♥ SCHOOL CONSEILS N°5 ♥ : Conseils Pour Les Nouvelles Etudiante

ســلام البنــــآت انشاء الله تكونوا كامل بخــــير ... و على خير و الحمد الله على كل حـــآل .

اليوم جيـــت بموضوع جديد من السلسلة Back To School  و هـآذ المرة موضوع خاص بالبنات لي رايحين للجامــعة ولى راهم في الجامعــة ... الوغ هاذ الموضوع خاص بيكم راكم رايحين شوفوا بزاف مـــعلومات حول بزاف حاجات ... علبالي عندكم بزاف و انتم تسناو فيه ... رانا رايحـــين نديروا نصائج متونعة كيمى كل مرة .

أولا نبداو بالادوات المدرسية لي تحـــتاجوها :

نبداو بالكـــراريس ؟ واش نشري كراس ؟

انا لمى طلــعت للجامعة اول مرة يعني حرت واش ندي معايا خاصة فاش نكتب ... اول حاجة ايدت Les Feuille libre  تاع ال Classeur  وشريت Un porte doccument  تاع 17 على حساب ماشفيت 17 ولى 14 Pochette  هاذوك الشفافين و كل مقياس ( Module  ) دايراتوا في وحدة منهم يعني ماشي كل ورقة بورقة كل مقياس لايمتوا في Pochette  وحـدة ...  ... الدروس مع السلاسل و هكذا .

بصح هاذ الطريقة ما خرجتش عليا ... هي صح مليحة و كامل بصح الورق يبقاو هكذا مزربعين ... ولى لازم الوررق نبقى نشري و ساعات ننسى ... و اذا درت Porte document  تاع 200 يجيني ثقيل بزاف .. و انا حابة نقص على روحي ... الوغ الصغبر كامل عاوني بصح فيه الخدمة بزاف .

في السداسي الثاني ... بديت نستعـــمل هاذ ال Registre  ولى Cahier  ولى كيفاه يسموه ... يجي مقســـوم 5 في 1 كيما راه مكتوب ... و هـــــآيل يلايملي كامل المقايــيس Les Modules  في كراس واحــد ... و يكفيني عام كامل ... و الغلاف تاعوا من البلاستيك يعني ما يتعوجش ... و أيضا صـــآكي خفيف و كي نحب نحوس نلقى كلش في كراس واحد رحمة ربي... و الورقة فيه نقسمها على 2 كيما راكم اشوفوا ... و نكتب من و من يعني نربح 2 في 1 في كل ورقة هكذا يكفيـــني و يفيض .

ولى تقدروا تشروا Registre  عادي كيما مضاري ماشي شرط 5 Mains  ولى بير اشروا 2 Mains  يكفيكم ... و اقسمـــوه ... و اقسموا الورقة على 2 كيما وريتلكم ضرك و اكتبوا و يكفيكم و اشوفوا .

 و اذا حبيتوا تلايموا المحاظرات مع الاعمال الموجهة Cours + TD  ... اشروه 4 Mains  و يكفيكم و اقسموه .

خاطر كي تقسموا ورقت ال Registre  على 2 راح تربحوا بزاف ورق في الكراس تاعكم و كذلك تلايموا عام كامل في كراس واحد .

يعني واحج ما يحاسبكم على كيفاش تستعملي كراسك ... انت حرة الأستاذ ما يحاسبكش عليه ماشي كيما في الليسي كيما تحبي ديري . 

واش ندي في مقلمتي ؟  

سيالة زرقة و سوداء و Les Markeurs  كيما راه في الصـــورة ... و شوية سيالات تاع الألوان بصح مانستعملهمش بزاف ... و حاجة نسطر بيها و قلم و ممحة .

هاذ Les Stabilo Bosse  هوما الأفضل راهم عندي من الباك و مازال ما خلاصوش و الله ... انا و راني دهشانة فيهم ... هايليــــن بزاف بزاف ... نستعملهم باش نلون العناوين كيما قتلكم هاذاك النهار ... و الحاجات المهمة ... يعني نكتب بالاسود العناوين و نلون بيهم هكذا باش نشوفهم مليح و كيف كيف الجمل المهمة ... ننصكم بهاذ الألوان خاطر غير هي لي تبين مليح الباقي يغموا الكتــبة و تولي ما شوفي والوا واش راكي كاتبة تحــــتوا .

ثانيا واش ندي معايا في صــــآكي ؟

من غير الأدوات تاع القراية ... عندي Une Trousse  فيها :

-         Les Lingettes  هاذوك الصغــــآر تاع 30 دج ريحتهم هايلة ما عنجيش صورة

-         معقم لليدين Désinfectant لي هدرت عليه ذاك النهار ( لي حابة شوف تدخل هنا ← )

-         و وحدة من هاذ العطور الصغيرة ... تخـــلي رائحة هايلة في الصاك و فيك .

-         في بعض الأحيان ... نقطع شوية Essuis Tout  و ندي معايا ... خاطر ينفعني كي كاش ما يدفق عليا ولى هاذي دنيا .

