♥ CONSEILS MODE N°1 ♥: S'habillé Selon Sa Morphologie

حباباتي السلام عليكم ... انشاء الله تكونوا يخير ... توحشتكم بزاف بزاف بزاف ...

الوغ اليوم جبتلكم موضوع جديد ... كانت طلباتوا مني وحدة في هاذوك الأسئلة لي طلبت منكم جاوبوني عليهم ... و قاتلي زيدي اهدرينا على اللبسة ... الوغ حبيت نهدرلكم على اللبسة ... و قل بلي ما نهدرش بزاف على مواضيع بخصوص La Mode  و هكذا صوالح ... و الحوايج و الصبابط مع العلم انني هذا واش نحب في حياتي ... الوغ قررت اليوم نديرلكم مواضيع بهاذ الخصوص ... و نبداو بوضوعنا اليوم لي هو كيفاش تلبسي على حساب La Taille  ولى كيما يوقولوا على حساب La Morphologie  تاك ... يعني اذا كنتي سمينة ولى رقيقة ولى عريضة من الفوق ولى من التحت ولى المهم ضرك نهدروا على كامل Les Morphologie  لي كاين ... هكذا باش يكون عندكم معلومات شاملة كي تروحوا تشروا حوايج واش رايحين تشريو ... و باش تشري حاجة تناسبك ماشي تشريها عريضة ولى ...

الوغ باختصار الموضوع ... راني رايحة نهدر على اشكال الجسم في الأول ... لازم تعرفي جسمك واش من الشكل هو ... من بعد راني رايحة نهدر على الحوايج لي يجوك على حساب جسمك و يجوك هايلين ... و الحوايج لي لازم تتجنبي تلبسيهم حتى ما تبانيش غريبة في لبسك ... أيضا رانا رايحين نتعلموا شوية خدع هكذا باش اذا شكل جسمك ما يعجبكش ... تقدري تخفيه باشياء بسيطة ... مفهوم ؟ ... ههه المهم ضرك تفهموا كلش التحت ↓ ... تبعوني مليح مليح ... موضوع مهم لكل البنات ...

الجسم على شكل 8:

يعنــي يكون La taille  تاع جسمكم من الفوق كيما من التحت يعني تكوني معمرى كيما من الفوق كيما من التح يعني ... و من جنابكم تكون La Taille  محددة يعني داخل ... و هاذي هي La Taille  لمليحة كامل ... اجي كيما رقم 8 .... علابيها سماوها La Morphologie sous forme de 8  ... كيما قلنا الفوق و التحت كيف كيف ...

هاذ الشكل يجي عليه كلش يعني كلش تاع كلش ... واش لبستي يجيك شباب ... خاطر كلش يجي عليك و على لا طاي تاعك يعني كامل Les Modèles  و كامل Les forme  تاع الحوايج مهمى كان المودال تاعوا ولى فصالتوا ولى ... المهم تقدري تلبسي واش تحبي ... انتي ما عندكش مشكل مع شكل جسمك

الجسم على شكل A  :

ويسموها أيضا الجسم على شكل مثلث ... يعني عريضة من التحت على الفوق ... يعني من الفوق عند كتاف صغار و كلش صغير ... على العكس من التحت عندك Les Hanches et les fesses   .... انا نسميها لاطاي لانجاصة ( الاجاص) .... يعني عريضة من التح على الفوق ...

و هاذ لا طاي هي و لي راهي جاية هي لي Normalement  نخموا فيهم على عكس الاخرين ... خاطر هاذوا هوما لي يكونوا شوية complexé  من La taille  تاعهم ... و يحسوا روحهم غير مرتاحين و  Géné  منها بزاف ... و في غالب الأحيان ما يعرفوش واش يلبسوا حوايج ... الوغ يلبسوا حاجا تزيد تبين بلي هوما سمان من التحت على الفوق ... و هاذ الشيء راكم رايحين تتجنبوه من خلال :

-         جربوا انكم تلبسوا حاجة شوية عريضة من الفوق و متلوقة ما تكونش لاصقة في لحمكم بزاف حتى ما تحددوش La taille  تاع من الفوق ... يعني جربوا تلبسوا تريكوات شوية عراض و بعدوا على الي يلصقوا في لحمكم بزاف بزاف

-         البسوا ولى اوضعوا Les Collier  هاذوك العراض و الكبار شوية ... لي راهم  à la mode  هكذا باش الأنظار تروح قبالة للجزء العلوي من جسمكم و ينسوا الجزء السفلي

