♥ JE VOUS EN PARLE N°11 ♥ : Mon Expérience Avec La Kératine

ســــلام البنات انشاء الله كونوا ملاح ... و تكونوا بخير و على خير و بصحة جيدة ... و الحمد الله على كل حال .

اليوم جبتلكم موضوع جـــديد بعد ما موضوع Adieux Les Cheveux Sec  جاب بزاف Les Vus dans Le Blog  ... قلت هاذ النوع من المواضيع البنات كامل يحبوا بعرفوا عليهم ... الوغ الموضوع الأول كان على ال Défrisage و اليوم على La Kératine    ... لي جربتها لأول مرة في حياتي و راح نقلكم النتيجة و راي تاعي فيها .

اول شيء كنت خايفة و متخوفة منها ... خطر سمعت بزاف ناس و بنات يقولوا ادير السرطان عفانا الله و عفاكم ... منبعد عرفت بلي كي تكثري منها و اديريها كل وقت تسببلكم السرطان ... يعني بحثت و شفت Les Vidéos  ... و بزاف بنات عرفتهم داروها ... قلت علاه لا لا نجربها و نشوف كيفاش ... خاصة انوا اول مرة نديرها في حياتي ... و أيضا كان لازم عليا نديرها ... خاطر شعري كان في حالة كارثية و ما نقدرش نقعد بيه هكذا ... يعني ماشي كارثية كارثية صح ماكانش انا عاجبني ... و كان يقلق فيا .

انا شعري كيما علبالكم كامل طبيعتوا  Bouclé  و كان جاف ... منبعد Les Soins  و داويتوا و قفت مع شعري و درت Les Défrisages  ... شعري ما ولاش ناشف و جاف و متضرر ... شعري ولى للحياة ههه بصح المشكل انا عندي من القدام ... تطلعلي La Racine  و يولي منفخ و ماشي شباب و واقف ... و انا هاذ الوضع ما كنتش قادرة عليه ... قررت ندير La Kératine  و نشوف النتيجة ... منها شعري يتعدل و منها يطوال و منها Les Fourches  يروحوالي.

انا ما شريتش La Bio  خاطر قالولي بلي واعرة و تخرج البخار بزاف و تحرق في العينين ههه و ثاني ما علباليش ما بنتليش عليها ... شريت Kératine Cure  قالولي مليحة المهم .   

   

الوغ شريت انا 2 Doses  تاع La Kératine  كيما راكم شوفوا في الصورة ... في بواطة كيما هاذي ... و يمدلكم ال Shampoing  كيما لي راه في La Photo  ... انا شريتها 2500 دج لل La Doses  يعني 2 بسعر 5000 دج ... بصح كاين اقل من هاذ السعر ... و كاين اكثر ... المهم ...  انا شريت Lé Kératine Cure  ... ريحتها بزاف شابة ... بصح ريحة ال Shampoing  ههه ماشي شابة كامل .

شريتها و رحت غسلت بال Shampoing  في اليوم الموالي اديتها للحفافة لي نروح عندها مضاري و ندير فيها Confiance  باش اديرهالي ... كنت خايفة بزاف ... أصلا نهار قبل قاعدة غير نقول لوكان ما تخرجليش مليحة و لوكان و لوكان ههه ... بصح رحت و درتها ... و خفت  الكمية ما تكفينيش ... الوغ دارتها و كفاتني الحمد الله .

كيفاش دارتهالي ؟ 

 الوغ فرغتهم في Un Bol  و بدات تمشيها في شعري مليح مليح ... و خلاتها شوية منبعد اجي مرحلة ال Brushing  ... المرحلة الواعرة ... خاطر يبدى يخرج البخار ... و الريحة و تحرق في العينين ... و البخار يعمر الدنيا ... المهم كي تخلاص و جبدلي شعري مليح مليح ... منبعد اجيي مرحلة ال Lisseur  المرحلة المهمة كامل خاطر الحرارة تاع ال Lisseur  هلي لي تثبت ال Kératine  في شعركم و لازم يكون +200 درجة حرارة ال Lisseur  ... و لازم تليسي شعرك مليح مليح . و خلاص .

لحد الان النتيجة راهي Top de Top  شعرك ما تعقليهش ... بصح ال Kératine  مازالت في شعرك يعني مازال ما غسلتيش شعرك ... يعني ماشي النتيجة النهائية .

الوغ لازم 3 أيام و انت تعاودي بال Lisseur  في شعرك باش تثبتيها مليح مليح ... و لازم 3 أيام ... بعدهم تقدري تغسلي شعرك .... و اشوفي النتيجة ... و لازم في 3 أيام هاذوك ما اديريش ال Chouchou  في شعرك يعني ما تلايميش شعرك باش ما تبقاش La trace  تاعوا في شعرك و يبقى شعرك هابط .

