♥ JE VOUS EN PARLE N°15 ♥ : comment utilisé Snapchat

ســلام فريـــزاتـــي... انشاء الله تكونوا كامل بخــير و على خير... و الحمد الله على كل حال.

اليوم جبـــتلكم موضوع و حــآجة ممكن كامل تفيدكم ... علبالي بلي كامل تحبــوا ال Snapchat  و كامل ماذابيكم تستعــملوه بصح ماشي كامل تعرفوا تستخدموه... ولى جــربتوا كامل و ما قدرتولوش …  اليوم جبـــتلكم Un Article فيه كامل المعــلومات و كامل تفاصيل تاع كيفـــآش تستخــدموه ... و انشاء الله تفهــموه مليح و شوفوا بلي ساهل ماهل ...

ولي مضاري يستعملوها ابعثوا ال موضوع للصحباتكم لي ما يعرفوش.

الوغ نبــداو

الــوغ اول حــآجة بعد ما طــلعوا ال Application  .. خــرجلكم هاذي ... اذا كان عنــدكم Déjà un compte   ديــروا Connexion  ... يعني طلعتوا ل App  من قبل و سجلتوا رواحكم منبعـد عاودتوا Supprmito  ال App  ديروا Connexion  

و اذا اول مرة ديروا Inscriptions  .

منــبعد اكتـــبوا Le Nom & prénom  لي تحــبوه ... ماشي شرط يكون آسمكم الحقيقي ... اكتبوا واش تحــبوا ... من بعد ديروا Je m’inscris et J’accepte  

منبــعد تخرجلكم هاذي ... كيف كيف تحــبوا تحــطوا La Date de naissance الحقيقية ولى أي Date  اوبرك .

بعــد ماجوزوا المرحــلتين هاذوك ... تخــرجلكم هاذي باش تخيروا  Un Nom D’utilisateur  و هنــآ خيروا واش حتحـبوا ... خاطر هاذوا هو المهــم و هذا هو لي بيه الناس يقدروا Y’ajoutiwkom  بيه كيما انا دايرة ... mlle_yasmina

كي تبداو تكــتبوا راح تخرجلكم من التحـت اذا هاذ ال Nom  كاين من قبل ولى لالا ... يعني اذا خرجــتلكم كتبة بالاحمــر ... يعني هاذ ال Nom   كاين واحدخرين استــعملوه ... و اذا ما خرجلكم ولوا معنـــآه هاذ ال Nom  تقدروا تستعملوه .

منــبعد هنا تخيروا ال Mot de passe  لي تحـبوه و لي تقدروا تحــفظوه .

منــبعد تخرجــلكم هاذي باش اديــروا رقم الهاتف تاعكــم ... اذا ما كنتوش حابين تحــطوه ... هي واحــد ما يقدر يشوف رقمــك بصح اصدقائكم لي عنــدهم رقم الهاتف تاعكم+ عندهم Compte Snapchat  يلقاوكم بسهولة عن طريق الرقم .

و اذا ما كنتوش حابين تحــطوا رقم هاتف تاعكم ... شفتوا هاذيك الكتبة بالازرق ؟ S’inscrire avec une adresse e-mail  ؟ اضغــطوا عليها باش تسجــلوا عن طريق ال E-mail  في عوض رقم الهاتف ... بصح طريقة رقم الهاتف انا نظن هي الاسهل .

اذا درتــوا Par E-mail  لازم تروحوا للبواطة تاعكم باش T Confirmiw  ال Compte  تاعكمـ

منبــعد تخرجلكم هاذي باش تثبتولهم بلي ماشي Robot  و خلاصت مرحــلة التسجـــيل ... المرحــلة لي فيها شوية 

خــدمة اما الباقي كامل ساهـــل مـــآهل .

تخــرجلكم هاذي  Trouver Vos Amis  اذاا حليتوا تلقاوهم ديروا Continuer  اذا ما حبيتوش ديروا Passer  راهي من الفوق كامل على اليمين .

