♥ JE VOUS EN PARLE N°13 ♥ : Comment Commandé En Ligne Sans Carte de Crédit

ســـلام البنات انشاء الله تكونوا ملاح ... و بخير و على خير ... توحشت نكتبلكم والله و اليــوم جيتكم بموضوع جــديد ... الموضوع الي كامل حبيتوه و راكم تستنوا فيه ... موضوع على كفاش تشروا من الانترنيت بلى Carte de Crédit  يعني بدون ما تحتاجوا لا Master Card  ولى أي شيء ... ولى حتى Compte ccp  ... اليوم جيت باش نفصلكم كامل الحاجات لي حابين تعرفوها حول هاذ الموضوع .

انا جربت هاذ الحاجة منذ شهر ... يعني حبيت نجرّب انا من دراهمي يعني ما  Partenariat  ولى Collaborations  يعنــــي نحط دراهمي في هاذ الحاجة باش نقول صح جربت هاذ الشيء ... و بلى ما نغش ... خاطر Les Partenariat  ما نقدروش نديروا فيهم ثقة بزاف   ... المهم ما خابش ظني لا من الموقع ولى من La Page  لي جوزتلي La Commande   راني  راضية و نعاود هاذ التجربة باذن الله .

الوغ نجوزا للموضوع تاعنا ... كيفاش تشروا En Ligne  بلى ما تحتاجوا Une Carte de Crédit  ولى حتى Compte ccp  يعني اقل حاجة .

أولا كاين صفحات يعني Des Pages Facebook مختصين و يخدموا باش يديروا La Commandes  في بلاصتكم ... يعني هي عندها Carte de Crédit  وجوّز La Commande  ف بلاصتك انتي ... كاين بزاف صفحات تاع الثقة .. الأولى لي درت منها La Commande  لي هي Shopping En Ligne DZ  ... و كاين Ma Petite BoutiqueEn Ligne Dz  ...  ( Cliquer  على آسمهم تروحوا مباشرة للصفحات هاذوا ) ... الوغ كيفاش اديروا Commande  عندهم :

-         كل صفحة عندها مواقع تخدم بيهم ... بصح كامل يخدموا ب Aliexpress  الوغ ناخذوه كمثال.

-         تروحول للموقع Aliexpress.com  ... و شوفوا واش راكم حابين تشروا... حوايج ديكور اكسسورات ولى أي شيء .

-         من بعد ما تلقاو حاجة عجبتكم ... اديروا Copier coller  على Lien  الرابط تاع هاذيك الحاجة لي خيرتوها ... و تبعثوا ال Lien  لي درتولوا Copier  للصفحة هاذيك ... و هي تمدلكم السعر تاع هاذيك الحاجة بالدينار ... من بعد شوفوا انتم اذا يساعدكم السعر ... ولى لا لا ... و تقدروا تبعثوا اكثر من Lien  ماشي شرط واحد برك... و توقلكم ثاني اذا الرابط تاع هاذيك الحاجة Fiable  ولى لا لا ؟ يعني اذا هاذاك الرابط تاع الثقة ولى لا لا ... يعني لي شراو من عندوا بزاف الناس. 

-         اذا ساعدكم السعر و حبيتوا تشروا هاذي الحاجة ... تقولولها حبيت نديها ... تمدلكم المعلومات تاعها ... يعني آسمها لقبها ... و Numéro de ccp  تاعها باش تبعثولها الدراهم .

ملاحـــظة : رقم الحساب البريدي يعني Numéro de compte ccp  هاذاك هو لي راح يمكنكم تبعثولها دراهم فيه ... يعني هو الصح ... كي شوفوه ما تنخلعوش .

-         تنقلوا المعلومات قس ورقة و ترحوا للمكتب البريد La Poste  .

-         بعد ما توصلوا تقولوا للعامل فماك حبيت نبعث دراهم ندير Versement  تمدلكم ورقة كيما راكم شوفوا فيها التحت ... و هي تفهمكم اذا كانت اول مرة في حياتكم اديروا هاذ الحاجة .. يعني و انا راح نزيد نفهمكم كيفاش تعمروها .

-         كيما راكم شوفوا في الخانة لي راني كاتبة فيها 1 تكتبوا آسمكم لقبكم ... و العنوان لكن ماشي شرط بالتفصيل ... يعني وين تسكني برك ( ما يسحقوهش بزاف )

-         و في الخانة 2 تكتبوا آسم و لقب لي مدتهولكم مولات La Page  .

-         و في الخانة 3 تكتبوا Numéro de ccp  لي مدتهولكم .

-         في الخانة 4 تكتبوا المبلغ لي راكم رايحين تبعثوه.

-         و في الخانة 5 راح تكتبوا فيه ترايخ اليوم لي رايحين تبعثوا فيه.

-         و في الخانة 6 ديروا X  في خانة الدفع.

-         توقعوا على الورقة ... و تمدوها للعـــآمل و هو يكمل باقي الاجرائات .

-         من بعـــد يمدلكم ورقـــة كيما راهي في الصورة تثبت بلي خلصتي صح يعني هي الدليل و الاثبات ... و ما ترميهاش ... يعني احتفظي بيها .

-         بعد ما توصلي للدار ... صوري الورقة هاذيك و ابعثي الصورة للصفحة ... و هي منبعــد تاخذلك La Commande  ... وتقولك بلي La Commande  تاعك خلاص جازت.

- بالطبع راح تمديلها ... اسمك لقبك و العنوان تاعكم بالتفصيل الممل ... و  الرمز البريدي ... و كيف كيف رقم الهاتف . 

