♥ REVUE N°4 ♥ : Mascara Wonder Lash de Oriflame + Le Recourbe-cile

ســـلام البنات ... انشاء الله تكونو كامل بخير

اليوم جبتلكم Une Nouvelle revu  على Les Produits oriflame  ... كاين بزاف راهم جايــين ... نبداو واحد بواحد ... اليوم حبيت نبدى بالحاجة لي نستعملها دائما ... المرة لي فاتت درتلكم على La bb crème    الجديـدة نخليلكم التحت Le Lien  باش شوفوها ... اليــــوم على حبيــــــــــبتي الماسكــــــآرا لي نحبـــها بزاف و على ال recourbe-cile

نبداو بال Mascara  :

آسمها Mascara wonder lash  ... تاع Oriflam  ... السعر تاعها 800 دج هكذاك ... يعني على حساب البائع لي يبيعلكم

 الحاجة المليحة فيها هاذ الماسكارا هي انوا  ... اذا ما عندكش الرموش ... يولي عندك انشاء الله ... خاطر طلعلك رموشك مليح مليح ... و الله هايلة بزاف بزاف ... يوليو رموشك طالعين مليح و احنى هذا واش نحوسوا كي نديرو الماسكارا سايداتي ...

هي WaterProof  موحال اطيحلك لوكان ماشي انتي تخلطي فيها ... لا دموع لا ماء لا والوا ...

 انا نديرها كي نروح للجــــآمعة يعني من 9 تاع الصباح ... حتى الربعة ولى شحال ... ما طيحلي ما والوا تبقى هي هي ... و رموشي طالعين .

البروصة تاعها ما طويلة ما قصيرة بزاف يعني مليحة توالم الرموش الطوال و القصار و تجبهم مليح .

يعني ماكانش واش نطول الهدرة في الماسكارا ... بزاف ... خاطر يعني يا مليحة يا والوا ... و انا قتلكم ... بلي طلعلكم رموشكم ... و تبقى مدة طويلة

حاجة مليحة هي انوا عندها عام و هي عندي و مازال ما خلاصتش ... يعني تشريها تشدلك بزاف ... ما تخلاصش بلخف ... يعني تشد بزاف

راكم شوفوا يعني راهم كاينين زوج في La Photo  ... كاين زوج وحدة ال Packaging  تاعه خضر و الأخرى كحل ... يعني انا لي عندي و راني درتلكم Revu  عليها هي الي ال Packaging  تاعها خضر ... خاطر الأخرى Photocopie  تاع هاذي كلش كيف كيف ... ما عادا حاجة وحدة هي انوا الكحلة ماشي Waterproof  ... شوية دموع اطيح و تسيح ... تحكي عينك تتحلحل ... يعني ماشي مليحة ... و راهم نحاوها من ال Catalogue  راهي كاينة غير الخضرة ضرك ... بصح حبيت نهدر عليها ... خاطر كاين لي راهم يبيعوها قادرين تتلقاو ليها يعني ... اذا تلاقيتوا بيها ما تشروهاش ... ادير واقيل 600 دج ... يعني انتم خذوا حذركم .

ضرك نهدروا على ال Recourbe-cile  ... قبل ما نشري هاذ الشيء ههه ما علاباليش كيفاش كنت هههه ...  كيما أي Recourbe-cile  يجبد الرموش مليح مليح ... و يطلعهم كامل واش كاين ... اول مرة نستعملوا ... في الأول خفتوا يعني ... بثح منبعد تعودت عليه .

ال Recourbe-cile  تاعهم مليح و الله ... و كي تشريه يجي معاه وحدة زيادة باش تبديلها كي تخسرلك ... ساهل للاستعمال انا اول مرة نستعملوا و جاني نورمال

نهار لي ما نكنش في المورال و ما نحبش ندير ماسكارا ... نديروا و نروح يطلعوا زين بلى ماسكارا ... و ساعات كي نحب نزيد فيهم شوية ههه نطلعهم بيه منبعد نزيد الماسكارا .

السعر  تاعوا 290 دج .

هذا كان موضوع تاع اليوم غدا انشاء الله نهدروا على حاجة واحد أخرى ... شكرا لي قريتوا الموضوع ما تنسوش اديروا جام في لاباج و آبوني في الانستغرام تاعي ... و تابعوني على السنابشات في  نحبكم بزاف حنوناتي 

.