♥ JE VOUS EN PARLE N°19 ♥ : Comment Commandé En Ligne 2

ســـلام البنـــآت ... سلام الفريزات ان شاء الله تكونوا بخـــير و على خيـــر... و الحمــد الله على كل حـــآل... الـــوغ Malgré  درتــلكم من قبل Article  هذا.... بصــح قلت نعاودوا بطريقة مختــصرة... قبـــل ما نهبــطي راني حابة نقولك اقراي مليح ههه و ثانــــي ... ما تنسيش اديري Abonné  في ال Blog  ... ما يديش منك ثانية ... شكــرا.  

قلـــت قبل ما نديرلكم Les Unboxing  نـــديلكم Article  فيه كامل التفاصيل هكــذا باش كل ما نولي نديرلكم Unboxing  نحـــطلكم Lien  تاع هاذ L’article  هكذا باش تعــرفو الي مازالـــوا...

المهـم بلى ما نطول... كامل علبالنا بلي مكانش Carte de Crédit  في الجزائر... ولى كيما نقولوا ماشي كامل عنـــدهــم... كيـــما انا ما عنديش ههه ... كيما La Carte visa… Master card  و الخ... الـــوغ راح نشــروا بلى ما نســحقوا هاذوا...

راح نشروا من عند Aliexpress  ... Bangood  ... و غيرهــم من  المواقــع...

كيفاش ؟؟

الوغ كاين Les Pages  الــي هي تشريـــلك من المواقع هاذوا... هي عندها Carte de crédit  ... انت تخلصيها بالدينار و هي خلصلك من الموقع... المهم باش ما نخلطهاكمــش راح نشـــرحلكم الشرح المفصـــل.

نقولكم قبل ما نبدى بلي نشري بزاف من عنــد La Page → Ma Petite Boutique En Ligne DZ  ... شراتـــلي شحال من مرة و مانيش ندمـــآنة... صح ثقة... كامل نشروا من عندها انا و صحباتـــي.

Les étapes :  

-         تروحـــي للموقع لي راكـــي حباتو... ( مثلا Aliexpresse  راح ناخذ بيه المثل... واش راح نقول ينطبـــق على كامل المواقع يعنـــي مكانش فرق )

-         تخـــيري الحاجة ولى الحاجات لي راكــي حابتهم.

-         كل حاجة فيها Lien  ... انت Copier  ال Lien  تاعها ... و ابعثيه La Page  .

-         بالطبــع يــكون ال Prix  بال  Dollar  ولى Euro  ... هي تمدلك ال prix  بالدينـــآر.

-         اذا وافقـــتي على السعر... تمــدلك ال ccp  تاعها باش تخلصيــها

لحـــــــــد هنا كلشي مفهـــوم... ضرك كامل تقولولي أيـــــــــــــــــه بصح ما عنديش CCp  ؟

انا دائـــما نقولها و نعاودها... ماشي لازم يكون عندك ال COMPTE CCP  باش تبعثـــي... تروحـــي La Poste  ... تقوليلها ولى تقوليلوا حبيـــت ندير Versement  ولى تقوليلوا حبيت نبعث دراهم يمدلك ورقة كيما هــآذي... يسموها Chèque secoure  

ملاحــــظة : هاذ المرحلة تاع ال Posta  و الورقة هاذي و الله لازم كامل تعرفوها و تتعلموا تعمروها... يجي نهار وين تسحقوا تبعثوا دراهم راح تفيدكـــم هاذ الطريقة... تسمى مليح تعرفوها كامل

كفاش تعمروها ؟؟

تبعوا على حساب الأرقام لي راني دايــرتهم...

1-     كــتبوا آسمــكم و لقبــكم... و العنوان ماشي شرط تكتبوه

2-     تكــتبوا آســم و اللقب لي تمدهولكم مولات  La Page  

3-     تكــتتبي CCP  الي تمدهولك كيف كف

4-     تكتبي المبلغ بالأرقام

5-     تكتبي المبلغ بالحروف

6-     Cochiiiw  دفع

7-     اكتبي التاريخ تاع نهار هاذاك... و امضي

 

منبـــعد تمدوه للي يخدموا فما و دراهم و هوما يبعثوه ... و يمدولكم ورقة كيما هاذي... و تصوروها و تبعثوها La Page   و هي في الحين اجوز La Commande  تاعكــم.