راي تاعي في النتيجة ؟ 

انا بعد ما غسلت شعري ... كنت Satisfaite  يعني النتيجة عجبتنـــي ...

-كان شعري منفخ خاصة من القدام ... و كي نغسلوا يعاود يتنفخ ... هاذ المرة لا لا حتى و هو مغسول هابط و هايل

- كانوا عندي Les Boucles  بصراحة Les Boucles  ماراحوليش ... بصح كانوا خفاف بزاف يعني ما عذبونيش بزاف بزاف ... يعني ما قلقونيش كيما زمان .

- شعري كان خفيـــــــــــف بزاف و مجبــــــود ... على عكس زمان كنت كي ندوش نتقلق من شكلوا و هو مشمخ يعني نشوفوا في المراية نكره .

- الوغ من حيث التسلاك ... تسلكلي في 5 دقائق ... حتى بلى ما نستعمل المشطة ولى حتى أي Brosse  دخلت يدي خرجتها فيه يعني و تسلكلي ... كي عاودت بالمشطة تسلكلي Facilement  في دقيقة ... بينما بكري كنت بال Après Shampoing    و مانفريهاش كنت ندير قرعة كاملة باش نسلك شعري المخبل ... ضرك La Après Shampoing  لا والوا نغسل و نمشط و نكوروا و نخبلوا كيما نحب و نديرلوا واش نحب ... و خلاص يتسلك بسرعة .... و هذا انا عندي اهم من أي شيء .

- شعري كان يبرق و كان فيه لمعة هايلة عجبتني بزاف بزاف ... هايلة بزاف ... كان يبان في اختلاف قبل و بعد .

- كان شعري يبان عامر و فيه ال Volume  بزاف ... بصح ضرك لا لا ولى يبان لقمة .

قبل La Kératine  كان لازم عليا كل سمانة نروح ندير Brushing  عند الحفافة خاطر في الدار وحدي ما نقدرش نجبدوا وحدي و اذا جبدتوا وحدي اندير ساعة و نص ولى اكثر ... أولا خاطر شعري واعر و فيه بزاف ال Volume  و ثانيا خاطر ما عنديش La main  في ال Brushing  ... الوغ كان لازم نروح للحفافة خاطر موحال نروح بيه نقرة و هو ماشي مجبود ... حتى ولكان جيت  متحجبة ما نقدرش نخليه هكذا خاطر منفخ ... شعري ماشي شباب ببساطة خاصة كي ينشف Sans Brushing  .

كيما قتلكم كان لازم نروح للحفافة دائما باش نجبد شعري و هذا ببساطة خسارة الدراهم .... و خسارة الوقت ... و خسارة بزاف حاجات .

بصح بعد ال Kératine  وليــــت نجبدوا وحدي في الدار في 45 دقيقة ... شعري ولى مافيهش الشعرر بزاف هه يعني ما ولاش عامر ماشي في ال Volume  بزاف ... يعني ولى ساهل نجبدوا حتى La Racine  كانت بزاف Bouclé  من قبل و واعر باش نجبدها... ضرك بلخف تنجبد و Les Boucles  راحوا ... و شعري مجبود و هايل ... و نجبدوا وحدي و اهم حاجة وفرت دراهم الحفافة ... و تعلمت نجبد شعري وحدي في الدار و نتكل على روحي .

يعنــــــــي تهنيــــــــــــــت .... و اخيــــــــــــــــــــــرا ... و بعد ما نجبدوا نديرلوا ال Lisseurs  يزيد يهبط و ندير القردون و نرقد .

وزيـــد شفتوا هاذوك الشععرات لي يقلقوا Les Repousses  هاذوك كامل يهبطو و تولوا ما تعانوش منهم ....  و كذلك Les Fourches  انا تهنيت منهم يعني شعري تهنيت من بزاف مشاكل بعد ما استعملتها .

نصائح و ملاحظات :

الوغ بعد ما تغسلوا شعركم لأول مرة من ال Kératine    راح تلاحظوا القشرة في شعركم ... و هاذ القشرة راح تبقى مدة من أسبوع الى أسبوعين .... و تروح و هاذ الشيء عادي انا عندي كانت جاتني و خفتها منبعد قالتلي الحفافة بلي هاذ الشيء عادي جدا ... و راحتلي الحمد الله ما ولاتش كاينة ... يعني اذا لاحظتوها ... ما تخفوش منها ... خاطر عادية جدا .

