♥ NOUVELLE EXPÉRIENCE N°1 ♥ : Ma Première Exposition au Chibi SJS 3

سلام البنات انشاء الله تكونوا بخـــير ... اليوم و راني Retard  بزا ... باش نكتبلكم هاذ L’article  لي كان لازم نكتبوا Sa Fait trop Long temps  ... باش نعبـــر فيه على شعوري و نخليكم تحــسوا شوية بواش حسيت في هاذوك الأيام ... اليوم نديكم لحظ بلحظة من خلال الكتابة الى الأيام لي جوزتهم في Chbi Sjs 3  ... الوغ راني رايحة نحكيلكم كـــلش .

كنت واحد النهار في الفايسبوك نــدور حتى وصلني Message  في La Page Mlle Yasmina  ... من عنــد zeryab Moussaoui  ( je te fait des coucou si tu passe par la )  ... و قالة بلي كاين Un évenement  في البلـــيدة بالتحديد في دار الشباب تاع بنـــي مراد ... و قالي بلي رايح يكون Un Coin Créateur  و قالي اذا حبيتي تكوني مع Les Autres Créateur  ... كنت بزاف فرحـــآنة و في نفس الوقت عمـــري ما شاركت في هكذا حاجات ... لاباج جديدة و كامل ... قالي Tes Créations  شابين و كامل انا فـــرحت و قبلت غير كملت الميساج بصح ... لازم نشوف ولى نقدر و ولى اهلي يوافقوا بطبيعة الحـــآل .

سقسيت Mes Parents  ... و وافقـــوا انوا نروح 3 أيـــآم لل Expositions  ... خاطر عندي جدتـــي ( ربي يحفظها ) في البليدة ... الوغ عندي ويـــن نبقى ... الوغ وافق ... و عاودت هدرت مع زرياب و مدلي Formulaire  عمرتوا و هكذا قعدت نستنى في الأيام يجوزا .

في الحقيقة ما كان عندي والوا في Stock  و كان باقي 15 يوم و انا ما عنـــدي والوا ... الوغ تحـــديت نفسي و خدمت 70 Trousses  ... عمري ما خدمت بهاذ السرعة و هاذ الكمية في ضربة ... الوغ كان تحــدي بالنسبة يليا ... كنت نخــدم الليل مع النهار غير باش نكمـــل .. و الحمد الله وجدتهـــم كامل .

في ال 25 اوت وجـــدت Ma Valise  و رحــــت للبليـدة و ريحت شوية و ال 26 اوت رحـــت لدار الشباب في بني مراد ... و انا عمـــري ما ركبت ال Bus  و رحـــت لبني مراد او مرة ... و بعيـــدة على وين تسكن جدتي ... انا خفت و حكمني السطر في كرشي ... خاصة و انوا انا كنت وحــدي ههه ... اول مرة ... ركبت ال Bus  ... و علبالكم كي تروحوا جيهة اول مرة و ما تعرفوهاش تبقاو تعـــسوا كل Arrêt  ههه و تسمعـــوا Receveur  واش يقول ... حتــى وصلت L’arrêt  تاع La gare  ... و شفت La Maison de Jeune  و معـــلقين تاع Chibi Sjs 3  ... و نزلت الحمد الله لي كانوا دايرين هذيك لوكان راني صبت روحي في القديــمة ... المهم ... كيما راكم شوفوا في التصـــآور .

الدخلة تـــآعها تشرح القلب و بزاف نقية دار الشباب هاذي بـــزاف ... Bon  رحنا ال 26 على اســـآس انوا في هذاك النهار نحـطوا الدوزان و كامل بصح كانوا مازال ما داروا والــوا .. و رحنـــآ Pour rien  بصح ماعـــليش ... ما رحتش في البـــآطل لتلاقيــــت Des gens vraiment Sympa  و هـــآيلين كيـــمى zaki L’organisateur  و بزاف عيباد كيـــمى Lilya  و بزاف بنات و ولاد هـــآيلين الله يبارك ( ماعدى واحــد انشاء الله المرة الجاية ما نشوفوش ) ... شفت Un Peu la Maison  و واش فيـــها و كامل ... عجبتنــــي بزاف ... و الله نقية  و تشرح القلـــب .

لحــــــق ال 27 اوت نهـــآر الافتتاح ... واش نقولكم ال Stresse  لي كان فيا البـــآرح زاد الدوبل في هذاك النهـــآر ... انا نحـشم بزاف و خـــآصة عباد ما نعـــرفهمش ... لأول مرة نشوفهم وصـــلت متاخرة و كانوا كامل حــطوا و ستفوا Les Stand  تاعهم و انا مازال ... الحمد الله كانوا مازال ما حـــلوش البيبان Les Visiteurs  ... كي دخـــلت صبت Un agent de Sécurité  لي هدر معايا Bien  و مدولي ال Badge  ... و كاين لي يخــوفوا شوية هههه بصح و الله غير كامل ناس مـــلاح ... طلــعت  La terrasse    وين كانـــوا Les Chapiteau  لي فيهم LES Stand  ... كانوا كامل واجدين و قاعدين كيما قتلكم .

دخلـــت سلمت على Lyria   لي عندها La Page Ly’s Cute Stuff  ... كنت فرحانة لي شفتها و أخير قدامـــي ... و كنت انا وسطها هي و Stand  تاع Misskawaii  ... لي كانت لابسة Un Mask  ... لي انا في الأول حسبت بلي حبـــت تلبسوا Juste  خاطر على حساب Le Theme  تاع L’event Japonais  ... بصح منبــعد فهمت ... منبعــد نهدروا عليها .

