♥ CONSEILS BEAUTÉ N°5 ♥ : Conseils Spécial été

ســــلام البنات ... انشاء الله تكونوا ملاح .... و رمضان ما بداش يغلبكم ههه ... اليوم جبتلكم موضوع يهمكم بزاف ... قرب العيد و قرب الصيف ههه علبالي بلي رانا فيه بصح ماراناش مستغلينوا و اغلبيتنا رانا في الدار ... و الاعراس ...

الوغ راني جبتلكم موضوع على نصائح للصيف ... الشمس الي تحرق ... و الجفاف و البشرة تاعكم تنظر ... الوغ جبتلكم موضوع على حاجات لازم اديروها ... باش تحموا نفسكم في الصيف و تبقاو متالقـــــين دائما

1-     لازم تحطي واقي من الشمس Un écran total   ... ما تقولوليش انا مانديرش ماكياج و ما نحبش ... و ماعلباليش ... هذا ماشي ماكياج هاذي اول حاجة .... خاطر كالشمس تحرق ... و تحرقلك وجهك ... و من هنا يولي عند عدم توحد لون البشرة ... و البقع في الوجه ... و النمش ... و لي عندها يزيدولها ... و لي بشرتها جافة تزيد ... و لي بشرتها زيتية تتأثر بزاف ... الوغ ديروا واقي من الشمس قبل ما تخرجوا من الدار ... حتى تحموا وجهكم من الشمس ... الوغ كاين Fond de teint   و في نفس الوقت يحمي من الشمس و كاين Bb crème  كيف كيف ... و كاين وحدوا ... و لي عندها ماركة مليحة تحطها في كومنتار باش البنات يستفادوا ... الوغ هاذي اول قاعدة ... لي لازم طبقوها احموا البشرة تاعكم ... خاصة كي تروحوا البحر ... ديروا قبل ما تعوموا و بعد ما تعوموا ... هكذا تحموا البشرة تاعكم و ما تتقشرش من الشمس و الملح في البحر

2-     شعركم ... بالاك هاذ الحاجة انتم ما تردولهاش البال ... بصح كي تلايموا شعركم كامل الى الوراء يعني اديروا طومايشة و لى Queue De Cheval  و تخرجوا و دائما دائما اديروها ... هذا راح يحرق شعركم بزاف ... خاطر تردوه للوراء دائما تضربوا الشمس في نفس المكان ... منبعد من القدام راح يفسدلكم شعركم اكثر من بلاصة وحد أخرى ... انا نعاني من هاذ المشكل ... الوغ النصيحة تاعي ... بدلوا المشطة يعني حاولوا ... مثلا مرة اتلقيه مرة لايميه و هي رايحة هكذا باش ما ضريهش بالشمس ... انشاء الله تكونوا فهمتوني في هاذ النقطة .

3-     عندي Astuce  كنت دائما نستعملها كي نلبس ال Babouche  ولى حاجة محلولة في الصيف ... كانت عندي Crème de Corps  تاع oriflamme  المهم ... كنت نديرها في رجلي من الفوق ... هكذا باش ما نبروزيش من رجلي ... شفتوا كي تنحوا البابوش كيفاش تبقى رجلكم عجب ؟ ... هاذي هي لي رانا حابين نتجنبوه من خلال هاذ الطريقة ... الوغ أي كريم عندكم ما عادا ال VASLINE  ... ديروها مكانش لي شافكم ولى فاقلكم هكذا باش ما تبقاش رجلكم نص بيضة و نص كحلة ... خاصة اذا تخرجي بزاف

4-     ال Astuce  لي فاتت تنطبق على هاذي أيضا ... هاذي حاجة تدفعك اديري واقي من الشمس ... اذا انت متحجبة ... كي ديري خمار كيف كيف ... تبرونزي هه و يبقى نص وجهك بيض و الاخر كحل ... شيء عادي الشمس تحرق في الصيف و السخانة ... الوغ كي ديري واقي من الشمس في وجهكم هذا يبعدكم على هاذ الحاجة

5-     جربوا انكم ترطبوا كامل جسمكم في الصيف ... هاذ الشيء راح يفيد بشرتكم في الصيف

6-     البنات لي رايحين يديروا Deffrisage  ... اجتنبوا خاصة اذا تروحو للبحر ... هذا راح يحرقلكم شعركم ... انا الحفافة قاتلي هاذ المعلومة ... أصلا البحر الملح+ شمس يفسد الشعر ... الوغ تزيدوا ال Deffrisage  هذا رايح يفسدلكم شعركم ... خاطر شعركم يكون شوية حساس من ال Deffrisage  ... خلوه كي تحبسوا البحر ... و لي داروه ... اصبروا ياربي واحد الشهر هكذاك ... ( الوقاية خير من العلاج ) ... بالنسبة لل Kératine  ما علباليش ... المهم لي عندها معلومة تنفي هاذي تقولهالي في كومنتار ... يعني تكون مجربة ... انا راني قتلكم شعركم ينحرق ... يعني كامل واش عدلتوا فيه يروح

7-     كيما قتلكم في الي قبل ... شعركم ( بالنسبة لكامل ماشي غير لي داروا Defrisage  ) .... ماء مالح + شمس ... يفسد الشعر ... الوغ جربوا مور ما دوشوا ... انكم تغسلوه مليح ... و تستعملوا Les masques & les après Shampoing  ... و الزيوت أيضا لي يحبوا يدورهم ... باش ترطبوا شعركم و تحموه

الوغ هاذو هوا النصائح تاع اليوم ... انشاء الله يكونوا فادوكم ... و انشاء الله راح يكون كاين موضوع ثاني على النصائح ... وي عندها نصيحة كيف كيف تحطها في كومنتار ولى تبعثها في لا باج فايسبوك ... ما تنسوش ديروا جام في لا باج فايسبوك ... و Abonnée  في الانستغرام و تابعوني في السنابشات.

شكرا لي قريتوا الموضوع حتى هنا ... نتلقاو في موضوع جديد انشاء الله ... اتهلاو في رواحكم مدموزال تحبــــــــــــــكم

.