-         البسوا Les foulard & les écharpes  ... كيما نقولوا حنا Les châles  في رقبتكم هذا أيضا راح يدير كيما السناسل العراض ... يجذب الأنظار للجزء العلوي

-         جربوا تلبسوا  Les vestes  و حاجات هكذا عندهم كتافهم واقفين يعني فيهم Les épaulettes هكذا باش يولي يبان الفوق كيما التحت ... و هاذ الشيء راح يساعدك   توفوقا بين الفوق و التحت

-         جربوا تلبسوا تريكوات مع شوية يديهم واقفين راكم شايفين هاذاك الي فيهم شرشيف في اليدين ... ولى à la mode  هاذ العام ... و مليح ليكم

-         جربوا تلبسوا سراول Droits  و مليح لوكان تتجنبوا Slim  خاطر هذا راح يزير على Les Hanches  و رايح يبينهم بزاف .... بحيث ما تقدريش حتى تخبيهم ... يعني جربوا ما تلبسوش سراول مزيرين هذا راح يجي ضدك

-         جربوا أيضا تلبسوا Les vestes  تاع Jean  و ثاني Les vestes en cuire  و كامل Les vestes  لي يجوا عراض ... كي نقول عريض بعني هوما يتلبسوا عراض ... ماشي تشري Taille  كبيرة عليك ... باش نوضوحلكم

-         كيما قتلكم ... البسوا Les hauts  ... عراض كاين بزاف Les pulles & les T-shirt  يجوا عراض ... يعني يتلبسوا عراض ... و انتم يجوكم شابين على واحد اخرين خاطر ببساطة La taille  تاعكم توالم لهاذ الشيء ...   الوغ جربوا تلبسوهم

-         أيضا Les Robes Bustier  ولى هاذوك لي يجوا Coupé  ولى هاذوك يجوكم بزاف هايلين خاطر راح يبرزكم من الفوق و من التحت تولوا ما تبانوش بلي عراض بزاف من التحت و هذا هو المطلوب ...

-         أيضا تقدروا تلبسوا Les hauts  لي فيهم   Les Motifs  

واش لازم تتجنبوا في اللبسة ؟

-         كل حاجة فيها السبتة Les ceinture  خاطر رايحين يحددوا La taille  تاعكم و تزيدوا تبانوا لا نجاصة ... هاذ الشيء اذا قدرتو تجنبوه

-         السراول لي عراض من الفوق و مزيرين من التحت ... خاطر كيف كيف رايحة بيني Les Hanches  تاعك

-         أيضا تجنبي   Les Hauts  لي مزيرين من الفوق و عراض من التحت ... ولى لي فيهم الجلِيَلْ ...

هذا ماكان باختصار  شك الجسم تاعك شوية حساس ... لوكان تزيري Les hanches  تاعك و تزيدي تزيري روحك من الفوق راح يعطيك شكل كيما تاع العادة و هذا حابين نتجنبوه الوغ شوفي مليح

اذا لبستي حاجة مزيرة من التحت مثلا لبستي Slim   لبسي من الفوق Hauts large ... كيما قتلكم كاين هوما يجو عراض ماشي بزاف  بزاف بح عراض  كيما Les t-shirts  و ثاني  Les chemisier  و هي من الأفضل تكون طويلة غطي كامل Les Hanches  تاعك …  هكذا راح تباني كيما La morphologie 8  ...

و كيما قلنا تجنبي كل حاجة تعرضك من التحت ... و ركزي على الحاكة لي تعرضك من الفوق ... Normalement  فهمتي ؟

 الجسم على شكل ▼ ولى كيما يسموها V :

يعني مثلث مقلوب ... و هاذي La morphologie  هي العكس تاع La Morphologie A  ... يعني يكون عند كتـــآف عـــــراض ... و الفوق كبير على التحت ... يعني واش تجنبنا في شكل لي سبق رانا رايحين تقريبا نتبعوه هنا ... خاطر ببساطة هنا رانا حابين نغطوا من الفوق و نبينوا التحت ... حتى ولي عندنا شكل متوازن بين الفوق و التحت ... و رايحين تتحصلو على مظهر مرغوب فيه من خلال :

-         تتجنبوا حاجة في الكتاف واقفين كيما Les vesttes classique  ل فيهم Les épaulettes  ... خاطر الله يبارك عند الكتاف واش تزيدي ؟

-         تجنبي Les robes Bustier et les Robes Coupé   خاطر مارحش يجوك شابين بزاف ... خاطر راح تباني عريضة من الفوق ...