تمـــديلها ... آسمــك لقبك... عنوانك ( بالتفصيل... يعني تفصيل ممل … code postal  ... ) ... و رقم الهاتف ...  هي جوز La Commade  تاعك في الحين.

ملاحظــة : هاذ المرحلة تاع ال Posta  اجوزوا عليها ... حتى كي تشري من عندي ولى من عند البنات لي يبيعوا En Ligne  ديريلها Capture  اذا خفتـــي تنساي.

الوغ La Commande  تاعـــك أطول من 20 الى 30 يوم ممــكن 40 يوم 45 يوم... الخ... المهــم هي تقولك بلي 55 يوم ما يوصلكش قوليلي تردلك دراهمك ولى T réclamé  ... يعنـــي La Page  هاذي تخدم Sérieux  كامل واش كاين.

 

كي توصل La Commande  تاعك ... يبعثولك ورقة كيما هاذي للدار... تديها مع La Carte National  تاعـــك ... و تروحــي اجيبيها و عــآدي و كلش ههه و بصــحتك .

نصيــحة : اذا اول مرة تشري... و راه داخلك الشك بصح في نفس الوقت حابة اجربي تشري من المواقع... نقولــك جربي اشري حاجة صغيـــرة تااع ما تفوتش 1000 دج... وشوفي... هي غير اجربيها مرة الأولى و يعـــجبك الحال تولي Trisqué  نورمال ههه .

نصــــــآئح مهـــمة :

كيما قلتلكم.... خذيت Aliexpresse  كمثــآل... و كامل ينطبق عليهم نفس الشيء .

الوغ شوفوا Les Capture d’écran  ... و باش تفــهموا.

الـــــوغ كي شوفوا حاجة و تعــجبكم ماشي تزدموا برك تبعثوا ال lien  كاين حاجات لازم تبعـــوهم... خاصة في Aliexpresse  ... كيما Bangood  و كامل... كامل الموقع مضمون بصح Aliexpresse  لا لا كاين بزاف Les liens  ماشي مضمونين.

الوغ كيفاش تعرفو اذا مضمون ولى لالا ؟؟

 حوسوا واش راكم حابيـــن... منبعد Cochiiw  على expédition gratuite  يعني توصيل مجـــآني... و منبــعد Cochiiiw  على Commande  ... منبــعد زيدوا Cochiw  على النجمات... كيما راني مبينتلكم في صورة.

هكــــذا باش يخرجــــــولكم الي شراو منهم بزاف.... و كي تدخلوا في الحاجة هاذيك تهبطوا التحت تلقاو كيف كيف تصاور حقيقية من تحت تاع الي شراو و صوروا و حــطوا كيما راه في الصورة ... هكذا باش شوفوا مليح الحاجة لي راكم حابينها اذا صح تنفع ولى لالا... يعنـــي تحت ال 100 Commande  غير مكان لاه خاصة اذا ما شفتيش Les Avis  من تحت 

من لي رانــــي نشري من Aliexpresse  عنجهم بزاف حاجات هايلين و ينفعوا و كاين لي لالا... ضرك على حساب انت واش راكي حابة.

و La Page  الي نشري من عندهـــآ... Cliqué  على هاذ الاسم... Ma Petite Boutique En Ligne DZ  

 هاهوا ال Lien  ادخــلوا فيه.... https://www.facebook.com/MapetiteboutiqueDZ/

اتاكدوا مليح بلي هي La Page  لي في رابــط خار كاين بزاف اسمهم هكذا

الـــوغ رانا وصـــلنا لنهاية الموضوع ان شاء يكون فادكم يا لوكان شويـــة.... و لي عندها سؤال تحطهولي هنا ولى فايسبوك ولى وين حبــــــــيتي... المهم راني هنا نجاوب على كامل اسئلتكم.

مع الاخيــر حبيت نقولــكم اتهلاو في رواحكم و ان شاء الله نتلقاو في موضوع آخر... و ما تنسوش اديروا J’aime في Facebook  و آبوني في ال Instagram  و تابعونش على Snapchat  ... ما عليك غير Cliqué  هنـــآ.

و ما تنسوش Abonné  في ال Blog  ... نحــــــــــــــــــــــــــبكم فريزاتي 

.