♥ CONSEILS MODE N°2 ♥ : Les Indispensables Garde Robe

ســـلام البنــــآت توحشتكم انشاء الله تكونوا بخير ... الوغ اليمو موضوعنا على La Mode  شفت بلي ما نديرش مواضيع من هاذ الوع اولغ قلت نكثرلكم منهم خاصة انه الصيف ... الناس تحب تلبس ... العراس ... الألوان ... الملابس خفاف ... و قلت نشارك معاكم كامل واش نعرف ... اليوم راني رايحة نهدر على Les Indispensables Garde Robes  يعني 

واش لازم يكون عندك واش هوما الحوايج لي Obligé  يكونوا في الخزانة تاعك ...

أولا قبل ما نبدى لازم تفهموا واش نقصد بهاذي Les Indispensables Garde Robe  كاين بزاف لي راهم يسقسوا رواحهم ... ولى يكونوا Jamais  خموا فيها ... بلي كاين حوايج لازم يكونوا في الخزانة ... هاذ Les Indispensables  هوما القاعدة تاع La Garde Robe  تاعك يعني الخزانة ... لازم يكونوا يا لوكان حاجة منهم ... و راني متاكدة بلي نصكم راهم عندهم هاذ الحوايج برك ما فقتوش بلي هاذوا لازم يكونوا كاينين ...

فاش ينفعوكم ... ينفعوكم مثلا ما تلقايش واش تلبسي تروحي قبالا ليهم ... ولى هوما مفتاح الاناقة ... تنوضي صباح و ما لقيتيش واش تلبسي ... تروحي ليهم خاطر هوما حاجات Simples  يعني تقدري تلبسيهم مع كل شيء ... و التحت رايحين تفهموا اكثر و اكثر

Indispensable N°1 : La Chemise Noire et La chemise Blanche

الوغ Chemisier Noire  ولى Chemisier Blanche    ازم يكونوا عندك ... بصح لازم يكونو Simples  يعني Basique  مافيها حتى حاجة يعني لون موحد ... و هاذي القطعة تقدر تلبسيها مع كلش ... مع Slim  كحل ولى Jean  ولى ابيض ولى أي لون يجوا و يجوا شابين ... حتى و انوا تلبسيها مع Jupe  كحلة ولى كيف كيف تكون لون موحد تقدري تلبسيهم ... يعني يجوا مع كلش ... مع كلش تاع كلش ... اذا حرتي تلقايهم قدامك تلبسي وحدة منهم مع أي حاجة ... و رايحة تخرجي  TOP  ... يعني هاذوما حتى و و انوا خرجة ولى تزيديلها Veste classique  و Collier  هاذوك العراض لي راهم à La Mode  و سليم كحل رايحة تكوني بزاف هايلة بدون ما تبذلي أي مجهود ...

يعني هاذوما لازم تكون عندك وحدة منهم في الخزانة ... و اذا كانوا عندك الاثنين يكون احسن ... خاصة اذا كنتي خدامة و لى تقراي ولى يعني تخرجي كل وقت ... و في غلب الأحيان تقولي " ما عنديش واش نلبس " ... تجبدي وحدة منهم مع Slim  ولى Jean  ولى أي حاجة ... Jupe  و راكي ضربتي فيها حطة ...

يعني تكون قصيرة وى طويلة ولى ماشي مشكل ... و ثاني هاذي Indispensables  بالنسبة لوحدة بالحجاب و لي بلى حجاب .

Indispensable N°2 : Pantalons Noire .

 انا بالنسبة ليا هذا صح لا يمكن الاستغناء عنه ... خاطر واش لبستي من الفوق Chemise , t-shirt, tunique , top  أي حاجة أي حاجة اجي معاه ... هو Simple  الوغ واش تلبسيلو من الفوق يخرج عليه .... حب يكون الفوقاني لون موحد ولى Imprimé  ولى فيه Les Motifs  يعني يخرج عليه كلش ببساطة ... و هذا راح يسلكك في النهارات لي تقولي عليهم " ما عنديش واش نلبس" ... اجبديه مع ال Chemisier  لي هدرنا عليهم مقبيل و راكي رحتي ... ولى أي فوقاني وراكي فريتيها ...