-         البسي Les Robes et les Jupes  قصار شوية يعني يبانوا رجليك ... (هاذي في الاعراس و المناسبات خاصة ماشي الزنقة ) ... هكذا راح يبرز التحت على الفوق و هكذا ماراحش يردوا البال بلي انتي عريضة من الفوق

-         انتي بالعكس على البنات بالشكل مثلث تقدري تلبسي السراول العراض من الفوق و مزيرين من التحت خاطر هذا راح يعطيك Des Hanches  

-         تقدري تلبسي حاجة فيها السبتة   Les Ceintures خاطر هذا كيف كيف راح يعطيك Des Hanches  يعني حاجة فيها السيتة مليحة يليك

-         ثاني تقدري تلبسي Les jupes évasé  يعني العراض   ... هذا راح يساعدك بزاف

-         أيضا تقدري تلبسي Les hauts  لي مزيرين من الفوق و عراض يعني فيهم الجليل

يعني انتي تقدري تلبسي واش ما تقدرش تلبس مولات لا طلي مثلث ... يعني باختصار تجنبي الحاجة العريضة من الفوق و المزيرة من التحت ... و ركزي عى العريض من التحت و المزبر من الفوق ... هكذا بش تبان La Taille  تاعك متوازية ... هكذا باش تخفي كتافك العراض ...

الجسم بشكل H  :

هاذ الشكل يعني شغل عند La Taille  مستطيل ... كتافك جاين سوى سوى مع Les Hanches   تاعك ... و بالعكس عبى شكل 8 في جنابك ماشي محدد يعني داخل ... جاي نورمال مستقيم ... يعني ماشي داخل قبالة ... جاية مستطيل .... و هاذ الشكل يعني شوية ماشي صعيب خاطر بشوية عفايس نقدروا نعدلوا فيه ... يعني فهمتوا ... شكلكم هو باختصار الفوق و التحت نفس الشكل و La Taille  ماشي بزاف Marqué  من الوسك على عكس الشكل  8  ... و الحاجات لي يردوا الشكل تاعك مليح و متوازي هو نديروا Une Fausse taille  باش تولوا تبانوا كيما صحاب الشكل 8 من خلال ؟

-         البسي Les Ceintures  يعني مليح ليك ... باش تحددي لا طاي تاعك و تولي تبان 8

-         البسي أيضا Les Robes Droite  ... راح تباني بزاف فور فيهم ... و يجوك هايلين بزاف بزاف ... أيضا راح يعطيك طاي شابة

-         ايضا Taille Haute  يعني حاجة فيها Une taille haute  بزاف هايلين يجوك بزاف هايلين ... راح يعطيك Un Look    هايل ... و لا طاي تاعك رايحة تتعدل و هذا هو المطلوب

-         لازم تتجنبي كل حاجة تلسق في لحمك بزاف ... يعني ماراهيش رايحة تماركي لاطاي تاعك ...  يعني شغل ما درتي والوا اذا لبستي حاجة لاسقة فيك

باختصار La Morphologie  تاعك Non Marqué  من الوسط يعني كلشي متوازي فيك ... و باش تولي تباني عندك Une Morphologie 8  ... لازم تلبسي حاجة فيها السبتة Ceinture  و هكذا باش تتحدد و يولي عند  Un toure de taille  ماركي مليح ... لازم اذا لبستي حاجة من الفوق عريضة لبسي حاجة شوية مزيرة التحت ... و اذا لبستي حاجة مزيرة من الفوق ... البسي حاجة عريضة من التحت ... أيضا البسي Les Jupes  مع chemisier  و كامل يجوك  Top  

الجسم بشكل O  :

يعني انتي مدورة ماشي محسوب سيمنة بصح عندك Les Hanches  عندك يديك معمرين من الفوق معمر يعني مدورة ... و هاذ الشكل النصيحة هي ما تتخبايش تحت حوايجك ... يعني تلبسي حاجة كبيرة عليك كيما نقولو حنا شكارة ... و تولي تباني فيها كبيرة و سمينة صح ... الوغ البسي حاجة اجيك مليحة ماشي عريــــــــضة عليك ... انتي عريضة و تزيدي ... الوغ الحاجات لي يجوك ملاح هوما :

-         البسي Les Robes  و Les Combinaison  و أيضا Les Hauts  لي عندهم la forme chache cœur  ... رايحين يجوك يهبلوا خاصة و انتي معمرة رايحين يجوك شابين على اشكال الجسم الأخرى ... و رايحين يخلوا لاطاي تاعك هايلة ...