بعد استعمال ال Kératine  و بععد م ديريها في شعرك ... لازم تشري Shampoing Sans Sulfat  بدون سلفات ... باش تشدلك ال Kératine  مدة أطول ... و باش تحميها ... و انا جربت تاع L’oreal  و بزاف هايل ... السعر تاعوا 1300 دج ... يعني هو هايل بزاف ... يزيد يساعد في اصلاح شعرك و راح تحسي بلي شعرك هايل انا ننصحكم بيه .

اذا راكي معولة اديري ال  Kératine  في الصيف ... اعرفي بلي ما تقدريش تعومي خاصة اليحر .... حتى و انوا كنتي معولة على Défrisage  ما ننصحكش نعومي بيه ... يعني خاطر راح يضر شعرك اول شيء ... و ثاني شيء ال Kératine  ما تشدلكش في شعرك بزاف و فم فم تروح ... انا درتها في Septembre  و في Juin  تروحلي ... نعوم و نبحـــر و في Septembre  الجاي نعاودها هكذا باش نضمن انوا شعري يبقى محمي .  

La Kératine  كيما أي حاجة تشد 6 اشهر ... يعني 6 اشهر و ال Kératine في شعرك و بعد ال 6 اشهر راح تبدى  La Racine  تطلع و شعرك يولي لطبيعتوا ... ما يوليش كيمى كان كيمى كان بصح راكي رايحة تلاحظي شوية تراجع ... بصح ما راكيش رايحة Tetginay  منوا مئة بالمئة ولى كي بكري ... و بالاك ما تلاحظيش الفرق بزاف ... انا كي درت ال Défrisage  و راحلي شعري ما ولاش لطبيعتوا يعني الحقيقية  و ماولاش شعري تاع زمان لي كنت نتقلق منوا على العكس ما حسيتش بفرق كبير ... و كي يفوتوا 6 اشهر رايحة نقولكم النتيجة .

شوفي اذا انت شعرك جاف كي حالتي كيفاش تعرفي انوا ال Produits  لي درتيه في شعرك نفعك ؟ .... ببساطة كي شوفي و تحسي و تلاحظي بلي شعرك في بومين و 3 أيام بعد ما تغسليه يعاود يتزيت ... و هذا ملا لحظتوا في شعري انوا بلخف يتزيت ... نغسلوا السبت ... الثلاثاء نعاود نغسلوا ... هاذي هي الملاحظة المهمة .

بصح لي عندهم شعرهم Gras  انا نشوف بلي رايحة تزديها على روحك ... اذا ما استعملتي La Kératine  ... و الراي رايكم في النهاية .

لون شعرك راه رايح يهبط شوية يعني يولي شوية Claire  بصح ما تخافوش راه رايح يولي لطبيعتـــوا ... عادي نورمال ... كاين لي يلاحظوا هاذ الفرق و كاين لا لا ... الوغ ماشي خاجة تضر بالشعر ما تخافوش ... انا بالعكس عجبني لون شعري كي طاح خاصة بعد ما عمت الملح و الشمس شعري حال و زاد حال من ال Kératine  و اللون كان رائع حبيتوا ههه .

انا على حساب ما قالولي و قريت و شفت ... بلي مالازمش تبقاي تكثري منها ... يعني لازم ايدريهاش كل وقت ... كيف كيف كاين La Kératine Avec Formol  و La Kératine Normal sans Formol  ... انا لي درتها و الله ما علبالي اذا Avec ou Sans  ... بصح يقوالوا بلي avec Formol  مالازمش اتكثروا منها  و اديروها كل وقت يعني تصبروا شوية .... يعني النصيحة هي شوفوا اذا Avec ou sans Formol  قبل ما تشروها ... خاطر  Avec Formol  تهبط الشعر و sans Formol  هي عبارة عن Un Soin  للشعر .  

الإجابة على اسئلتكم :

-         السؤال الأول : شحال شريتيها و شحال تبقى في الشعر ؟

شريتها 5000 دج 2 Doses  ... كاين تاع قل و تاع اكثر ... و L’applications  3000 دج ... يعنيي المجموع 8000 دج ... و تبقى 6 اشهر .

-         سؤال الثاني : عندي Des Cheveux Fin   نقدر نستعملها ؟

انا ثاني شعري شعرتوا رقيقة .... و بصح ناشف ... انا نقو على حساب Le Type  تاع شعرك ... يعني هوما أصلا كامل البنات راهم يستعملوها مهمى كان نوع شعرهم ... خاطر تفيد بزاف حاجات كيمى قتلكم الفوق ... الوغ انا نقول اذا ما عندكش مشاكل مع شعرك بزاف ... Un Simple Soin  و راكي فريتيها ... بصح اذا شعرك كان فيه بزاف مشاكل كيما انا يعني تقدري تستعمليها .

