♥ CONSEILS MODE N°4 ♥ : واش نلبس في هاذ الحال !!!

ســــــلام البنات ... انشاء الله تكونوا بخــير ... و الحمــد الله على كل حال ... توحشــت نكتبلكم حنوناتـــي ... و فريزاتي .... ( اذا ما فهمتيش واش معناها فريزاتي معناها ماكيش معانا في فايسبوك و الانستغرام ... الوغ تبعينا باش تكوني معانا فريزة )

الوغ كيما علبالكم هاذ الحال تلفهانا مرة سخــآنة مرة برودة ... و كاين حابين يشروا للربيع و ماصابوش واش يشروا ... الوغ اليوم الموضوع تاعنا ... شوية أفكار على شوية حوايج تقدروا تلبسوهم في هاذ الحال ... انشاء الله يعجبوم و يفيدوكم شوية ... و هاذ الموضوع للمحجابات و للغير محجبات ... انشاء الله يعجبكم ... الوغ نبداو .

اول حاجة – Les Vestes الخفاف تاع صوف ولى القطن –

انا هذا واش نحب في هاذ الحــآل ... ينفعــوا بزاف ... خاصة للبنات لي يخرجوا صباح بكري ... تلبسيها فوق واش راكي لابسة Liquette ولى Chemisier ... و اذا حكماتك السخانة تنحيها ... انا هاذوك الخفاف نديرها داخل الصاك ... و الله تنفع ... و زيد هايلين Pour un Spring Outfit .

ثانـي حاجة – Les Chemisier en foulard ولى En Coton -

المهم القماش مايهمش راهم بكل الأنواع و Les Modèles ... ملاح في هاذ الوقت خفاف و ما تكسري شراصك معاهم بزاف ... مع واش تلبسيهم ولى واش تلبسي معاهم ... يعني هي و سروال Basket ولى Babouche ... و هي فرات ... و زيد هوما لي يسلكوا في هاذ الحال .

ثالث حاجة – Les Kimono -

كيما Les Vestes لي هدرنا عليهم ... تقدري يكون ال Kimono من القماش عادي ولى كاين هاذوك لي خرجوا من القطن خفــآف بزاف ... تقدري تزيديه فوق واش راكي لابســة بلى ما يخربلك الحطة تاعك هه ... و كي تحبي تنحيه تطويه و اديريه في الصاك ما يعذبكش بزاف .

رابع حاجة – Les Sweat Shirt -

بصــح ماشي هاذوك المصوفين من الداخل كاين لي يجوا خفاف شوية تاع ربيع ... كيف كيف ملاح و كاين بزاف Les Modèles و ما تكسري شراصك معاه بزاف كيف كيف كيما Les Chemisier ... هذا خاصة للبنات لي يحبوا Le Style Sportifs بزاف ... هايلين

و ثاني Les Pul تاع الصوف هاذوك الخفاف ... لاح لهاذ الحال ... و ما تزيديلهم والوا خاطر هوما يردوا البرد و في السخانة ما يغبنوش بزاف .

خامس حاجة – Les Liquettes -

كاي يجوا شغل Des Puls ... تاع قطن هايلين و خفاف بزاف و يردوا البرد شوية كي يدور الحــآل ... و مختلف Les Modèles ... كاين لي يجوا عراض Evasé هاذوك راهم tendance بزاف هايلين .

سادس حاجة – Les Vestes En Jean -

كاين ثاني Les Chemisier en Jean تقدروا تلبسوهم كيما Veste ملاح لهاذ الحال و يردوا البرد ... ما تلبسيلهمش حاجة خشينة من التحت ... Si non البسي Les Vestes en Jean ... كيف كيف البسي غير تريكوا خفيف بزاف خاطر هي ترد البرد .

هاذي هي واش نقدر نقولكم ... بصفة عامة تقدروا تلبسوا Les Veste تاع الصوف تاع القطن هاذوك الخفاف ... و Les Vestes en Jean لي راهم Tendances و ثاني Les Veste Classique ... و Les kimono هاذوك شوية خشان هذا هو وقتهم .

و Les Chemisier و Les Puls و Les Sweat Shirt ... و كامل Les Liquettes الخفاف .

و كيما راكم شوفوا في الصاور تقدروا تدوا شوية أفكار كفاش تنســقوهم .

و بالنســبة للصبــآبط ... ننصحكم ب Les Babouches يعنــي Les Balrines و Les Baskets ..

وصلنا لنهاية الموضوع انشاء الله يكون فادكم الموضوع شوية ... و اديتوا فكرة ... حاولت نجمعلكم قد ما نقدر من أفكار باش اجيكم ساهلة عملية كي تروحوا تشروا ولى تلبسوا .