♥ REVUE N°8 ♥ : Crème Essentials Fairness SPF8

ســــلام البنات انشاء الله تكونوا ملاح ... و تكونوا بخير و على خير ... و الحمد الله على كل حال.

الوغ اليوم جبتلكم Une Nouvelle Revu  على كريم مرطب ... من عند La MARQUE Oriflame  ... علبالي بلي نضل نهدرلكم على هاذ La Marque  و عى Les Produits  لي تقدمهم ... بصراحة انا نحبها و عمري ما شريت منعندهم حاجة و ما عجبتنيش .... كاين خير و كاين اسوء منها هذا شيء طبيعي ... بصح انا نقولكم بلي كي نشري حاجة منعندهم ما نندمش عليها مه انوا قادرة نلقى حاجة افضل من نفس السعر بصح الأهم هو انوا ما نقولش خسارة دراهمي ... هاذي هي علابيها عندي بزاف حاجات من عندهم ... خاطر نحب نجرب اكثر و اكثر .

الوغ هاذ الكريم المرطب شريتوا هندي مدة ... و من هاذاك النهار و انا نستعملوا و راه قريب يخلاص ... يعني من وقت ما شريتوا ما حسيتش بلي لازم نشري كريم اخر ههه ما كسرت راصي حتى انوا نحوس على واحد جديد ... خاطر كنت راضية عليه مئة بالمئة ... يرطبلك البشرة تاعك بطريقة رائعة ...  ثاني فيها Spf8  ... ضد الشمس ...;فيها قيتامين E ...  و فيها استعمالات اخرى انا راني نستعمل فيه منذ عام ... و مازالني راضية عليها و نعاود نشريها اكيـــد .

الوغ La texture  تاعوا شوية خفيفة ... و الريحة مليحة ماشي قاطعة و ماشي رائحة مزعجة ... أيضا كي تحطيه على La Peau  تاعك ما نقولكش تشربوا La Peau  كامل ضربة وحدة بصح ينشف مع الأخير .

كي ديريه في وجهك فورا تحسي بالراحة التامة ... يعني تحسي بنعومة و انتي تحطي فيه و تحسي بلي وجهك ولى طري و خفيف ... راني نقولكم هايلة و بزاف ... تعطيك الراحة في وجهك و بزاف ... يعني تحسي بالترطيب .

بالطبع انا لي متابعيني من بكري علبالهم بلي انا نستعمل معظم Les Crèmes  لي عندي لعدة استعمالات ... و نقولكم هاذي لواش استعملتها ما عدى الترطيب :

-         كي ندير Une Crème Dépilatoire  بالطبع تخليلك وجهك حمر و شوية يحرق ... يعني جميع الينات عندهم هاذ المشكل كي تنحي ب La Cire  ولى Avec Une Crème  ... هاذ النتيجة كاينة ... الوغ انا نحطــها على وجهي و ترحلي وجهي و الحريق يختفي في دقائق و الحمورية في وجهي كيف كيف ... يعني ساعدتني بزاف نتهنى من هاذ المشكل .

-         نستعملها كريم ليلي يعني ساعات كي نحس وجهي ما يعجبش و cava pas  نديرها و نرقد ... و نحس وجهي خفيف و البشرة تاعي Souple و طرية ... و كي نوض الصباح البشرة تاعي تكون هايلة و تفتحة و نضرة .

-         نستعملها أيضا Comme Un Primer  يعني نحطـــها قبل ال Fond De Teint  ولى Une Bb Crème  ... و تمدلكم نتيجة هايلة ... يعني تقدروا تستعملوا أي طريم مرطب تحبوه بهاذ الطريقة .

-         نستعملها أيضا خطرات كي نحب نخرج خرجة خفيفة يعني باش ما نبانش دايرة حاجة في وجهي بزاف ... نديرها كريم نهاري ... هاذي هي .

النتائج لي ماكنتش نسنى فيهم ... هي انوا نحـــآتلي Les Taches  من وجهي ... يعني Les Taches تاع الشمس لي يخرجولي و نحاتهوملي ... يعني بزاف هايلة ... حتى انوا بعـــد عدة استعمالات ... راح تلاحظي بالبشرة تاعك رايحة   يتوحد اللون يتنحاولك بزاف مشاكل في وجهك يعني بعد مدة ماشي فم فم ... بصح راح تلاحظي تغير في وجهــك ... و راح تفاجـــئي منها .

و من هاذ La Gamme  كيف كيف جربت الصابون تاعهم و عجـــبني بزاف بزاف بزاف ... يعنـــــي هاذ La Gamme Essentials  ... و مازالنــي حابة نجرب اكثر و اكثر ... و جربوا أي حاجة من هاذ La Gamme  خاطر ملاح .

السعر تاعها 570 دج ... و نمدلها 8/10 ... يعني خاطر لقيت فيها بزاف حاجات عـــجبوني ... و Normalement  لكامل أنواع البشرة يعني .

و هكذا نكونوا وصلنا لنهاية الموضوع انشاء الله يكون عجبكم ... و استفدتوا و يكون عجبكم الكريم ... و لي جربتها تقولي رايها في كومنتار ... و لي عندها Une Crème hydratante  هايلة تحطلي آسمها في Commentaire  باش نجـــرب انا ثاني ... انشاء الله يكون عجبــكم الموضوع ...  و لي عنــدها سؤال تطرحوا هنا و لى في La Page  ولى تطلع الفوق في Contactez Moi  لتواصلوا معــــآيا ... و نتلقاو في موضوع جـــديد انشاء الله .

ما تنـــــــسوش تابعوني في Instagram / twitter/ snapchat / pinterest  عـــلى ... و اديــــروا جـــــآم في لاباج فايسبوك ... و تنظموا GROUPE  تاعنا ... تلقاو الرابط التحت .

.