♥ REVUE N°7 ♥ : Crème Mains Hydratant pas cher ?? [ No Partenariat ]

ســــلام البنات .... انشاء الله تكونوا كام بخيــــر ... و الحمد الله على كل حال ( قولوا الحمد الله ) ... الوغ عندي مدة و انا نستخدم كريم لليدين ... و قلت هذا هو الوقت لي لازم نديرلكم فيها Une Revu  على هاذ الكريم ... يعني بعد عدة استعمالات منوا ... نقدر نقولكم راي تاعي عليه ... الوغ اليوم جبتلكم Mon Avis  في La Crème Hydratante Pour Main  من La Marque Simbel  و مخدومة في الجزائر ... و الســـعر تاعها راح يعجبكم علبالي رايحين تنخلعوا .  

لي يتبعوني من بكري علبالهم بلي نمــــوت و نحب كريمات اليدين ... و علبالهم بلي La Vasline  ما تخطينيش من الدار خاطر نستعملها بزاف في يديا و هي لي تنفعني عادة ... بالرغم من انوا يديا ماشي تالفين بصح نحب نديرها ... و هاذي La Crème  ادات بلاصة La Vasline  في الاستعمال لليدين ... يعني ملي شريها مانيش نسعمل La Vasline  في يديا .

هاذ La Crème   كاينة من بكري ... نشفالها لي كنت صغيـــرة ... أصلا تكونوا كامل شايفينها ... كانت اجي في Des Boites  مدورين ... تاع القارص ... ضرك داروها في Des Tubes  ... و هاذ الفكرة عجبتني بزاف ... خاطر خير من العلبة ... و تقدري اديريها في الصاك و خفيفة عليها ... نفس الرائحة و نفس La texture  ... برك ال Packaging  مبدل ... و السعر تاعها 75 دج ... ههه انعم ايه 75دج برك ... ماشي 700 و لى 7000 دج 75دج برك ... يعني حيرتني قلت و الله نجربها ... انا شريتها بهاذ السعر من Famili shop  في البليدة ... و راهي شدتلي قريب 3 اشهر ... يعني السعر هايل .  

ضرك نقولكم راي تاعي فيها étape par étape  ... يعني نهدروا على كلش كيما العادة ... و نبررلكم علاه عجبتني ... و كيفاه حتى ولات خير من La Vasline  بالنسبة يليا .

Le Packaging :

عادي ... مليح ... و ثاني Pratique  كيما قتلكم ... يساعدكم في الاستعمال خير من العلبة العادية تاع بكري ... تخرج الكريم بسهولة و على حساب الكمية لي تحتاجيها ... و زيد خفيف ... تقدروا تدوها في الصاك ولى ترفدوها معاكم ... و أيضا ... ما تسيحش ولى ما تسيلش يعني ما تخافوش تتعبز ولى تدفق ... يعني نمدلهم 10/10 على ال Packaging  .

واش توعدكم الكريم :

كريمة مرطبة للايدي ... كل يوم يدين ناعمتين و معطرتان ... لحظة ممتعة حقيقية مع هذه الكريمة المرطبة التي يتم امتصاصها بسرعة لتلين يديك ... معطرة بنكهة الليمون التي لا تقاوم فهي تمنح لبشرتك إحساس رائع بالنعومة .

هكذا توعدكم الكريم .

راي تاعي فيها ؟ :

-         ترطب اليدين بشكل رائع يعني ما عندي ما نقول ... لي يديهم خشان و تالفين و Abimé  ننصحكم بيها .... يعني ترطب بشكل هايل .

-         من جهة تمتص بسرعة Je Confirme  ناكدلكم هاذ الشيء مئة بالمئة ... على هاذ الشيء وليت نحبها اكثر من La Vasline  خاطر La Vasline  كي نديرها في يدي تبقى مزيتة ... بصح هاذي بلخف تشربها البشرة تاعك في دقائق ... يعني ما كذبوش كي قالوا يتم امتصاصها بسرعة .

-         من جهة معطرتان ... يعني هذاك الوقت تبان الريحة في يديك مليح بصح خسارة ما دومش بزاف ... ولكن غير تحلي ال Tube  تشميها تبان رائحة الليمون ... مليح ريحتها بصراحة هايلة انا عجبتني ... كي تروحوا تشروها شموا ... كاين نكهة وحد أخرى تاع L’argan  بصح انا ما يعجبنيش بزاف ... عجبتني تاع الليمون .

-         من جهة النعومة كي تستعمليها بشكل دائم تحسي بفرق في يديك ... و الله النعومة يوليو يديك ناعمين بزاف و هايلين .

-         يعني نقدروا نقولوا بلي نصف واش توعد بيه هاذ الكريم وفات بيه ... انا صح عجبتني خاصة بالنسبة للسعر ... بزاف هايلة و الله .

وين و كيفاه نستعملها ؟ :

انا استعملتها كي نحرقت من الشمس تاع البحـــر ... غير دوش درت منها على كتافي كيما نحرقت و الله روعـــة  ... خلاتني نرتاح من الألم تاع الحريق و يومين تهنيت من الحروق ... يعني قريب كامل في دارنا كي نحرقوا جربوها و خرجت علينا كامل .

كي نغسل المواعن شغل يديا ينشفوا شوية من غسول الاواني و كي نديرها ترطبلي يديا مليح مليح ... و تردلهم النعومة .

و ضرك راهي داخلة الشتاء و الخريف و القراية لازم كريم لليدين و انا هاذي لازم نزيد نشري منها راهي قريب تخلاصلي و ما صبتش منها مازال راني نحوس ... هاذي هي Ma Favorite crème  تاع هاذ المرة حى نلقى وحدة خير منـــها .

و نستعملها بعد L’épilations  في يديا و رجليا نديرها ترطبلي مليح و ما نحسش بالحروشية ... في يديا و رجليا .

يعني ماشي غير لليدين مفيدو لبزاف حاجات اخرين ... و على هاذيك قتلكم بلي ادات بلاصة La Vasline  .

البنات انا ننصكــم اجربوها ولي جربوها من قبل يقولولي رايهم في كومنتــــآر هكذا باش يفيدوا البنات ... و لي رايحة اجربها بعد ما اجربها تقولي رايها فيها ... و نكونا بهذا كملنا ال Revu  تاع اليوم ... هدرنا على منتوج جزائري و ماشي غالي كامل و يستهل اجربوها ... و كيما قتلكم لي عندها سؤال تطرحوا عليا في كومنتار ولى في البريفي في لا باج فايسبوك ولى في Contactez moi  انونيم ... و انا مستعدة نجاوب عليكم كامل ... و هاذ الكريم شريتها ماشي Partenariat  مع La Marque . 

و بهاذا يكون خلاص الموضوع تاع اليوم ... و انشاء الله يكون عجبكم و ما تنسوش J’aime  ولى Je n’aime plus  ... و ما تنسوش تقولولي رايكم و اديروا جام في La Page facebook  لي راهي التحت ... و اديروا آبوني في Mes Réseau instageam/snapchat/twitter  ... على mlle_yasmina  .... نحـــــبكم بزاف بزاف