كلش برك ... منبعد وليت المحاسبة و ماشي حاطة راسي فيها ... الرياضايات و كامل ايه ايه والله ما طلعتلهم بحساب ...

كنت ندير Les Cours  تاع المحاسبة و تاع الرياضيات ... المحاسبة كنت ما نراطي حتى حصة ... و الرياضيات درت مع الفصل الثاني ... كنت هكذا عام كامل و انا نقرى غير هاذ الزوج و الليسي كنت نروح نسخن الكرسي و نولي ... نلعب و نتمسخر ... بصح كنت في الفرنسية في الإنجليزية في كامل المواد بغير المحاسبة ... كنت نجيب السلاسل ناع المحاسبة ونحلهم كل وقت كنت نجيب المواضيع تاع الباك لي سبقوا و نحلهم ... ولي ما نفهمش نروح للشيخ تاع الليسي ولى Les cours  يفهمني ... كنت نروح عند المعاودين الوغ مشات يجي فيها ... ضرك في لا فاك ما عنديش مشكل فيها ...

بقى شهر للباك افريل ... بقاو 3 أسابيع جابلي ربي ... جبت التلخيصات لي صبتهم في الانترنيت في موقع الدراسة eddirasa.com  تاع الشريعة ... الاقتصاد و القانون ... التاريخ و الجغرافيا كان عندي الكتاب تاع المصطلحات و الشخصيات ...

الوغ حفظت منهم تاع الاقتصاد في 8 ورق ههه  و القانون ثان ماشي بزاف .... التاريخ و الجفرافيا حفظت غير الشخصيات و المصطلحات ... التاريخ كنت نشوف واحد Les Vidéo  تاع شيوخة يشرحوا الدروس في اليوتوب ... كنت نجيب ورقة و سيالة  ونكتب واش راه يهدر ... الشريعة تقدروا تقولو كي شغل حفظت ههه

انا العام لي فات ما كنش العتبة انا درت العبة لروحي هههه اضحكوا ... الفصل الثالث ما حفظتوش ... حتى و اذا حفظت حفظت كاش درس ولة نص هههه .. ايه المهم القانون و الاقتصاد حفظت مليح من الملخصات ...

كنت نحفظ و نعاود نكتب ... نعاود نكتب بلى ما نشوف ... ولي نشوف روحي ما حفظتهاش مليح ... نعاود نحفظها و نعاود نكتبها ... خاطر انا فيا مشكل ما نقدرش نحفظ من الكتبة تاع الحاسوب ...

كنت نعتمد على les Marqueurs  يعني Les Souligneur   هاذوك تاع الألوان ... نلون الكتبة ... و نشفى عليها ...

هاذي هي طريقتي في الحفظ ... نكتب و نعاود ...

ايه أيضا زعمى الدرس الأول حفظتوا ولى الورقة الأولى ...... منبعد نحفظ الدرس لي موراه ... منبعد نعاودوا ... كي نعاود نعاود من الدرس الأول و نهبط ... منبعد نحفظ الدرس الثالث نعاود من الدرس الأول حتى نوصل للدرس الثالث ... و هكذا ... بصح كي نحفظ الدروس الأخيرين ... نعاود زعمة عندي 6 دوروس ... حفظت 4 راني في 5 ... كي نجي نعاود نعاود من الدرس الثالث زعمى ... خاطر الاولين نكون عاودتهم مرتين ولى 3 ... هاذي كي يكون عندي الوقت ...

ايه وصلنا للوقت ... شوفوا في الحفاظة ما كنت نوض لا على 5 تاع الصباح لى نسهر حتى 12 تاع الليل ... هاذ ال  Programme   متعب لمخكم ... اذا نضتي 5 ارقدي بكري اذا سهرتي 12 ما تنوضيش بكري ... فهمتي اذا نضتي بكري رقدي بكري ... اذا رقدتي ماشي بكري ... ما تنوضيش بكري ...

