♥ JE VOUS EN PARLE N°14 ♥ : La Brosse Tangle Teezer

ســلام البنات .... انشاء الله تكونوا ملاح و بخير على خير ... توحــشتكم بزاف بزاف ... و ران فرحانة لي اني عاودت وليت باش نكتبلكم موضوع جــديد يفيدكم انشاء الله ... هذا هوا اول Article  رايحة نكتبوا في العام 2017 ... الوغ لازم نتمنالكم عام سعيد Malgré  جانفي راه قريب يخلاص ... بصح لاوم نتمنالكم عام سعيد معمر بالسعادة و الفرح و لازم تكونوا متفائلين بهاذ العام الجديد ... و لازم تنساي كامل واش صرالك في 2016 ... خاطر ماشي كامل العوام كيف كيف ... و احمدي لي ربي مدلك عام جديد تعيشيه ... الوغ عندك فرصة ثانية باش اديري حاجات بزاف بزاف ... الوغ لازم يبقى عندكم امل في كل حاجة و حافظوا على الابتسامة تاعكم خاطر هي الصح ... و اتفكروا بلي كاين وحدة آسمها ياسمين تحبكم و تموت عليكم و تحب شوفكم كامل هايلين و شاطرين .

الوغ موضوع اليوم راح نهدروا فيه على مشكل البنـــآت كامل بدون استثناء ... لي هو شعر المكشرد ... ولى الشعر كي يتخبل ... و ما يحبش يسلك ... كامل عندنا هاذ المشكل ... خاصة اذا قعدنا مدة مليحة ما مشطناش شعرنا ... الوغ في هاذ الموضوع القصير انشاء الله راني رايحة نهدر على مشطـــة سحرية و الله Magique  ... بزف منكم يكون سمع بيها عند Les Youtubeuse  تاع الخارج ... بصح مازال ماشفتش Des Bloggeuse  ولى Youtubeuse  هدروا عليها ( راني نهدر على روحي ماشفش بصح بالاك كاين لي هدروا عليها ) ... مع ان راهي كاينة في الجزائر ... واكاين بزاف شراو منــها ... اليوم نهدرلكم عليها باش اذا شفتوها مرة اخرى تعرفوا بلي هاذي ماشي كيما الاخرين . 

هاذ المشطة هي La brosse tangle teezer  ... كيما راكم اشوفوا في الصورة الشكل  تاعهـــآ .... ضرك تقولولي هاذي Brosse  كيما الاخرين واش فيها زيادة ؟ ... انا نقولكم بلي فيها 100 فرق على Les Brosses  الاخرين ...  من نهار وليت نستعملها ما ولاش عندي مشكل مع شعري باش نسلكوا و بدون الم يعني هاذي تزيدلها التميز ههه كي تسلكي بيها شعرك ما توجعكش  ... يعني تحـــفة ... الوغ واش يخلي هاذ La Brosse  متميزة على الاخرين ؟

-         السنان تاعها طرييـــن يعني Souple  خفاف على الراس كي تمشطي بيها ما تحسيش و ما توجعكش في راصك تسلكي بيها بدون الم .

-         الشكل تاعها يخليها سهـــلة كي تحكميها و تستعمليها ... و تمشطي بيها شعرك .

-         مهما كان شعرك مخبــل تسلكهولك ... بلى ما توجــعك ... حتى و ان كان ناشف .

-         بزاف منكم يرقدوا شعرهم متلـــوق ... كي ينوضوا ينخلعوا ههه امشطي بيها اشوفي شعرك كيفاش يهبط في  5 ثواني .

-         مرات بــعد ما اديروا Brushing  شوفوا شعركم يطاير وحــدوا ههه راكم عرفين هاذوك الشعريات لي يطلعوا ... كي تمشطي بيها يهبطلك بلى ما تكشري راصك .

-         تمشطلك شعرك من الجذور بلى ما توجعـــك .

-         ما تكسرلكش شعرك و لى ... على العكس تساعدوا يهبـــط .

هاذوا لي قدرت نلخـــصهملكم ما هي و الله انتم و تدهــشوا فيها شحـــال مليحة ... خاصة لي عندهم شعـــرهم جاف ... ولى عامر ولى طويل ... و ناشـف و بسيف باش يتسلّك ... رايحة تسهل عليكم حياتكم ... و غير تستعمليها مرة راح تتخلاس على كامل Les Brosses  لي عندكم في الدار .

ملاحــظة :

قبل ما نشري هاذي لي راكم شوفوا فيها في الصـــورة ... ساومت وحدة شفتهـــآ En Ligne   عجبـــتني ... قالي 3000 دج زعمى الأصليــة ( ما نقولش آسم الصفحة ولى La Boutique  ) ... المهم انا تاعي شريتها 300 دج ( ثلاثين الف ) و تصيبوها حتى عشرين الف 200 دج ... و تخـــدم كيما تخدم الاصلية و راني راضية عليها ... الوغ ماكان علاه ترمي 3000 دج ( ثلاث مائة الف )  ولى شحال على جال Brosse   لي تقدري تشريها ب 300 دج و تخــدم نفس الخدمة و تعطـــيك نتائج مليحة كيف كيف ... قبل ما تشروا حوسوا مليـــح .

و ثاني حلّي العلبة و شوفي ولى السنان تاع La Brosse  طرايا ... ولى خشان ... راكم تعرفوا كيفاش يكونوا طرايا ... يعني يتعوجوا بسهولة ... خاطر اذا شريتيها  و سنانها خشان ما درتي والوا ... الوغ قلبوا مليح قبل ما تشروا كيما مضاري نقولكم .

باختصار هاذ La Brosse  رايحـــة تساعدك سواءًا كان شعر ناشف ولى مبلل ... تساعدك تسلكي شعــرك بسهولة و بدون الم ... كيف كيف رايحة تساعدك انوا شعرك يهبــط و يولي شباب مهما كانت حالتو قبل المشـــيط ... كامل تقدروا تستعملوها حتى اذا كانت عندك اختط صغيرة ولى بنتط و لى حفيدتك ... رايحة تسلكيكلها شعرها بلى ما توجعيها .

انشاء الله يكون عجــبكم الموضوع و فادكم ... و انشاء الله هاذ المرة نعود ليكم بقوة ... ولي جربت هاذ La Brosse  من قبل ما تنســـيش تقولينا رايك فيها في كومنتــــآر ... و لي عندها سؤال تطرحوا في كومنتار هنا ولى في الصفحة و الى اهبــطي التحت تلقاي Contactez moi  ابعثيلي في ال E-mail  تاعي وانشاء الله نجاوبكم كامل .

ما تنــــسوش تابعوني في Mes Reseau facebook/twitter/instagram  ما علـــيك غير clique  صغير على احــد هاذ Les Icons  التحــت ... و في Les Coté  كامل وين تقدروا تابعـــوني ... خاصة على الفايسبوك .
نحبـــكم حبوباتـــــي اتهلاو في رواحكم تحـــــــــبكم بزاف بزاف . 

.