ضرك المرحلة الثانية لي هي كيفاش تستعمــلوا ال Snapchat  و وين ت Ajoutiw  و كامل التفاصيل .

الوغ بعد ما تكملوا مرحلة التسجيل ... يخرجلكم هاذ الشيء كيما راكم شوفوا في الصورة ...

هاذيك الدورة البيضة في الوســـط هاذيك باش تلتقــطوا الصور يعني باش تصوروا ... و اذا حبيتوا اديروا Vidéo  نفس الدورة البيضة هاذي بصح ابقاو حاكمي فيها بزاف كيما في ال Insta Story  ... حتى تبدى خرجلكم هاذيك الحاجة الحمرة تاع تبينلكم بلي ال vidéo  راهي تتصور .

بعد ما تلتقطوا الصورة ولى الفيديوا تخــرجلكم نفس واش راكم شوفوا في ال Capture d’écran  ... باش تكتبوا ... حطوا صباعكم على الصورة يخرجلكم باش تكتبوا Un texte  ... و كاين بزاف Les Outils  من الفوق باش ترسمــوا و باش تحطوا Des Emojis et des Autocolant  

اذا خذيتوا صورة تقدروا تخيروا La Duré  تاع ال Photo  يعني شحال راكم حابــين متابعينكم يشوفوها عندكم الوقت من 1 ثانية الى 10 ثواني .

بالنسبة لل Les Vidéos   كامل فيهم 10ثواني فقط

الوغ تقدروا تحتفظوا بالصورة ولى الفيديوا ... اضغطوا برك على Enregistrer  ... و باش Tajoutiw  في La Sotry  اضغــطوا على Story  ولى Envoyer à  اذا حابين تخيروا ليمن حابين تبعــثوها .

ضرك كيفاش Tajoutiw  في ال Snapchat  حاجة ساهلة بزاف

راكم شوفوا هاذاك ال   الأبيض لي قدام Recherche  اضغطوا عليه

يخرجلكم هاذ ال Menu  ..

روحوا وين كاين Ajouter des Amis  ... و اضغطوا عليها ...

يخرجولكم هاذ الخيارات كامل ... ديروا Ajouter par Nom D’utilisateur  ... و هنــآ اكتبوا Le Nom D’utilisateur  

مثلا انا تــآعي mlle_yasmina  ... نكتــبوا في  Recherche  ... يخرجلــي من بعد ندير Ajouter  و خلاص راني AJOUTIT  لي راني حــآبة .

كاين طريقة وحد آخرى Tajoutiw  عن طريق Le Snapcode  ... طلعوا الصورة لي فيها هاذاك الأصفر هذاك هو Le Snapcode  ... اضغطــوا عليها و هو راح يلقاه و Yajoutiw  بسهولة .

 

ضرك وين تصيبوا و كيفاش شوفوا Les Stories  تاع لي Ajoutithm  ... راكم شوفوا هاذيك البنفسجية لي من التحت على اليمين ؟ هاذي هي اضغطوا عليها ... ولى بصبعــكم حركوا يدكم من اليسار الى اليمين يعني كيما مضاري Defiliw  بصبعكم باش شوفوا الصور و كامل ...

تخرجلكم هاذي هنا تلقاو كامل  Les Stories  تاع الناس لي تبعتوهم ... ماعليكم غير تضغــطوا عليهم ... و يبداو يخرجولكم Les Snap  تاع الناس لي ضفتوهم.

وكاين كيف كيف على اليسار من التحــت  Chat  هنا تلقاو كامل Les chat et les messages  لي الناس بعثوهملكم ... بصح Une fois   تخلوا المساج و تقراواه الميساج ي Tsupprima  بمجرد انكم تخرجوا منــوا ... حاجة مليحة يعني والوا ما يبقى .

