♥ BEAUTÉ DIY N°1 ♥ : Gommage Naturel Pour Visage {Miel}

ســــــــــــــلام البنات ... انشاء الله تكونوا كامل ملاح ... اليوم جيتكم بحاجة جديدة جامي درتها لا في لاباج ولى في le Blog  ... انعم ايه ... اليوم جبتلكم Gommage  مخدوم في الدار ... كاين بزاف بنات يحبوا الوصفات الطبيعية ...  و انا بصراحة جامي درتهم ني في وجهي ني في مكان آخر ... بصح هاذ المرة حبيت نجرب حاجة جديدة ... Malgré  كنت خايفة شوية ديرلي حاجة في وجهي مع العلم انه ما خلطتش حاجات بزاف يعني ممكن انهم يسببوا حروق ... المهم يوقلك لي خاف سلم هههه ... المهم انا قلت نجربوا و نشوف النتيجة ... حتى انو سرسع ف الاستعمال و النتيجة تظهر بسرعة .

ال Gommage  خدمتوا ينظف الوجه ... و ينقيه من الخلايا الميتة و الاوساخ ...  و انا كنت ملي حابة نشري ... بصح مصحليش واحد يكون هايل ... على هاذيك شديت عمي ال  Youtube  و قلت نحوس Gommage Naturel  نديروا اليوم ... خاطر راني رايحة ندوش ... أيا بديت نحوس نحوس و نحوس ... تقريبا كامل لي شفتهم La Basse  تاعهم ياما سكر ولى عسل ولى قارص ... و يزيدوا  Noix de coco  ولى ما علباليش ... مالقيت واحد يسر الخاطر ... رحت للكوزينة و قلت نجرب La Basse  تاع كل وصفة شتها ... معناه خلطت العسل مع السكر ... و ضرك شوفو الوصفة التحت ... و نهدروا على النتيجة مع الأخير ... تبعوني مليح

الوصفة :

-         2 ملاعق قهوة سكر

-         1 ملعقة قهوة عسل ( انا استعملت عسل الشفاء )

-         1 ملعقة قهوة قشور القارص ( الليمون ) Le zeste  يعني

هاذ الوصفة انا درتها من راصي كيما قتلكم يعني المقادير كيف كيف من راصي و شحال درت من راصي ... بصح اذا حبيتي كمية كبيرة على هاذي تقدري تزيدي ... بصح احرصي اديري السكر دائما اكثر من العسل و القشور تاع القارص ... تبعي في كل 2 مغارف سكر عند ملعقة عسل و ملعقة قشور القارص ... مثلا حبيتي تزيدي على هاذي و  درتي 3 مغارف سكر ديري ملعقة و نص من العسل و قشور القارص ... هكذا برك باش يجيك خليط متماسك مليح ... ملازمش يجي جاري ... و في الأخير عينك هي ميزانك انتي كي تكوني تخلطي تبانلك واش تزيدي و شحال تزيدي .

الطريقة :

-         جيبي Bol  صغير ولى كاس ولى طاس ولى

-         حطي فيه السكر مع الأول

-         زيدي حطي معاه قشور القارص

-         زيدي العسل

-         خلطيهم مليح مليح حتى يولي عند خليط متماسك جدا ... كيما قلتلكم ماشي جاري

-         خليه يريح شوية  

قبل ما تحطيه في وجهك :

اذا درتيه و انتي في الدوش Salle de bain  ... يعني ماشي غير تدخلي لل دوش اديريه قبالى ... خلي المسام تاعك ينفتحوا شوية مع البخار تاع الدوش و منبعد حطيه في وجهك ... يعني بعد 115 دقيقة من دخولك

-         اذا درتيه و انتي ماشي في الدوش ... جيبي منشفة صغيرة ... شمخيها بالماء الساخن ... و حطيها فوق وجهك مدة 5 الى 10 دقائق ... حتى تبرد المنشفة ... هكذا باش ينحلوا المسام تاعك ... مليح منبعد حطيه فوق وجهك

قلت هاذ الشيء خاطر ال Gommage  اذا حبيتي يعطيك نتيجة افضل و هايلة ... لازم يكونوا المسامات تاعك مفتوحين مليح ... باش يخدم خدمتوا ...

طريقة الاستعمال :

L’applications  رايحة تكون بيديك ... اذا درتيه ب  Pinceau  شغل ما درتي والوا راني قلتها ضرك ...

