♥ FASHIONS FAUX PAS N°1 ♥ : Les Chaussettes & Les Baskets

ســــــلام الفريزات ... انشاء الله تكونوا بخير ... نعتذر على هاذ الغيبة و الله كان عندي شغط نفسي بسبب و بدون سبب ... الوغ هاذ المرة تغلبت على روحي و عاودت وليتلكم انشاء الله ... انشاء الله مازلتوا تحبوا تابعوني ههه و ما سمحتوش فيا ... المهم مرحبا بكل وحدة راهي تقرى راني حابة نقولك لوكان ماشي انت لي بقيتي وفية ليا و الله ما نوضل لحتى بلاصة ... الوغ شكرا ليكم كامل فريزاتي الحبوبات ... ربي يحفظكم ... انشاء الله

الوغ كيما راكم شوفوا اليوم عندنا فقرة جديدة في ال Blog   كيما راكم شوفوا آسمها Fashion faux Pas  يعنـــي كل مرة نجيبلكم خطأ كامل ممكن نوقعوا فيه و ما نفيقوش ... و انا نلاحظ بزاف بنات يوقعوا فيه و ماشي فايقين ... انشاء الله تكونوا فهمتوا ... و يعجبكم ال Concept  تاع هاذ الفقرة .

الوغ اليوم راني رايحة نهدر على حاجة نلاحظــها بزاف بزاف و كامل درناها و ممكن نديروها بلى مانفيقو ... و لي هي التقاشر ( عزكم الله ) و ال  Basket  ... يعنـــي تلبسوا تقاشر مع ال Basket  و يجوا يبانوا ولى مثلا صباطكم بيض و التقاشر لونهم ازرق ولى وردي ... كي نقول Basket  راني نقصد كامل الأنواع من ال Converse  للاخرين كامل كيف كيف جملتهم في كلمة وحدة هي Baskets  .

ملاحظة: راني نسلط الضوء على هاذ الخطأ ... و كاين لي راهم يقولوا بلي هاذي حاجة تافهة ... ولى ماعلاليش كفاش تبانلهم ... بصح امنوني هذا Un Grand Fashion Faux Pas  ... خاطر ساعات تكونوا لابسين و حطة ... و هاذ الخطأ يفسدلكم كلش ... الوغ راني نسلط الضوء على هاذ الشيء خاطر مهم  Malgré  صغير  ... خاصة ضرك جاء الربيع و الحال شباب يعني هاذي هي اول نصيحة تاع الربيع نقدمهالكم.

الوغ هاذ الأخطاء هي :

-         لون تقاشر يكون غير لون ال Basket  لي راكم لابسينها ... يعني و يجي تضاد لوني كبير بناتهم ... مثلا ال Basket Rose  و التقاشر Noire  .

-         التقاشر يكونوا طالـــعين بزاف بزاف على ال Basket  يعني يوصلوا لل La Cheville  تاعكم ( العضمة لي في رجلكم هه ماعلباليش واش يسموها )

-         التقاشر يكونوا طالعيـــن و زيد فيهم كتبة واضحــة تبان .

-         تكونوا لابسين تقاشر فيهم كتبة و طالعين بزاف ... و زيد تقشطوا سروالكم يعني تطوا السروال ولى تلبسوا سروال قصير .

هاذوا هوما الاخطـــآء الشائعة لي قدرت ناحظ البنات بزاف يديروها ... الوغ كيفاش نصحوهم ؟ ... حاجة ساهلة ماهلة تبعي النقاط لي راني رايحة نكتبهم التحـــت راح اجيك ساهلة ماهلة كيفاش تصححي الخطأ و تتجنبي ما توقعيش فيه ... و تكون اطلالتك رائعة و بدون أخطاء .

-         اشري تقاشر يجوا سو اسوا مع فم ال Basket  يعني يجوا قصار و مايبانوش كامل ... كامل راكم شايفين منهم ... يجوا هابطين ... تلقاوهم عند الرجال هوما لي عندهم هاذ النوع .

-         اعتمدي على اللون الأبيض و الأسود كي تشري التقاشر ... بصح ركزي اكثر على الأبيض ... و اذا عندك Basket Noire  اشري تقاشر Noire  كيف كيف ما تلبسيش معاها الأبيض ... اما الباقي أي لون الأبيض ينفع معاهم ... حتى ال Gris  ينفع بصح ماشي دائما .

-         اذا شريتي التقاشر لي قتلك عليهم في اول نقطة ما يهمش اذا فيهم كتبة ولى لا لا خاطر ما يجوش يبانوا من ال Basket  كامل الوغ مايهمش .

-         اذا خانك الزمان و اضطريتي تلبسي تقاشر طالعين مع ال  Basket  ما تقشطيش سروالك ولى تلبسي سروال قصير ... هبطيه و Camouflé  بيه و مايجوش يبانوا كامل و راكي سلكتي روحك .

-         Les Bas  ولى Les Colon هاذوك الشفافين ... كيف كيف ينفعوا بصح انا ما نحبهمش خاطر يزلقوا شوية ... بصح ينفعوا كيف كيف .

ملاحظة : فكرة انك تلبسي ال Basket بلى تقاشر فكرة مليحة ... بصح مع الوقت راح رجليك يتخسروا ... الوغ من الافضل تتجنبوا اديروا هاذ الحاجة . 

الوغ هاذوا هوما النصائح لي قدرت نجمعهملكم هاذ المرة ... انشاء الله يكونوا نفعوكم و نبهتكم لحاجات انتم ما رديولهاش البال ... انشاء الله هاذ ال Concept  عجــبكم و فادكم ... هكذا باش يكون ال Look  تاعكم Parfait  ... انشاء الله نزيدلكم حاجات واحد أحين نهدروا فيهم.

وصلنا للنهاية فريزاتي ... انشاء الله يكون عجبكم الموضوع ما تنسوش تقولولي اذا عجبكم الموضوع ... و لي عندها حاجة حابة نهدروا فيها تقولهالي هنا ولى في ميساج ... نتلقاو في موضوع آخر حبيباتي فريزاتي و تهلاو في رواحكم ما تنسوش تابعوني على Instagram/Snapchat/ twitter  في mlle_yasmina  ... باش تكونوا معانا دائما ... و ديروا جـــآم في La Page facebook  ... باش تلقاوهم ما عليكم غير Un petit clique  على هاذ Les Icons  لي رااهم التحت ... نحبكم فريزاتي .

الفريزات هو آسم اللمة تاعنا لي ما تعرفوش معناه ماراكيش معانا في الفايسبوك ... ما عليك فير تابعينا رانا قريب 15 الف فريزة ... نحبــــــكم فريزاتي أينما كنتم 

.