كيفاش اديروا Les Filtres !  .. الساهلة كامل ... دوروا الكاميرة Frontal  يعني باش تاخذو ال Selfie  ... وقبل ما تصورة اضغطوا على وجهــكم يخرجولكم  Les Filtres  من التــحت و خيروا لي عجبكم ... منبعد اتصوروا عادي ...

 واذا عجبتكم الصورة و حبيتوا تحتفظوا فيها بصح ماشي حابين اديروها في ال Snapchat stories  ... اضغطوا على Enregistrer  ... من بعد شوفوا الفوق عى اليسار كاين هاذي X  ... اضغطوا عليها و تخرجوا من الصورة تكونوا احتفظــتوا بيها و ما درتوهاش في ال Stories  ههه انا هاذي دائما نديرها .

تقدروا تروحوا لل Paramètre  ... و تخيروا شكون يقدر يشوف Les Stories  تاعكم ... و شكون يقدر يبعثلكم Les Chat  .. ولى Public  ولى Vos Amis  برك يعني الناس Li Ajoutithom  ... يعني اذا كاش واحــد Ajoutakom  لازم حتى اديروا Ajouter  باش يبداو يشوفوا Vos Stories  ... و اذا حبيتوا يكون Public  ماشي شرط اديروا Ajouter  باش يشوفوا Vos Stories  بصح انا ننصحكم ما اديروش Public  .

وين تصيبوا الناس لي Ajoutawkom  ؟؟ ... كيما قبيلى  روحوا وين صبتوا وين Ajouter des Amis  هبطوا للتحت يخرجلكم ال Menu   روحوا لل Il m’ont Ajouter  ... تلقاو شكون Ajoutakom  .

كيما فهمتكم ... اذا درتوا Amis  برك ... و آجوتاوكم لازم اديروا Ajouter  باش يشوفوا Vos Stories  ... و اذا درتــوا Public  ماشي لازم اديروا Ajouter  تقدروا تخلوهم فم بلى Ajouter  و يشوفوا Vos Snap  .

ملاحـظة :

-         اذا درتــوا Capture D’ecran  و انم شوفوا La Stories  تاع كاش واحد راح تخرجلوا بلي درتوا Capture  ... يعني ننصحكم ماديروش Capture  على تصاورهم ولى وجهم خاطر يعرفوا شكون دار Capture  .

-         بالنسية لل Les Snap  يبقاو 24 ساعـــة و يروحوا .

انشاء الله يكون فادكم الموضوع تاع اليوم و فهمتــوا شوية كيفاش تستعملو ال Snapchat  و لي عنــدها أي سؤال تحــطهولي هنا في كومنتار ولى تبعثلي في La Page  ... انشاء الله نزيدلكم موضوع واحد اخر باش نوريلكم تفاصيل اكثر ... ما تنسوش تشاركوا الوضوع مع صحباتكم ... و لي عندها Snapchat  و مضاري تخدم بيه تبعث الموضوع لصاحبتها هكذا باش نفيدوا بزاف بنات .

الموضوع خلاص فريزاتي نتلقاو في مضوع جــديد ... و ما تنسوش تآجوتيوني في ال Snapchat  ... على mlle_yasmina  ... و في الانستــغرام كيف كيف في mlle_yasmina  و ما تنسوش راني زدت حاجة جديدة في La Page  وهي Bots  في ال Messenger  باش نقدر نبــعثلكم كامل الجـــديد و بزاف صوالح ممكن تفيدكم ... وباش نقدروا نتواصلوا بسهولة ... الوغ ادخـــلوا هنـــآ Messenger bots  ... و ديروا Démarrer  ... شوفوا الفوق راني درتلكم الرابط

ما نسوش تابعوني في Mes Réseau  خاصة في الفايسبوك نحـــــــبكم فريزاتي ... اتهلاو في رواحــكم بزاف بزاف

اضغـــطوا هنـــآ باش تابعوني في كل مكـــآن ♥ ♥ 

.