-         أيضا كيما La Morphologie H  قتلهم  Marqué votre taille  ... انتم ثاني ماراكوا لاطاي تاعكم ... ب Une Ceinture  ... و لى لبسوا حاجة نورمال مع Jupe évasé  ... ولى مع سروال عريض من الفوق و مزير من التحت ... و هكذا راح تبان لطاي تاعكم مليح  

-         أيضا انتم ثاني La taille Haute   رايحة اجيكم هبال

-         أيضا ما تلبسوش Les Hauts décolté & sans manche  ولى a bretelle  خاصة اذا كنتي تحشمي من يديك المعمرين ... خاطر هاذوا رايحين يخلوا يديكم يبانوا سمان اكثر ... بالعكس اللبسوا Des Hauts  فيهم شوية يدين قصار ولى هكذا مايبانوش يديكم بزاف بزاف

-         كيما قتلكم قبل البسوا Les Veste et les Manteau  فيهم La Ceinture  راح يجيكم هايلين

-         أيضا سراول عراض هاذوك Sport  و  هاذوك الخفاف تاع الصيف يجوك هايلين ثاني

-         ما تلبسيش ال Mini  خاصة Les Robes Mini  مزيرين على اللحم عاذا ماراحش يجيك شباب خاصة و انوا رجليك معمرين راح يعطيك شكل ماشي شباب

-         و ما تلبسيش حاجة عريضة عليك بزاف

يعني هاذي هي دائما البسي حاجاة اجيك مليحة ... خاصة النورما من الفوق و العريض من التحت ... و أيضا البسي حاجة تبين لاطاي تاعك ماشي لازم تتخباي خاطر تعتبري نفسك سمينة ... و هاذ الشيء ماشي عيب والله و كاين بزاف حاجات يجوك شابين

وصلنا للنهاية الموضوع لي عندي ساعتين و انا نكتب فيه ههه ... انشاء الله يكون فادكم و استفدتوا تعرفوا رواحكم مليح مليح و واش لي يجيكم اكثر شباب ولي يناسب La Morphologie    تاعك  ... و كيما يقولوا عينك هي ميزانك ... و هاذ الموضوع يعني ماشي لازم تلتزموا بيهم حرفيا ... يعني و مهمى كان شكلك و كيفاش دايرة انتي شابة كبما راكي ... و الشيء اللازم في هاذ الموضوع يعني الحاجة الأهم ... البسي الحاجة لي تريحك ... يعني الي تلبسيها و تحسي روحك فيها راكي مرتـــــآحة هذا هو الأهم في كل الموضوع ... و هاذ الأشياء لي مدتهوملكم برك باش تعرفوا واش يناسبكم اكثر ... و خاصة زعمى عندك عرس ولى مناسبة ... راكم تعرفوا اللبسة تكون خفيفة على الي مضاري تلبسيها الوغ La taille  تاعك راهي رايحة تبان اكثر من أي يوم آخر ... يعني لازم تعرفي واش لي يناسبك اكثر و يرد على La Morphlogie  تاعك ...

 ملاحظة : لازم كي نقول Ceinture  تفهمو بلي ماشي السبتة تاع السروال ... هاذوك Les ceinturs  لي يجواا في Les Robes  ولى Les Liquettes  ولى ماعلباليش لي يجوا في المعاطف و كامل  تاع الشباح ... هاذوك عندهم تاثير كبير بزاف على La Morphologie  تاعكم ... يعني اذا نتوما شكل A  وشريتوا حاجة فيها سبتة مليح لكان تنحوها ولى اديروها مرخية و شوية طايحة ... و الخ بالنسبة لخرين

في الأخير نقولكم انشاء الله تكونوا خديتوا فكرة عامة على La Morphologie  تاعكم شكون هي بالضبط ... و اذا عجبكم الموضوع قولولي في كومنتار ( تقدروا تحطوا كمونتار كامل خاطر بلى تسجيل ) .... اذا حابين نزيدوا مواضيع هكذا قولولي كيف كيف ... نلتقي في موضوع آخر ... و انا عجبتني فكرة المواضيع على La Mode  خاطر ما نديرش منهم بزاف ههه ... اوغ قولولي رايكم ... و تقدروا تطرحوا عليا أسئلة عبر E-mail  في البواطة هاذي لي راهي على اليمين ( وين مكتوب اطرحي سؤالك هنا ) ... و ما تنساوش اديروا جام في لاباج فايسبوك و تابعوني في الانستغرام ... اتهلاو في رواحكم الشبات تاعي نحبكم بزاف بزاف ... 

.