حطيـــت و كنت نهدر غير مع Lyria  ... منـــبعد بديت نندمـــج ... بشوية بشوية ... كان ثاني في نفس الجهـــة هـــآرون تاع Z-link  و حمـــزة تاع One Pins  بح ما هدرتش معـــآهم ... ههه حشمت وين علبالي اذا يحبوا ولى لا لا ... خاصة ولاد ... بصح Miss Kawaii  اندمجـــت معــــآه بلخف ... حسيت بلي نعرفها من بـــكري ... و كنا نهدوا نهدروا على كـــلش حسيتها قريبة ليا ... و هي كبيرة عليا ب 3 سنين بصح ما حسيتش بزاف بالفرق ... حبيــــتها .

و  Lyria  بزاف عــــآقلة من هدرتها تفيقوا بلي Calme & pausé  و تهـــدر غير بلعـــقل ... انا حبيتها بزاف هي أيــــضا ... و خـــآصة Les Créations  تـــآعها ... متـــقونين و بزاف هـــآيلين عندها يـــدين Magiques franchement  ... و انا فرحـــت بزاف كي تلاقيـــتها .

المهـــم بدى و دخـــلوا الناس ... بداو يجــوا عنـــدي البنـــآت ما نعـــرفهمش ... جاو عنـــدي واحد الخمــــسة ولى ... فـــــرحت بزاف لي شقاو عـــلى جــــآلي ... و الله شــــكرا ... خـــآصة Pandide  لي هـــــدرت معــــآها بزاف ههه و عجبـــــتني بزاف بزاف بزاف ... انشاء الله نزيد نشوفها في المستــــقبل ... جاو عنـــدي بزاف ناس لي طلعولي المورال نساء و رجـــآل بنات و ذراري ... با الاهــــي شحــــآل فرحـــت ... خاصة كي يقولولي يعطيـــك الصحة نحس التعب كامل راحـــــلي .

و جـــى نسيت كيفاش سمـــوه هه بصح هذا Normalement  اذا فهـــمت المدير تاع دار الشبـــآب ... لي هـــدر معايا و سقساني على  Mes Crétions  و عـــجبوه ... شجـــعنا بزاف هو و لي كـــآنوا معــــآه ... الحمـــد الله  .

و هـــكذ 3 أيام جـــآزوا ... جاو عنـــدي بزاف بنــــآت و أولاد ههه خاصة Les Mecs  مذا بيا يكونوا يقراو ههه ... طـــلعولي بزاف المـــورال ... و الله لي شافـــونا كنـــآ في السخـــآنة نطيــــبوا هههه ضحـــكونا و طلعولنا المورال ههه و الله كل ما نتفكرهم نموت بالضحــــك ههه .... يا ربي شحال دارولي الكوراج هههه ... في 3 أيام هذوك و الله ما حسيـــت كيفاه جــــآزا جازوا بلخـــف ... بقاولي بزاف حاجات و بقاولي غير Les Souvenirs  ... الشابين .

كي جاز اليوم الأول بطبيعة الحـــآل هدرت الاخرين لي ماكانش عندي Contacte  معاهم في الأول ... عجبوني ههه ... خاصة Z-Link  و Les Mangas Algérienne  ... هارون ورالي بزاف Les Mangas   ... عجبـــوني ... و هكذا بديت نندمج مع الاخرين لي كانوا قدامنـــآ ... و جــــــوزت يامات هـــآيلين معـــآهم و الله كيما نوصفلكم ماشي كيمى راهي في قلبي .

الحاجة الوحيـــدة هي كي دارونا في La terrasse  السخانة قتلتنا ههه ... بصح المهم جازوا يامات ملاح ... و هايلين و اليوم الأخير دخلونا الداخل ... و هذاك النهار كان عيد ميلادي لي جـــوزتوا الفـــم ... و بزاف تمناولي عـــــــــيد ميــــــلاد سعـــــــيد ... ههه و الله قفلت 20 سنـــة معاهم و الله زيـــن بقاولي Des Bons Souvenirs  ... جامي ننساهم .

كانت تجربة هايلة لأول مرة في حياتي نشارك في حاجة كيما هاذي و عجبني الحال بزاف ... و الحمد الله توفقت في هاذ الشيء ... و انشاء الله الاحسن ... و انشاء الله كامل المرة الجاية اجوا عندي ههه و نشوفكم و نبوسكم ههه و نهدروا في الحقيـــقة .... انشاء الله ياربي ... شكرا لي كانوا معايا اول بأول ... و شكرا لي دعاولي و تمناولي التوفيق ... شكرا Lyria  ... Miss Kawaii    و زرياب و كامل L’équipe du SJS  ... شكرا ل هارون و حمزة تاع ال Z-Link  و  one pins  ... شكرا لكامل L’équipe  شكرا لكامل لي جاو عندي لي نعرفهم و لي ما نعرفهمش ... شكرا كامل كيمى راكم .

مــــزال الجزء الثانـــــي من هاذ الموضوع  فيـــــه بزاف Les infos  على هاذ L’event  و واش كــــآن كاين و بالاك Vidéo  صغيـــرة ... على les Stand  لوخرين و على الحاجات لي كانوا فمى ... لوكان كتـــبتوا في موضوع واحد تكرهوا و انتم تقراو ههه ... Team Instagram  راهم شافوا التـــــصاور من قبل ... الوغ اسناوني في الجزء الثاني و نحكيــلكم Mes Aventures  في هاذ ال Chibi Sjs 3  ... و كل حاجة ... و ما تنسوش تابعوني في Mes Reseau instagram/snapchat/twitter  على mlle_yasmina  نحــــــبكم 

الراوبـــــــط تــــآع كامل Les Pages  لي هدرت عليــــهم في هاذ L'article ... ما تنسوش تزوروهم و اديروا جـــــآم ...