هذا ما في الامر أشياء تبانلكم معـــقدة و هي ما معــقدة ما ولوا ههه ... غير اديروها اول مرة راح تعودوا عليها و تفهموا بلي الحالة ماشي صعـيبة .

ملاحــظة : اذا مدولك ورقة أخرى غير هاذي ... قوليلهم بفهموك كيفاش تعمريها خدمتهم هاذي ... ما تحشميش منهم ... و كيف كيف اذا مدولكم كيما هاذي و ما فهمتوش كيفاش تعمروها قوليلهم يفهموك . حاجة بسيطة . جدا.

ضرك نمدلكم مجموعة من الإجابات على الأسئلة علبالي راح تطرحوها عليا :

-         تقولولي ما عنديش Compte ccp  كيفاش ندير نبعــث ل  ccp  تاعها ؟ ماراكيش محتاجة يكون عندك Compte ccp  باش تبعثلي لي عندهم Compte ccp  خاطر ماكان ما دخل هاذي في هاذي ... مثلا انا عندي Compte ccp   و باش نبعث لاوم نخرج دراهمي من ال Compte  باش نبعث ... يعني دراهمك من ال porte monnaie  للعامل في La Post  يعني هاذي بلى ما يكن عندك Compte ccp  باش تبعثي ... يعني أي واحد يقدر يديرها.

-         تقولولي توصل للدار ولى La Poste  ؟ ... انا نقولك يوصلك للدار اشعار بالوصول كيما لي راه في الصورة ... منبعد ترفدوه لازم قبل 15 يوم ترفدوه و تدوه La Post  تمدوه للعامل فماك يمدلكم ال Paquet  تاعك .

-         كيفاش نعرف بلي La Commande  وصلت ؟ ... بهاذ الاشعار بالوصول تعرفي بلي La Commande  تاعك وصلت .

-         شحال طول باش توصل ؟ ... انا وصلوني في شهر و شوية و مرات شهر بالظبط ... يعني شهر وشوية أيام ماشي بزاف ... هاذيك هي ما جي توصل من الصين La Chine  ... و اذا ما وصلتش قبل 55 يوم عندك تعويض.

-         راح تسقسوني اذا La Livraison gratuite   ولى تخلصي ؟ …  كاين وين التوصيل مجاني و كاين وين تخلصي حق التوصيل ... يعني انت و الموقع لي شريتي منوا ... بصح Aliexpress  ديروا Livraison gratuite  افضل .

ضرك نمدلكم مجموعة من الحاجات حول الصفحات لي تقوم بهاذ العمليات:

-         هاذ الصفحات ما عندهمش حانوت Magasin  ... يعني كلشي En Ligne  .

-         هاذ الصفحات الأشياء ل يبيعوهم مثلا Les Huda Beauty  ما عندهمش في الدار ... يعني كامل في الموقع و الموقع هو لي يبعثهم ماشي هي راهم عندها في الدار و تبعثهملكم ... و بالتالي ما تقدروش تشروا عليها En Main a Main  هاذي حاجة مهمة لازم تعرفوها كامل... يعني تتلاقوا بيها و تمدلكم الحاجة لي حابين تشورها.

-         هاذ الصفحات كامل تخدم بهاذ الطريقة لي حطيتها الفوق .

الوغ نعاود نحطلكم الخطوات باختصار :

-         ديروا Copier collet  على رابط Lien  تاع الحاجة لي راكم حابين تشورها من الموقع ( أي موقع )

-         ابعثوا الرابط هاذاك للصفحة لي حابين توقملكم بالعملية .

-         تمدلكم السعر بالدينار ... و اذا عجبكم السعر و ساعدكم تقولوها بلي راكم مستعدين تشروها .

-         تمدلكم المعلومات اللازمة باش تبعثولها السعر المطلوب ... المتمثلة في الاسم اللقب و رقم حساب البريدي Numéro de ccp  .

-         تروحوا لمكتب البريد حاملين معاكم هاذ المعلومات ... و يمدورلكم ورقة تعمروها بهاذ المعلومات و تبعثوا دراهم .

-         يمدولكم ورقة ... تثبت بلي خلصتوا ... تبعثوها للصفحة و هي ت Commandé  واش راكي حابة.

و هذا ما في الامر ... يعنـــي شيء بسيط جدا ... و انشاء الله نكون كفيت و وفيت في المعلومات لي كامل تحبوا تعرفوها ... و لي  عندها أي استفسار و لى أي حاجة حابة تعرفها ... تطرحها عليا في Commentaire  هنا ولى في La Page facebook  ولى تبعثلي E-mail   الفوق وين كاين Contactez moi  ... و انا انشاء الله نجاوبكم على كامل الأسئلة ... يعني هذا موضوع يهم العديد من البنات ... و لي عندها Master Card  تعيشوا قولولي كيفاه درتوا حى جبتوها خاطر شحال و انا نحوّس و مازال ما فهمت ... يعني Master Card  ولى أي Carte de Crédit  ... و شكرا ... اشاء الله تكون فادكم الامر و الموضوع و كيما قلت انا مستعدة نجاوب على كامل الأسئلة اللازمة... و لي دارت من قبل Commande en ligne  تقولنا على التجربة تاعها و واش من Page شرات منها. 

نلتـــقي في موضوع جديد انشاء الله ... لي راح نوريلكم un Petit Haul  ... و نزيد نجاوب على اسئلتكم مليح . 

ما تنـــــــسوش تابعوني في Instagram / twitter/ snapchat / pinterest  عـــلى mlle_yasmina  ... و اديــــروا جـــــآم في لاباج فايسبوك ... و تنظموا GROUPE  تاعنا ... تلقاو الرابط التحت .

.