♥ JE VOUS EN PARLE N°12 ♥ : Le Bullet Journal !

ســــلام البنات انشاء الله تكونوا بخير و عـــلى خير ... و الحمد الله على كل حـــآل .

اليـــوم جبتلكم حاجة تساعدكم في تنظيم حياتكم اليومية ... مشاريعكم ... اهدافكم .... احلامكم ... ايامكم و شهوركم كامل في كراس واحد ... و بطـــــريقة هايلة و سهلة و راح تشجعك هاذ الطريقة باش تنظمي كل حاجة في حياتك.

انا كنت انسانة التنظيم من جهة و انا من جهة أخرى ... يعني عمري ما نظمتي روحي ... كان عندي كراس هكذا نكتب فيه المواضيع لي راني حابة نديرهم و كذا ... وا بلى ما ننساو الكرارييس تاعي تاع القراية معمرين بالرسومات و Les Citation  ... حتى شفت واحد ال Statut  في groupe imen Beauty  ... لي فيه بزاف معلومات ... وحدة حطت ال Bullet Journal  تاعها ... قلت ياه سحال شباب ... بديت نحوس واشن هذا واش يدير فواش يساعد الخ ... و قلت Ok  نبداه ... بصح كل يوم نقول اليوم كيما كاين لي راهم هكذا في هاذ الوقت ... حتى قررت نبداه ... و شفت Vidéo  و حطيتها في La Page  فهمت مليح واش هوا و واش ينفع ... و كيفاش نبداه حتى بديتوا ... و عجــــــــــــبني .... ملي بديتوا و انا نحسوا وليدي ههه نجري نروح للدار باش نكتب فيه  و نظم وقتي ... نعم لهاذ الدرجة عزيزتي ... بفضل هاذ ال journal  انتقلت من انسانة غير منظمة الى انسانة منظمة .

هاذ ال Bullet Journal  واش هو ؟

هو كراس ... Agenda  ... Carnet  واش تحبي المهم تكتبي فيه ... تقسميه الى أجزاء ... ضرك نشوفو واش هاذ الأجزاء ... يعني راح يكون هو الشيء لي يجمع كل حاجة حابة اديريها في اليوم  ... كل حاجة حابة اديريها في المستقبل .. كل حاجة حابة اديريها في حياتك تكتبيها فيه ... ما تخافيش ضرك تفهمي كي نبداو نهدروا على الأقسام .


L'index 

أولا عندك L’index  .... يعني نقدروا نسموه بالعربية الفهرس ... هاذي الصفحة لازمة في ال Bullet journal  ... يعني راح ترقمي كل صفحة تكتبي فيها ... كي تكتبي رقمي ماشي رقمي منبعد اكتبي خاطر قادر تقطعي الصفحة ولى يروحلك الرقم ... يعني كي تكملي الصفحة رقميها .... و اكتبي الرقم قداموا محتوى الصفحة مثلا انا عندي الصفحة رقم 1 فيها ال Calendrier  .

Key

ثانيا Key  ... ولى Code  ولى المفاتيح ... يعني الرموز لي راكي رايحة تكتبيهم قدام الحاجات رلي راكي رايحة اديريهم ... كيما راكم شوفوا مثلا حاجة مهمة نحطها قدامها ! ... و حاجة لي ندرها نحط قدامها قلب و هي رايحة .

 Annuelle Calendrier 

ثالثا Annuelle Calendrier  ... يعني راكي رايحة تكتبي ال Calendrier  تاع العام في هاذ القسم ... نعم لازم خاطر هكذا كي تسحقي كاش ما تحوسي وى تلقيه غير قدامك ... انا راني دايرة فيه كيف كيف Code  هكذا باش نعرف واش كاين في التاريخ هاذاك ... باش نسهل المهمة ... درت شهرين برك يعني واش بقى من ال 2016 برك ... ما كتبتش كامل العام ... بالنسبة للرموز في ال Calendrier  ماشي لازم انا حبيت نزيدوا ... باش نلقى بسرعة تاريخ قديم.


Calendrier Mensuel

رابعا Calendrier Mensuel  ... يعني ال Calendrier  تاع الشهر ... تقسمية كيمى تحبي انا استعملت تقسيم بسيط يعني خاطر علبالي راني رايحة نكتب غير الحاجة الهمة ... تقدروا تقسموه بين الصباح و الليل ... كيما تحبوا .

خامسا : صفحات و صفحات تكتبوا فيهم اليوم قداموا التاريخ اذا حبيتوا ... تكتبوا قداموا واش راكم حابين اديروا في هاذ اليوم ... واش هي الحاجات لي لازم اديروها و لي راكم حابين اديروها ... باش ما تنسوش ... انا والله غير نكتبها في ال Bullet Journal  ما ننساش واش عندي ندير ... و انا في الأول كنت دخلت من خرجت من ننسى كلش ... و ضرك تنظم ... تقدروا تزيدوا كيفاش كان الجو في هاذاك اليوم .. تكتبوا اقوال ترسموا ... اديروا واش تحبوا ... وهاذ هو القسم لي نحبوا اكثر شيء. 