-         سؤال الثالث : شكون دارتهالك ؟ و شحال يشد في الشعر ؟ و تفسد الشعر ؟ و كيمى ال Défrisage  ما نقدروش نعوموا بيه ؟ و صح كي دوشي تقول عليه مجبود ؟

انا دارتهالي الحفافة ما درتهاش وحدي خاطر واعرة و شعري طويل ... تفسد الشعر ؟ انا ما فسدتهوليش بالعكس هي تصلح الشعر و الكيراتين بالطبيعة عندنا في شعرنا من قبل .

في هاذ النقطة تاع كيما ال Défrissage  ما نقدروش نعوموا بيها ؟ ايه ما تقدريش ... يعني ماشي كي ادرريها مثلا في سبتمبر ديسمبر و لى جانفي يعني ما تقدريش تعومي بيه ... ماشي محيوب كي اديريها في شعرك ما تقدريش تعومي ابدا لا لا ... بصح لازم اجوز مدة مليحة على ملي درتيه في شعرك هكذا باش ما تفسدبكش شعرك ... خاطر الملح و الشمس أصلا مضر للشعر بلى والوا ... الوغ كي اديري Des produits  هكذا بالطبع ماشي مليح ... مثلا اديريه و سمانة تعومي ... لا لا مضر للشعر ... الوغ انا نفضل اديروه في فترة ماكانش فيها الصيف و العومان ... و كي يلحق عليكم الصيف عوموا و ما تخافوش . هاذي هي .

يعني انا كي دوشت قتلكم شفت Les Boucles  بصح كاين لي لا لا .... يعني ل وحدة و شعرها ... بصح حاجة اكيدة و ناكدهالك هي انوا شعرك يكون هابط و عاقل ههه و ماكانش مشاكل في شعرك خلاص تتهناي .

سؤال الرابع : كيفاش نعرف المليحة و الماشي مليح ؟ وين يتباع ؟ و اذا تقدري اديريه في الدار

شوفي يعني انا عرفتها اذا مليحة ولى لا لا ... شفت البنا لي قبلي و سقسيت لي يبيع و سقسيت لي قبلي لي داروها قبلي و قعدت نحوس و شريت في النهاية وحدة على الزهر ... و انا نقولك لازم تسقســـي بزاف باش تعرفي .

يتباع شوفي عند Les Cosmètiques  لي مضاري تشري عليه ولى تعرفيه ثقة ... هاذي هي خاطر راهي تتباع Partout  .

تقدري اديريه في الدار اذا كنتي تقدري تجـــبدي شعرك و اديري Brushing  وحدك و يكون مليـــح ... ما عدا هكذا لا لا ماتقدريش. .. و أيضا لازم تعرفي بلي يخرج منها البخار ماتخافيهش بصح لازم اتغطي فمك و نيفك ... و اديري حاجة في يديك ... الوغ هي من الاحسن اديريها عند الحفافة اذا كنت حابة نتيجة هايلة ... خاطر وحدك شوية واعرة .

في هاذ الموضوع و هاذ   L'article  ... جوبت على كامل الاسئلة و هدرتلكم على كامل واش لازم نهدر ... و قتلكم كامل ... الوغ النتائج تاع ال Kératine  تختلف من وحدة لوحدة ... و تختلف على حساب نوع الشعر ة عل حساب الحفافة لي دراتهالكم و لى على حساب انتم كيفاش درتوها اذا درتوها في الدار ... الوغ لي حابة اجرب اجرب ... بصح النتيجة كل وحدة و كيفاش ... بصح حاجة اكيدة ماشي مضرة للشعر و ما تنحرقوش ... بالصح النتيجة كل وحدة كيفاش تبانلها ... Question de gout  و كيف كيف كيمى قلت على حساب كيفاش درتوها ... هاذي . 

الوغ هذا هو موضوعنا اليوم ... انشاء الله يكون عجبكم و استفدتوا منوا .... و انشاء الله نكون جاوبت على اسئلتكم و ما نسيت والوا ... و لي مازا عندها سؤال ولى حاجة ما فهمتهاش تقولهالي في كومنتار ولى تبعثلي Message  في Contactez moi  الفوق ... ولى في La Page  ... و ل جربت من قبل تقولي رايها ... الدار داركم قولوا واش تحبوا و اتصرفوا كيما تحبوا ... و نتلقاو في موضوع جديد ... نحــــــــــبكم ... ولي حابة اشوف الموضوع تاع الDéfrisage تضغط على هاذ القلوب ← ♥♥♥♥♥♥  

ما تنـــــــسوش تابعوني في Instagram / twitter/ snapchat / pinterest  عـــلى  ... و اديــــروا جـــــآم في لاباج فايسبوك ... و تنظموا GROUPE  تاعنا ... تلقاو الرابط التحت .

.