أيضا ما ننساوش سروال Jean  هذا أيضا لازم يكون عندك في الخزانة خاطر كيما هو كيما السروال لكحل ... كيف كيف ... سلاك الحاصلين ... و كيما راكم شوفوا كاين بزاف الوان في ال Jean   بصح لي فيهم الألوان الغمقة هوما لي يجوا مع كلش خاصة ال Bleu Nuit

Indispensable N°3 : Le Blazer

تقدري تلبسيه مع كلش مع Robe   مع Tshirt  و سروال مع Chemisier  مع واش حبيتي ... كي تحبي تزيدي L’effet Classe  مع اللبسة لي راكي لابستها ... البسي ال Blazer  خاطر يتلبس مع كلش ... هو يعطيك المظهر الأخير تاعك ... الوغ لازم يكون عندك واحد .

Indispensable N°4 : la veste en Cuire

 خاطر هاذ La Veste  تعطيك Look  شباب بلى ما ديري والوا ... يعني لبسي حاجة Simples  من التحت و تزيدي La Veste  هاذي رايحة تكوني بزاف هايلة ... يعني يعطيك Look top  و شباب بلى ما تبذلوا حتى مجهود .... و ما تكسريش راصك كامل ... مثلا تلبسي Haut Simple  مع سروال كحل ولى Jean  وراكي فريتيها

Indispensable N°5 : Un Grand Sac

حنا البنات نحبوا نرفدوا كامل الدنيا معانا في الصاك ... خاصة في هاذ الوقت كيما انا نخرج صباح من الدار يقابلني البرد صافي عندي Veste  خفيفة منبعد كي يسخن الحال نحيها نديرها داخل الصاك ... الوغ ينفعني بزاف ... خاطر انحي من نخبيها من ... و ضرك الصبف معناه نرفدوا القرعة تاع الماء ... كل وحدة واش تحب يكون في صاكها ... الوغ انا نشوف بلي الصاك الكبير لازم يكون عندك في الخزانة يا لوكان واحد ... هكذا نهار تسحقي صاك كبير يرفدلك كلش تلقاياه قدامك بلى ما تكسري راصك

Indispensable N°6 : Les Petits Sac

انعم ماشي كي قلت بلي لازم يكون عندك صاك كبير ... تنساي الصاك الصغير ولى Sac Pochette  ... يعني هذا أيضا راح ينفعك ... انا نحبهم خاصة في الصيف ... نرفدهم بزاف في الصيف يعني كي نلبس Robe  ولى Jupe  ولى أي حاجة خفيفة يوالم مع اللبسة ...  الوغ خفيف للصيف ... و ثاني تلقايه كي ما تكونيش حابة ترفدي حاجات بزاف ... رفديه معاك

Indispensable N°7 : La Robe Noire

الوغ هاذي خاصة للاعراس ... لازم تكون عندك Robe Noire Simple  ... يعني عمرها ما Démodé  عمرها ما تكرهي منها ... حتى و انوا كرهتي منها راح تعاودي تمديلها  Une 2ém Vie  اذا زدتيلها Les Accesoires  هاذي اذا كرهتي من حوايجك و ما لقيتيش واش تلبسي ... تقدري تلبسيها مع بزاف حاجات مثلا تلبسيها مع  Blazer  يكونوا لونوا مختلف عن لون La Robe  ... و تزيديلها Les Bijoux Fantaisie  راح تخرجي بزاف Top  ... يعني هي ما Démodiche  موحال هاذي ... لهاذ كبار المصممين و خبراء الموضة يقولو بلي على كل امرأة يكون عندها Robe Noire  في الخزانة

Indispensable N°8 : Les Bijoux Fantaisie

خاطر لازم يكونوا عندك ... ببساطة كي تلبسي لبسة Simple  زيديلها Collier  ولى Sautoir  راح يعطيك مظهر قوي ... حتى و انوا اذا خرجتي للتسوق و كان عندك مبلغ صغير و ما لقيتي واش تشري ... اشري Les Bijoux et les Accessoires  هكذا تقدر تلبسيهم مع أي حاجة ... يعني مع كل حاجة ... حتى مع T-shirt  يعني يجي مع كلش ... الوغ لازم تكون عندك قطعة ولى زوج ... خاصة الكبار ... يعطيكم مظهر مليح

