ســلام البنات انشاء الله تكونوا بخيــر ... وحشتكم بزاف ... و اليوم لقيت شوية وقت فراغ قلت نكتبلكم فيه هاذ الموضوع القصير ... ستمحوني على هاذ الغيبة علبالي ... بصح مع العودة تاع La Boutique كيما عاودت فتحت Les Commandes راني شوية مشغولة خاصة و انوا راه الان 48 ولاية ... الوغ ههه ما نحكيبكمش حياتي لي حابين يشوفوها يروحو في الشريط هاذاك تلقاو Ma Boutique اضغطوا عليها تروحوا مباشرة .
الوغ اليوم نهدروا على حاجة مليحة بزاف ... لي هي Detox Water ... اليوم نتعرفوا عليه مليح .
واش هو ال Detox Water ؟
كيما راكم شوفوا آسموا Detox ... يعني Détoxications يعني مزيل السموم ... و WATER هو الماء كيما علبالكم .
الوغ هاذ الماء ينحي السموم من الجسم ... يطهرها من كامل السموم ... و بالتالي هو مفيد بزاف للصحة تاعكم ... خاصة لي ياكلوا ماكلة غير صحية ... يعني ماكلة تع Les Fast Food بالإضافة الى Les chips les chocolats وهاذ الحاجات كيما علبالكم مضرة للصحة و معمرة بالسموم ... ماشي سموم السم القاتل هه راكم فاهمين واشن ... الوغ هاذ الماء يزيل و يطهر كامل السموم من الجسم .
كيف نحظر Detox-water ؟
انا في الحقيقة راني نستخدم وصفة وحدة برك ... لي هي نقطع القارص ( الليمون ) الى دوائر و نديروا في القرعة هاذي ... يعني انا استخدمت حبات صغار من القارص ... من بعد نظيفلوا الماء و نديروا في الثلاجة يبرد .
هي المدة 8ساعات ... باش القارص يتلق الماء تاعوا في الماء لي ظفتوه .
انا نديروا في الليل كي نوض صباح نقاه واجد ... و بارد ... و هاذ القرعة نديرها نص ... هاذي فيها 50سل ... انا ندير تقريبا 25سل .
الذوف تاعوا شوية حاد ... بصح غير تشربوه تحسوا بالانتعاش ... مع انوا الذوق تاعوا قارص ههه ... انا شوية ما يعجبنيش الذوق يعجبني الخدمة ههه .
ماديروش السكر ... خاطر لوكان ديروا السكر يولي عصير الليمون ماشي Detox ... و هكذاك ما يخدمش خدمتوا .
تقدروا تستعملوا أي نوع من الفاكهة لي تحبوها ... تقطروا تخلطوا ... كيا تحبوا ... انتم جربوا و ذوق لي عجبكم ... خاطر هاذ الشيء اذواق يعني .
مثلا القارص تقدروا نزيدولوا اطراف خيار و نعناع ... أيضا مليح مازال ما جربتوش هاذي .
الو ديروا أي فاكهة تحبوها في قرعة ولى كاس زيدولها الماء و خلوها تطلق روحا في هاذاك الماء و اشربوها .
كيفاش تعرفي بلي راه يخدم فيك ؟
هاذ الفقرة شوية يعني ماشي مضاري نهدر هكذا هههه بصح الطبيعة و هاذي هي لصحتكم ... كيفاش تعرفي اذا راه يخدم ... شفتها في Dr.Oz والله ... قالك كي السموم يخرجو من جسمكم ... شوفوا الفضلات تاعكم تكون لونها اصفر و تطفوا ... و كي تاكلوا ماكلة غير صحية ... يكون العكس ... الوغ نتوما راقبوا رواحكم ... هاذي هي ... عذرا مرة أخرى ... ههه تعرفوني نهدر باش نفيدكم ... الوغ هاذي هي الطريقة الوحيدة باش تعرفوا .
و صدقوني ينقي الجسم بشكل جيد .
وقتاش نشربواه ؟
تشربيه الصبح ... ماشي على معدة فارغة ... خاطر توليلك حاجو وحد أخرى ... بصح مور ما تشربي قهوة تاع الصباح اشربيه .
كيما تقدري تشربيه كل يوم كيما تقدري تشربيه نهار بنهار يومين بنهار ... كيما تحبي هاذ الشيء يرجع ليك .
مليح لصحاب الرجيم ولى لا ؟
هاذي ما نقدرش ناكدلكم بصح يقولوا مليح للرجيم ... و ماعلباليش زيدوا ابحثوا .
هذا هو الموضوع تاع اليوم وهاذا هو ال Detox-Water راكم كامل تعرفوه ضرك ... و لي تعرفوا من قبل قولنا رايها فيه ... و تقولي كاش وصفة تاعوا كيف كيف ... انشاء الله يكون فادكم الموضوع تاع اليوم ... و ما تنسوش تطرحوا الأسئلة تاعكم عليا في البواطة لي راهي على اليمين ولى في الفايسبوك ولى وين حبيتوا ... اذا يعجبوكم مواضيع كيما هاذوا عن الاكلات الصحية و غيروا قولولي في كومنتار .
اتهلاو في رواحكم و ما تنسوش تابعوني في الانستغرام سنابشات و تويتر على
و ديروا جام في لاباج فايسبوك اذا مازال ما درتوش ... نحبكم بزاف حنوناتي اتهلاو
.
Commentaires
Enregistrer un commentaire
Commentaires