المهم انا كيفاش كنت ندير ؟ ههه ... كنت نوض 9 تاع الصباح ولى 9 ونص ... نشرب قهوتي في عقلي ... نجبد الحفاظة و نبقى نحفظ من ال 9 ونص زعمى حتى ... 11 ونص ولى 12 ... نفطر نريح شوية ساعة ولى نص ... منبعد نعاود نقلع حتى 15 ونص ال 16 ... فهمتي ؟

أيا نعطيك مثال زعمي حفظت الصباح من 9 و نص الى 12 ... حبست فطرت ريحت ... نعاود نبدى من 12 و نص ولى الوحدة ... حتى الربعة تاع العشية ... مور العاصر نشرب قهوة ... منبعد الجفاظة ما نمسهاش ... نروح نحل حاجة تاع التخمام يعني الرياضيات ولى المحاسبة ... حتى يجي وقت الرقاد ... كنت نرقد بكري يعني ما نفوتش 12 تاع الليل ... و هي رايحة ... كنت نعاود نضرب طلة على الحفاظة و نرقد ...

العربية وحدة كانت تقرى معايا تفهم مليح العربية فهمتنا و مدتلنا ملخصات هي خدمتهم ... و الفرنسية و الإنجليزية نسلك راصي الوغ ما كسرت شراصي بزاف

ما حبست فابسبوك ولى التلفزيون ولى والوا ... انا درت Programme  لروحي بروحي ... كنت نضرب طلة ساعة على ساعة في التليفون ... بصح كفاني الوقت مراجعة و حفاظة ... كنت ما نخرجش من الدار و حبست  Les Cours  في هاذوك الأسابيع لي بقاولي ... حفظت مليح مليح ...

ضرك نقلكم شحال جبت النقاط ... المعدل جبتوا 11.11 ... طلعوا المورال ... بالكشف تاعي هههه ... والله تنخلعوا ... المهم الرياضيا 4 و المحاسبة 8 ... الفلسفة 8 ... و تاع الحفاظة كامل ما بين 18 الى 14 ماكانش قل ... و الفرنسية الإنجليزية من 9 الى 12 النقاط ... و العربية 9 ... خاطر ديت الشعر ماشي النص ههه

شوفو في الأخير تاع هاذ الموضوع الطويل لي ما حبش يخلاص ... ديري في بالك بلي :

1-     مازال ما فاتش الوقت والله ما فات الوقت مازال و يكفيك ... و الله

2-     ديري Programme  و التزمي بيه  ... ما عندكش خيار آخر لازم اديري هكذا تنظمي و قتك و تقسميه و تلتزمي بيه ...

3-     عبارة فات الوقت ... ما نقدر نيدر والوا ... ما نقدرش نحفظ ... ما قدرتش نركز ... نحيها من راسك كامل ... خاطر هاذوا كامل خطآ في خطآ ... لازم تنحيهم من راسك ... اتوكلي على ربي و لي توكل على ربي ما يخيبوش ... فهمتي اتكلي على ربي

4-     اذا حفظتي و شفتي روحك ما تقدريش توصلي للفصل الثالث ... نحيه معليش ركزي على الفصل الأول و الثاني في الحفاظة ... احفظيهم مليح ... ياك كاين موضوعين واحد يطيح الأول و الثاني و واحد الثاني و الثالث ... تقدروا تلقاو أسئلة هكذا بصح ماشي بزاف ... الوغ معليش اذا ما وصلتيش .... اقرايهم هاذوك تاع الفصل الثالث ... بصح الأول و الثاني ركزي عليهم مليح ماشي في الحفاظة برك حتى في تاع الفهامة ...

5-     المواد تاع الفهامة ... حلي السلاسل و المواضيع ... لي درتيهم في Les cours  ولى في الليسي ولى صبتيهم ولى تاع العوام لي فاتوا ... ولى المهم و جربي تحلي التمارين تاع لي درتوهم .... يعني جيبي الموضوع حليه وحدك منبعد قارني بين الحل تاعك و التصحيح راح يعاونك هاذ الشيء

6-     اعتمدي على الحفاظة و عاودي اكتبي كي تكملي كامل في الأخير واش حفظتي بلى ما شوفي ... خاطر بعض الأحيان تكوني حافظة و تقولي والوا ما دخل في راصي كي تعاودي تكتبي شوفي بلي راكي صح حافظة ... هاذي طريقتي أيضا ... خاطر بعض الأحيان تحسي بلي ما راكي حافظة ولوا و انتي حافظة الوغ عاوني روحك بهاذ الطريقة تاكدي لمخك بلي راكي حافظة ... و الحاجة لي شفتي روحك ماكيش حافظتها مليح عاوديها ...