Indispensable N°9 : La Jupe Noire

 كيما لازم تكون عندك Une Robe Noire  لازم تكون عدك  Jupe noire  أيضا ... ماشي محسوب تاع اعراس ولى ... حتى تاع كل يوم ... يعني للقراية و الخدمة و كامل ... انا عندي وحدة حاطتها كي نكره من السراول نلبسها ... و نلبسها مع كلش تاع كلش ... ندخل ال Chemisier  داخلها ... ولى T Shirt  اجي هايلة بلى ما تكسري راصك ... بزاف ز حاجة خفيفة

Indispensable N°10 : Veste Légère

يعني Veste  خفيفة ... هاذي شخصيا ما نقدرش بلى هكذا قطعة في خزانتي و عندي بزاق الوان بصح الرمادية Gris  هي لي نلبسها مع كلش كيما قتلكم موقبيل في هاذ الوقت الحال يتنقلب ... الوغ هي لي تسلكني ... حتى في الشتاء نلبسها تحت ال veste  الخشينة ... بزاف ما نقدرش نسمح فيهم خاطر صح ينفعوا و بزاف  ... و أيضا كي تكون سخانة يلي خفيفة ديريها في صاكك و خلاص ... علابيها نحبهه بزاف

في الأخير باش نختصر الموضوع و ما تتلفلكمش بزاف ... اذا راكي تحوسي على حاجة تكون أساسية فس خزانتك و لازم تكون عندك ... ركزي على الحاجة Basique  يعني لون موحد فيها لون واحد ... ما فيها لا Motif   لى تخنتيش ... حبت تكون سروال ولى تريكوا ولى واش ... ركزي على هاذي خاطر هاذي هي La Basse  ... يعني هاذ القطع اذا اعتمدتي عليهم رايحة تلقايهم تلبسيهم اكثر من مرة و بزاف و جامي تقولولك اووووه هاذي ديمودي خاطر أصلا جاية Simple & basique  يعني هاذي هي ... و تقدري تلبسيهم مع حاجة فيها Motif  ولى Simple  كيما هي ... مثلا لبستي سروال اسود و فوقاني اسود Cassé  هاذ La tenue  ب Kimono  مثلا فيه الورد ... و Collier  يكون ذهبي ولى أي لون آخر ... مثلا تقدري في عوض ال Kimono  تلبسي Blazer  لون آخر عن الأسود مثلا وردي ...

فهمتوني يعني الحاجة لي مافيهاش تخنتيش بزاف ز الازلوان بزاف تلقاي تلقاي مع واش تلبسيها ... و هاذوك لي كتبتهوملك الفوق هاذوك قطع لازم يكونوا عندك و + ما يديموداوش ما تروحش كامل الموضة تاعهم ... و نهار تنوضي ما تلقايش واش تلبسي تلبسيهم ... خاطر يجوا مع كلش ... و دائما و غالبا Les Indispensables d’une Garde robe  يكونوا Basique  هكذا باش تمشيهم مع كلش ... بدون اشكال ... و يجوك شابين بدون ما تبذلي مجهود ... الوغ هاذي هي ...

الوغ البنات هاذ الموضوع ديروه شغل Échantillons    وتبعوا عليه لي راهي تحوس Des Indispensables  حاجات لي لازم يكونوا كاينين عندها .... انشاء الله نكون كنت خفيفة عليكم و نتلقاو انشاء الله في موضوع جديد من هاذ النوع ... اذا عجبكم الموضوع ما تنسوش تقولولي في كومنتار ... و لى ما عجبكمش قولولي أيضا ... نحبكم برشى برشى ... و ما تنساوش ديروا جام في لا باج فايسبوك و آبوني في الانستغرام و سنابشات  ... اتهلاو في رواحكم البنات 

.