♥ REVUE N°6 ♥ : Ecran Teinté Protections Extrême De Chez Venus { Made In Algéria }

ســلام البنات ... كي نقولكم هاذ المرة بلي توحشت نكتبلكم صح توحشت ... انشاء الله تكونوا كامل بخير و على خير ... الحمد الله على كل حال .

اليوم جبتلكم Revu  على une marque  جزائرية ... لي كنت من بكري حابة نجربها ... Malgré  جربتها في La Crème Dépilatoire  لي عجبتني و هدرتلكم عليها من قبل في موضوع Cocooning  و بزاف حاجات المهم ... هاذ المرة كنت حابة نجرب حاجات كيما Les Crèmes  ... و كي رحت Famili Shop  في البليدة طجت على هاذ La Crème  الوغ قلت لازم نجربها و نشوف ... خاصة انوا شفت في La Page  تاع Beauté avec Bessma  هدرت علها قلت نجربها ... و جبتها نجربها ... يعني No Partenariat  ... شريتها ♥  

واش  هاذ La Crème  ؟

هاذي Un Ecran Teinté Protection Extrême  كريمة اقصى حماية ... كيما راه مكتوب ... و أيضا  Prévente Le Vieillissement et Hydratante  يعني تحمي من اثار تقدم في السن ههه اذا ترجمت مليح و ترطب ... و هي مجربة تحت اشراف أطباء الجلد Testé Sous Contrôle Dermatologique  .

باختصار هاذ الكريم هي كريم مضادة للشمس في مرتبة الأولى Spf 60  ... و أيضا مرطبة للبشرة ... و تحمي من اثار التقدم في السن .

وصف هاذ La Crème  

كي شوفو جاية في علبة ماشي كبيرة بزاف ... كي تلوها تلقاو Tube  كيما راكم شوفو صغير ماشي بزاف يعني مليح ... و أيضا الحاجة لي جامي شفتها في Les Crèmes  لي مضاري نشريهم فيها Notice  الداخل ... تلقاو فيها بزاف معلومات ... تعليمات فعالية المنتوج و الخ .

و العلبة تاع 50 مل ... و هي 100 بال 100 جزائرية

واش توعدكم هاذ La Crème  ؟

-         ضمان حماية من الاشعة القوية للبشرة الحساسة

-         حماية متعددة للخلايا الجلدية

-         تغذي و تلطف البشرة و تنعم البشرة

راي تاعي في هاذ ال Crème  ؟

في الأول يعني ترددت ناخذها وى لالا ... يعني ما حبيتش نخلط في البشرة تاعي بزاف ... و خاصة لاني راضية على Bb Crème de Oriflame  ... مي قلت نجربها ... و نبدل شوية و منها نهدرلكم على منتوجات جزائرية .

جربتها من نهار شريتها عندي أسبوعين ... و والله هايـــــلة ... تحمي صح من الشمس .

كنت كي ندير حاجة في وجهي حتى Bb Crème  هي تحميني بصح كي ندخل للدار ... نلقة وجهي كحل شوية ... بصح مع هاذي و الله وجهي كيما ندخل كيما نخرج ... ما يكحاليش من الشمس .

جربتها نهار رحت للبحر ... درتها قبل ما نروح ... وليت بطبيعة الحال انا تاثر بزاف ههه و برونزيت ما نقلكمش ما برونزيتش ... بعد ما دوشت درتها و رقدت ... نضت لقيت وجهي صح بدى يصفالي من الحمورية ... و زدت درتها ... و الله في نهار وجهي صفى و ولى ماشي حمر ... في نهار واحد .

الوع الحماية من الشمس : ماكدة .

بالنسبة للترطيب ... غير تحطوها في وجهكم تحسوا بالنعومة ... و بلي وجهكم راه حيوي يعني و كي تمسوه تحسو بالنعومة صح ... الترطيب ترطب مليح مليح

الوغ الترطيب و النعومة : ماكدة .

قالوا في ال Packaging  بلي لا تزول بالماء ... و شفافة ... و غير دهنية .

مشكل صحاب البشرة الدهنية دئما تسقسوا سؤال ... ماعندهاش L’effet Gras  في الوجه ؟ انا عندي نفس نوع البشرة ... و نقولكم بلي ما  تزيدلكم الدهون في وجهكم ... هاذي ناكدها ... ترطبلكم البشرة برك .

و شفافة يعني ما تبانوش بلي راكم دايرين حاجة في وجهكم .

و لا تزول بالماء ... انا ما لاحظتش هاذ الشيء يعني ما نقدرش ناكدلكم هاذي ... بصح نظن انوا ما تروحش بالماء ... انتم جربوا شوية في يدكم و قولولي .

ملاحظة هاذي ما ديروش كيما انا قريب درت غلطت حياتي ههه ما انتبهتش لهاذ الشيء ... كنت تعبانة رفدت و خلاص ... هاذي توريلكم Les teinte  ... مزية انا جبت وحدة Claire  ههه ما لوكان راني حصلت بيها ... الوغ انتبهوا لهاذ التفصيل .

أيضا كاينة écran Total  يعني ماشي Teinté  ... هي نفس هاذي برك انا لي جبتها فيها اللون و الأخرى لا لا ... بصح كيف كيف ... خاطر شفت مليح قبل ما نجيب .

ملي شريتها وا انا نستعملها غير هي ... يعني حبيتها خاصة انها تحمي و ساهلة باش تمشيها في وجهك في دقيقة ... يعني هايلة بزاف ... انا صراحة عجبتني و بزاف .... و نتمنى تعجبكم انتم أيضا ... ولي جربها ما تنسوش تقولولي رايكم فيها حتى لي جربوها من قبل ... و بعثولي ميساجات هكذا باش نشاركها مع الاخرين .

السعر تاعها : 290 دج

بصراحة انا نفضل دعم المنتوج الجزائري خاطر صح راه في تحسن من حيث كلش ... و النوعية و هاذي الحجة الثانية لي راني نجربها من La Marque Venus  و راني صح راضية على هاذ La Marque  و راني حابة نزيد نجربها ... يعني الدعم للمنتوج الجزائري مليح ... ديروا الثقة في هاذ La Marque  ... كي نزيد نلقى منتوجات محليين هايلين ننصحكم بيهم .

وصلنا للنهاية مع الأسف ... انشاء الله يكون عجبكم الموضوع ... ما تنسوش تطرحوا عليا اسئلتكم ... و تشاركو الموضوع مع صحباتكم و حباباتكم ... و تخلولي رايكم اذا عجبكم ولى ما عجبكمش ... و قولولي واش جربتوا من عند La Marque venus  و عجبكم ... نجبكم بزاف حنوناتي ... و نتلقاو في موضوع آخر انشاء الله ... اذا وصلتي لهاذ الحد اكتبيلي Fraise  في كومنتار ( كامل يقدروا يكتبوا كومنتار هنا ) ... ما تنسوش تايعوني على Instagram snapchat twitter  ... و تضغطوا على J’aime  ولى Je n’aime pas  ... نحــــــــــــــــــبكم 

.