-         ديري شوية في يديك و حطيه على وجهك و افركي ( يعني حكي ) ... يعني و انتي ديري فيه حكي وجهك على شكل دوائر ... حكي غير بالشوية ما تنسايش السكر ههه الوغ حطيه على وجهك بيديك و انتي تحركي يدك على شكل دوائر في وجهك ... ابقاي غير تحطي على وجهك و تككري نفس العمليه مع الفرك على شكل دوائر يعني بشك دائري نشاء الله تكوني فهمتيني ... مدة 10 دقائق

-         كي تكملي تحطي على كامل وجهك خليه يريح من 10 الى 15 دقيقة

-         بعد ما يريح عاودي حطي يديك على وجهك و انتي تحكي على شكل دوائر

-         من بعدها اغسلي وجهك

تجربتي :

-         انا درتوا و انا في الدوش ... بعد ما كملت الدوش باش حطيتوا على وجهي ... كيما فهمتكم حطيتوا و انا نحك وجهي بشكل دائري ... هذا راح يساعد بشرتك تنشط ...

-         كيست وجهي في اول الدوش قبل ما نحطوا ... منبعد دوشت ... و كي كملت الدوش حطيتوا كيما قلت ( و هذا ماشي شرط )

-         خليتو المدة لي قتلكم عليها ... و غسلتوا من بعد ما غسلتوا ... ولات عندي Une Peau de bébé  يعني مارانيش نكذب ولى ... بصح والله العظيم غير وجهك يولي طري ... نظيف و حنــين و يزلق ... بزاف هايل وصح ينشط البشرة ... وجهي ولى ماشي كيما العادة و ولى  ابيض ... صح يبان نقي ... انا و نخلعت من النيجة تاعوا و الله صح دهشني ... كنت متخيلة البشرة تاعي تبقى هي هي ... بصح البشرة تاعي تبدلت وجهي ولى لامع ( راني نهدر كي تاع الاشهارات )

-         عندي ساعة ملي درتوا و وجهي مزالوا رطب و حنين .... نشوف شحال باش تعاود تتوسخ البشرة تاعي ... و نعاودوا انشاء الله ...

ملاحظات :

-         هاذ الوصفة لكل أنواع البشرة

-         يمكنك تزيدي قطرات من الليمون ... قطرات صغيرة برك

-         العسل جربي أي عسل في داركم ممكن ينجح معاك

-         بالاك راكم تقولوا العسل يلسق في البشرة و بسيف باش ينغسل ... انا ثاني كنت نقول هكذا ... بصح انغسل بسهولة ... و ممكن اجربوا شوية في يدكم و شوفو بلي ينغسل بسهولة

-         اذا خفتوا يديرلكم حساسية ولى ( هو كلشي طبيعي و العسل و السكر ما ياذوش ) جربوا في يديكم ... شوية اذا ما شفتوا حتى تفاعل ديروا في وجهكم ... خاطر بشرة من بشرة تختلف

-         انا عندي بشرة زيتية و نفعني ... و راهي نقية خالية من الزيوت

-         حطي الخليط بيديك ماشي ب Pinceau  راني عاودتها

-         كيما قتلك احرصي على المسامات تاعكم ينحلوا قبل لنتيجة افضل ...

-         تقدروا اديروا كمية كبيرة و تخزنوها ...

مع الأخير انا نقلكم راني سعيدة بالتجربة هاذي ( خصني غير السعيد ) .... و صح نجحت و وجهي راه نظيف و لامع ... كيما قتلكم انا البشرة تاعي زيتية و بلخف تتوسخ معناه راني رايحة اكيد نعاودوا باذن الله ... وجهي راه زين طري ... ننصحكم اجربوه ... و ضرك ههه ... خاطر هايل ... من الصباح و انا نشكر فيه .... ههههه اصبروا كي درتوا ... ريحتوا شابة بزاف ... و بنتوا بنينة بزاف هههه حسيت روحي سنيوة قلب اللوز ... هههه ولى بقلاوة ...

الوغ البنات اذا عنكم كاش سؤال ولى تقدري تطرحيه هنا في كومنتار ولى في البواطة تاع لي ميساج لي راهي على اليمين ... و لى تطرحيه في لاباج فايسبوك ... و اذا جربتوه ما تنسوش تقولولي كيفاش كانت النتيجة ... مليحة ولى لا لا ... و اذا حابين مواضيع من هاذ الشكل قولولي أيضا باش نعرف واش نزيد نديرلكم ... اتهلاو في رواحكم و نتلقاو في ساعة الخير انشاء الله ... نحبكم 

.