7-     أيضا في تاع الحفاظة عاودي حلي المواضيع تاع الاختبارات و الفروض ... و خاصة تاع الباك لي فاتو هكذا تزيدي تعاوني روحك في الحفاظة ... و كذلك بزاف أسئلة تاع العوام لي فاتوا يعاودوهم ... الوغ لازم تكون عندك فكرة ... و أيضا باش تزيدي تشدي في راصك ...

8-     أيضا ماكانش منها هاذيك تاع ما تحظوش ليلة الباك .. ما تحفظوش سمانة قبل الباك ماشي مليح و منعرف ... هاذي غير خزعبلات وخرافات ... خاصة اذا ماراكيش مكملة ولى شفتي بلي ما يكفيكش الوقت والله السمانة هاذي اذا ضيعتبيها تندمي عليها ... خاطر قادرة ديري بيها العجب خاصة اذا قسمتي وقت راكي رايحة تنجحي ... كلشي معتمد على تقسيم الوقت و تنظيم و الالتزام بالبرنامج ... هذا راح يساعدك تستغلي وقتك و الوقت راه رايح يجعد ... و يكفيك بزاف ...

9-     المراجعة المادة لي عندك فيها الباك ليلة من قبل ... هذا ماشي مضر ... بالعكس راح يساعدك تتذكري ... و تعوضي الوقت لي فات ... خاصة المواد تاع الحفاظة ... لازم تراجعي يالوكان ساعة ولى زوج على الأقل امنوني ...

نبقى غير نعاود في الهدرة ضرك ؟ هههه راني رايحة نكتبلكم موضوع خاص بهاذ النصائح تاع المراجعة و كيفاش جاوبوا في الباك ... راني حكيتلمن كامل تجربتي ... علما ان انا تلميذة فاشلة بامتياز ... ماشي ما عندي والوا في راصي بصح انا نتبهلل و نعجر و كسولة و كامل المصطلحات المتعاقة باالتلميذ الكسول ههههههه و جبت الباك شفتوا ... أيضا هاذيك الحكاية تاع اذا ما خدمتيش في الفصول ما جيبيش الباك ... لي يقولهالك دخلي صوابعك في عينيه اجبديهم ... خاطر انا كنت نجيب المعدل 8 في الفصول ... و في الباك جبت 11 ... و راجعت و بديت شهر ولى اقل من قبل الباك  ... أصلا المعدل تاع الفصول ما يهمك في والوا ... و ما يعبر على والوا ... كاين بزاف كانوا يقراو معانا كانوا يجيبوا ب ال12 فمى فوق و ما جابوش الباك ... يعني مازا في امل ... و جامي ياسي و تقولي فاتني الحال خاطر ما فاتكش .. مزال كاين امل ... عاودي مورايا ... انا نجيب الباك ... عاودي ؟ ... زيزدي ... زيــــدي ... ايواه تقدري اجيبي الباك .. تعجبني الثقة بالنفس تاعك ...

اتكلي على ربي و لي تكل على الله جامي خاب ولى ضاع ... ديري ربي و نبي في قلبك و عقلك و انشاء الله فيها خير و تنجحي ... ماشي ترقدي و تقولي لي كتبها ربي ولى تقولي راني تاكلة على ربي ... قالك اسعى يا عبدي و انا نسعى معاك ... انتي ديري لي عليك ... و نظمي وقتك هذا هو الأهم في كلش راني عاودتها الف مرة ... هاذ الهدرة ... و انشاء الله كامل تنجحوا هذا هو الأهم عندي انا ... هذا لي يهمني و نفرحلكم وحدة وحدة ...

الوغ انشاء الله تكونوا استفدتوا من الموضوع هذا من حكايتي و من التجربة تاعي ... ولي عندها سؤال تطرحوا في كومنتار ولى في اطرحي سؤالك منا ( بدون تسجيل ) .... يعني الكل يقدر يشارك ... اذا عندك أسئلة ارواحي لا باج و انا نجاوب عليك بكل سرور ... و انشاء الله نعود بموضوع جديد فيه نصائح للباك ... باخصار ...

لي جوزت الباك ... تدخل في هاذ الرابطhttps://docs.google.com/forms/d/1IS9fe04V6H2U-Avee0yxKox82OzwdbMy5d34_f9txck
 نحكيلنا حاكيتها مع الباك هكذا نشجعوا البنات و نطلعولهم المورال ... بالاك تكوني سبب في نجاح بنت ... اعطيتيها امل في النجاح ...

الوغ البنات اتهلاو في رواحكم نحبكم بزاف بزاف البنات اهلاو في رواحكم  

.