♥ JE VOUS EN PARLE N°10 ♥ : Le Kardun Pour les Cheveux

سـلام البنـــآت انشاء الله تكونوا بخير و جمــعة مباركة انشاء الله و الحمد الله على كل حال ( قولوا الحمد الله ) .

الـــوغ اليوم Histoire de changé  شويـــة ... راح نديرلكم مـــوضوع على القــــردون ... لي مازال حتـــى Youtubeuse, Bloggeuse  ما هدرت علـــيه ... و هو شيء مهــم و مفـــيد للشعر ... يعني كيفاش نقولوا un Lissage Naturel  للشــعر ... ولى اسهل و احسن طرقة للتطويل الشعـــر بطريقة طبيعية و صحيــة ... كي كانوا جداتنــــآ يديروه ولى كانوا يديرونا القردون كي كنا صغــــآر ... فتاكدوا بلي حاجة مليـــحة بزاف لشعر .

صديقتي كانت وفية بزاف للقردون ... و كنت نشوف شعــرها يطوال يطوال يطوال ... و انا شعري قصير قصير قصير ... قتلها ما تقوليلش بلي شعرك يطوال على جال القردون ؟ ... قاتلي ايه القردون يطول الشعر ... من ذلك الوقت وليت كل ليلة قبل ما نرقد اندير القردون ... و امنوا ولى لا لا انا شـــعري ما يطوالش بسرعة ... منبعد استعمالي للقردون ولى شعري يطوال و وصل للطول لي كنت حبــــآتوا ... انا و دهشت في شعري ... يعني كان عندي مشكل كبير و حليتوا طبيعيا ... حتى انوا يولي Lisse  و هابط و خفيـــف .

فوائد القردون :

-         تطويل الشعر طبيـــعيا و بشكل طبيعي ... خاصة كي تستعملوه كل ليلة قبل ما ترقدوا.

-         يحافظ على الشعر طيلة الليل يعني كي يكون ملايم ما تخافيش شعرك يتخبل ولى يصبح طالع بالعكس شعرك يصبح هابط و خفيف .

-         افضل طريقة لتمليس الشعر طبيعيا ... بعد استعماله عدة مرات و أيام و شهور ... خاصة اذا درتوا الزيوت في شعركم ولى الماسك الجافة ... مرة في الأسبوع ولى و درتوا  القردون .

-         افضل طريقة للمحافظة على الشعر و الحصـــول على شعر املس.

كيفاش انا نستعملوا ؟ :

بعــــد ما ندوش ... كنت ندير Brushing  ... و Nlissé  شعــــري ... نستعمل بالطبع ال Sérum Andréa Dotti  ( بزاف هايل ) نستعملوا كي نكمل ال Brushing   ... و كي نكمل نــــدير القردون و نزيروا مليح مليح ... حاولوا ما تزيروهش بزاف جيهة رايكم ... بصح كي تبداو تهبطوا زيروه .. حتى تحسوا بلي قردونكم و شعركم راه واقف كي العود ههه ... و هكذا و روحوا ارقــدوا ... يعني قبل النوم هو الوقت لاملائم للقردون ... هاذي بالنسبة كي ندوش و نغسل شعري .

في اليمات الأخرى يعني في وسط الأسبوع ... كي نكون رايحة نرقد ... نمشـــط شعري مليح مليح و ندير القردون بنفس الطريقة يعني مكلاه ندير Lisseur  و انا رايحة ندير القردون .

و هاذي هي كيفاش نستعمـــلوا كل ليلة ... و كي نوض الصباح نلقى شعري هابط ... نمشطوا ... كي نكون رايحة نتلق شعــري نستعمل ال Lisseur  باش تروحلي La trace  تاع القردون ... و اذا كنت رايحة نلايم شعري نكتفي بالمشط برك .

و حاجة وحدو نظمنـــهالكم بلي شعـــــركم يطوال و يولي هايل ... جربــــوه و تعرفوا النتيجة وحدكم ... و كل ما نهدر على القردون نقول بلي ... بينك و بين حيطان بيتك يعنـــي ماكانش لي شافك بلي دري القردون ولى لا لا ... يعني ههه لي تحـــشم بيه و تحشم ادير القردون ... نقولها ماكانش لي شافك و ماكانش لي سمع بيك درتي القردون ولى لا لا ... يعني شيء مفيد بزاف بزاف للشعـــرط و صحتوا ... و كيما قتلكم الحاجة لي كانوا يديروها جدودنا و جداتنا بدون شك مفيدة .

ملاحظة :

 ما ننصحكش اديريه على شعر مشمخ ... يعني اذا انتي ما اديريش Brushing  خلي شعرك ينشف شوية و ديري القردون خاطر اذا درتيه على شعر مشمخ ... قادر يتسبب في تكسر الشعر ... خاطر كي يكون مشمخ يكون Fragile  و انتي تغميه ... الوغ خليه ينشف وى نشفي شعرك و ديريه .

الوغ هذا هــــو موضوع اليوم ... انشاء الله يكــــون عجبـــكم و استفـــدتوا منــــوا  ... و عرفتوا أهمية القردون ... ما تنســـوش تشاركوا الموضوع مع حباباتكم ... و تقولولي رايكم في الموضوع تاع اليوم ... و اذا تستعملي القردون و واش رايك فيه ؟ ... و انا نتلقى بيكم انشاء الله في موضوع جـــديد انشاء الله .

ما تنـــــــسوش تابعوني في Instagram / twitter/ snapchat / pinterest  عـــلى  ... و اديــــروا جـــــآم في لاباج فايسبوك ... و تنظموا GROUPE  تاعنا ... تلقاو الرابط التحت .

.