كيفية المراجعة و كيـــفاش تنظمـــي وقتك ؟

ما نكذبش عليكم هاذي شوية واعــرة لازم نديلكم موضوع خاص بهاذ الحاجة ... خاطر لحد الان ما قدرتش نظــم وقتي ... بصح انا عندي طريقة وحدة نقدر نراجع بيها ولى نكتب واش عندي ... هي انوا كي نجي من الجامعة مبشرة نشرب القهوة و نبدل حوايجي و مباشرة دوزاني ... خاطر اذا حطي تراصي على المخدوم وحال انوض منها ... هاذي هي الطريقة الوحيدة ... و لي حابة اشوف L’article Getting Unready  تضغط على هاذ القلوب راني كابة فيه بزاف حاجات على كي ندخل من الجامعة .

هاذي هي الحاجة الوحيدة لي نقدر ننصـــحكم بيها حول المراجعــــة و تنظيـــم الوقت ... و لازم كي تنظـــمي وقتك ... لازم اديري القراية هي اول حاجة اديريها ... منبـــعد ديري أي حاجة وحد خرى .... هكذا اذا تعبتي و غلبك النعاس تكوني كملتي القراية .

الوغ هاذوا هوما النقــــآط و الحاجات الـــي كنت حابة نهدرلكم عليها ... و لي قادرة تفيدكم في حياتكم الدراسية يعني الحاجات لي تسحـقوها و لازم تاخذوها بعين الاعتبار .

الان نمدلكم بعض النصائح لي لازم تعرفوها ... يعني بالاك ماكانش لي راه رايح يقولهالكم .

-         لازم تقراي خاطر اذا ما قريتيش ماكانش لي راه رايح يساعدك في الدراسة لازم تحـــطي راسك ... خاطر بزاف لي رايحين يجبدوا عليك و يولوا نفسي نفسي يالوكان تخدمي على 10 .

-         الأساتذة في الجامعة و في الثانوية ماشي كيف كيف ... الأساتذة في الجامعة ما يداسروش يعني ما تقدريش تضحكي معاهم ولى تتمسخري معاهم يعني اقل حاجة ... يقولك ارفدي دوزانك و روحي ... و اذا قالولك هكذا اخرجي في هدوء عادي جدا ... ما تكثريش الهدرة خاطر ينحيلك La Carte  و مجلس تاديبي حتى ولو هو غالط ماكانش لي يدافع عليك و يعطيك الحق ... الأستاذ في الجامعة حاسب روحوا حاجة كبيرة .

-         الأصدقاء تاعك راح يبقى منهم شوية برك ... يعنــــي لي يقراو معاك 50 بالمئة منهم ... راح يتبدلوا و يتغيروا عليــــك ... يعني ماراحش يستعرفوا بيك و يعاونوك الا من رحم ربي .

-         الأصدقاء الجدد يعني لي يقراو معــــآك ... أصدقاء دراسة فقـــط ... فقط راني نقول يعني مديلي الدروس مديلي الكراس هذا ماكان ... حاجة وحد أخرى يعني نروحوا منا ولة مانى ... و لى تحكيلهم حياتك و اسرارك ... حاجة بالاكي اديريها ... بالاكي نسطر بيها خط اخمر ... اكتفي بصحباتك القدم .... و اذا ما عندكش غيـــــــر اخطيك من صحبات الجامعى خاصة اذا تقراي في جامعة كبيرة ... بالاكي خاطر رايحة تندمي ... بزاف بنات حشاوهلهم هاذو البنات من الجامعة ... ما ديري ثقة في حتى وحدة .

-         لازم تحطــــي راصك في القراية و بس و العشق و الغرام في الجامعة اذا راكي متخيلة بلي راه ناوي ال Sérieux   و كامل تكوني تحــلمي ... الوغ غير اخطيك انا نقولك .

هاذوا هوما النضائح يعني لي قدرت نتذكرهم و نلايمهم ليكم ... يعني حلوا عينيكم ... و لي عندها حكاية صراتلها ولى سمعت بيها ... ولى حابة تشارك البنات الجدد في الجامعة بنصيحة تكتبها في كومنتار ... ولى تدخل في ال Groupe  و تحطهالهم ... هنا ←

وصلنا للنهاية موضوع اليوم انشاء الله يكون عجبكم و استفدتوا شوية من حاجات ... يعنــي انا واش كان في راصي هاذي مدة حطـــتهولكم انشاءء الله يكون عجبكم ما تنسوش تخلولي كومنتار .... و لي عندسا سؤال تتصل بيا في الصفحــــة ولى في Contactez Moi    و انشاء الله نقدر نجاوبكم على كامل الأسئلة . نحـــــــــــبكم 

ما تنـــــــسوش تابعوني في Instagram / twitter/ snapchat / pinterest  عـــلى   ... و اديــــروا جـــــآم في لاباج فايسبوك ... و تنظموا GROUPE  تاعنا ... تلقاو الرابط التحت .

.