سادسا :   Objectifs / Wish Liste / Film / série / livre  ... الخ هاذ الحاجات .. انتوما تزيدوهم ... كيا تحبوا تحبوا تزيدوا حاجات كيما تحبوا انا درت هاذوا ... بصح Objectifs Du Moi  انا نفضل نقولكم ضروري اديروها ... هكذا تحددوا اهدافكم و تساعدوا نفسكم توصولوا ليها ... و في اخر شهر شوفوا واش حققتوا منها .

يعني الأقسام المهمة في ال Bullet Journal  هي ... L’index .. Calndrier Annuel … calendrier Mensuel … Vos Objectifs  ... و تاع الأيام لي لازم تكتبوا فيها واش راكم حابين اديروا ... اما الباقي تزيدوهم كيما تحبوا انتم و الحاجات لي حابين تنظموهم و تراقبوهم و تتفكروهم .

 

الوغ انا زدت Calendrier de Periode  ... باش نكب الحاجت المهمة على الدورة الشهرية ... كيما علبالكم ملي فسدلي التليفون وليت ماعندي حتى حاجة ههه ... و زدت Contrôle De Budget  ... مع Entré et Sortie  باش نشوف واش صرفت و واش دخلني ... خاطر بزاف بزاف نبذر دراهم ... هكذا نقدر نراقب روحي و نعرف وين رميت دراهمي هكذاك برك... تقدروا اتظيدوا صفحة تراقبوا فيها اكلكم ... وزنكم ... أي حاجة راكم حابين تنظموها يعني ال Journal  تاعكم نظموه كيما تحبوا ... المهم رراني وريتلكم الأقسام المهمة في ال Bullet journal  الباقي كيمى تحبوا .

ماشي شرط تكونوا تعرفوا ترسموا ولى ال Journal  تاعكم يكون هو الأفضل ... هاذ الشيء جاء باش ينظملكم وقتكم و حياتكم يعني جاء باش يكون مفيد ماشي مثالي ... يعني الكراس كراسك خربسي فيه كيما تحبي ... ارسمي اشكال مخربشة المهم يعاونك و تلقاي رحك في التنظيم بفضلوا ... ماشي لازم يكون مثالي …  انتي حرة في تنظيموا كيمى تحبي ... و امنسايش ترقميه خاطر راح يساعدك تلقاي الصفحة بسرعة عن طريق L’index  ...

و كتبي فيه اقوال طلعلك المورال ... وصلي لروحك Des Messages  كاتبي كامل واش يجيك في بالك ... هو أيضا يساعد يطلعللك المورال من خلال الرسم و تحربيش ... و كتابة اقوال و رسائل لروحك رايح ينحيلك على خاطرك و يصفيلك ذهنك و انتي في نفس الوقت تنظمي روحك .

انا للبداية استعملت كراس عادي كيمى راكم شوفوا ... ما فيهش حتى 288 صفحة خاطر قطعت منوا أوراق من قبل ... و من لي بديت نستعمل فيه هاذي ما عنديش بزاف ... ما ندمتش لي درت الكوراج و بديتوا ... الوغ اذا راكي مترددة ؟ ابدايه الان ... و انا نقولك و الله ما تندمي عليه ديري فيا الثقة ... و الله ما راكيش رايحة تندمي .... و ما يهمش شكل الكراس لي راكي حابة تكتبي فيه ولى حجموا المهم يفيدك و راح يكون مساعد ناعك ن في التنظيم ... الوغ ابدايه بدون تردد ... و رديلي الخير فيما بعد ... كاين بزاف لي بداوه و عجبهم و داروولي الكوراج نبداه ... نسيت باش نقولكم نستعمل Stylos  كحل و الوان و هذا ماكان يعني ماشي حاجة كبييرة ... الوغ انطـــــــــــلقوا الى Bullet Journal  ... و قولولي رايكم.

اذا حابين شوفوا Mon Bullet journal 2017  ادخـــلوا هنـــآ 

الوغ وصلنا لنهاية موضوع اليوم ... انشاء الله يكون فادكم الموضوع و فهمتوا واش هوا ال Bullet Journal  وواش يدير ؟ ... و لي مازال ما فهمت تقولي في كومنتار هنا ولى ف الفايسبوك ... ولى تبعثلي على ال E-mail  تاعي في Contactez moi  الفوق ... و شوفوا ال Vidéo  هاذي بالاك تساعدكم كيما ساعدني ... و لي حابة شوف اكثر تكتب Bullet Journal  في ال Pinterest  ... انا نزيد نديرلكم الكوراج باش  تبدوه و شوفوا ال Vidéo  هاذي ... و رايكم يهمني خلولي رايكم في ال Commentaire  . 

ما تنـــــــسوش تابعوني في Instagram / twitter/ snapchat / pinterest  عـــلى  ... و اديــــروا جـــــآم في لاباج فايسبوك ... و تنظموا GROUPE  تاعنا ... تلقاو الرابط التحت .

.