ســـلام البنات ان
شاء الله تكونو كامل بخير وعلى خير... و الحمد لله على كل حال... الوغ اليوم جيت
كيما شفتو ف العنوان... راح نوريلكم ال bullet Journal تاع Novembre ...
الموضوع السابق كنت شرحتلكم كفاش و وعلاش خرج هاذ ال Bullet journal ... اذا جيتي مباشرة لهنا... وعمرك ما سمعتي
بهاذ الاسم ما راح تفهمي والو..... الوغ ننصحك ادخلي هنا... باش تفهمي مبادئ تاع
ال bullet
journal ... وتفهمي على واش راني
رايحة نهدر في هاذ الموضوع...
الوغ كيما قلت كيما شفتو في l’article لي
قبل هذا كاين بزاف صفحات تقدرو اديروهم ف ال bujo على
حساب حاجتكم... بصح انا مانيش رايحة ندير بزاف صفحات... درت غير واش نسحق ضروري و
واش ينفعني يعني هذا مكان... ما كثرتش حاجات ما نسحقهمش منبعد نخليهم فارغين...
يعني اقتصدت في الصفحات... درت غير واش نسحق صح... يعني كطالبة جامعية هذا واش
نسحق باش نتنظم... ضرك شوفو هذا في باقي l’article ...
تبعوني مليح.
قبل ما نروح للصفحات لي درتهم راح نقولكم الأدوات لي ستعملتهم + السعر
تاعهم :
-
استعملت les stabilos boss واحد حمر وواحد اسود سعر 60دج للواحد.
-
ستيلو Shneider اسود
سعر 40دج ( استعملتو اكثر من stabilo )
-
قلم رصاص ( نرسم بيه هو قبل منبعد
كي نكمل و نتاكد من واش درت نعاود بستيلو كحل ) باين يدير 10دج ههه
-
مسطرة باش نسطر و نطراسي les tableau (
منبعد شوفوهم )
-
ممحاة على شكل Oreo هه (
نموت عليها ) سعر تعها 20دج
-
Des feutres جاين
صغار و فيهم 25 لون كل لون فيه زوج يعني البوقال فيه 50 feutres ...
بزاف ملاح و ما يكتبوش خشين بزاف... رقاق هايلين للتلوين و ما يخرجوش من جهة الأخرى...
سعر 250 دج للبوقال ههه ( مليحة هاذ بوقال )
-
Une agenda جاية
simple
فيها الاسطر... ضرك شوفو
كفاش دايرة من داخل ... سعر تاعها 450دج... فيها اكثر من 200 صفحة.
الوغ درت صفحة لل key قبل L’indexe و
درتها يعني احتياط ما نعرف اذا نستعملها ولى لالا... بصح درتها اذا سحقيتها نكتب
فيها.... خاطر راح ندير هاذ ال bujo لل 2018 نكمل بيه... و كي
يدخل 2019 نكمل نكتب فيه... مانيشريش وحدة جديدة هاذي هي الخطة... ما عندي ما ندير
بيهم... كي تخلاصلي باش نجيب وحدة جديدة... وحدة تكفيني .
و درت صفحتين لل L’indexe كيما راكم شوفو... كل صفحة
على زوج... و راح نكتب فيه غير الصفحات الضرورية لي باش نلقاهم بسهولة... ماني
شرايحة نعمرو بصفحات ما نسحقهمش.
قبل ما ندخل في شهر نوفمبر درت Semestre tracker ... للجامعــــة... لل Semestre 7 تاعي
( راني ماستر 1 ) درتوا باش تكون عندي نظرة عامة على السداسي تاعي... واش راح نقرى
؟ و واش عندي بحوث و الخ... باش ما ننساش مواعيد تاع تسليم البحوث... و مواعيد
الامتحانات... و اذا عندي كاش خدمة نديرها ف تاريخ معين... خاطر راصي مثقوب و ننسى
بلخف... وتعمدت نديرو في بداية تاع ال Bujo هكذا
باش غير نحلو راح نلقى ال Semstre tracker تاعي
... ساهل ما نضلش نقلب عليه...
كيما راكم شوفو الصفحة الأولى... درت فيها جدول التوقيت TD + COURS ... و تحتها درت بلاصة للبحوث...
و الصفحة الثانية درت Des calendriers ....
و خليت ال vide قدامهم باش اذا عندي حاجة
معينة ف تاريخ معين نكتبها في هذاك الفراغ لي خليتو... هكذا راح نلقى كلش في مكان
واحد... و نتفكر واش عندي خدمة و واش ما عنديش يعني باش ما ننساش... ننصحكم بيه
بزاف pratique
( عملي ) .
منبعد درت شهر نوفمبر... درت حاجة simple و minimalist ...
كتبت شهر نوفمبر...
ومنبعد درت monthly الي هاذ الجدول كيف كيف
كان لازملي نديروا... باش تكون عندي كيف كيف نظرة عامة على الشهر تاعي واش فيه و
واش مافيهش... يعني مثلا 14/11 عندي موعد عند طبيب الاسنان ... و 10/11 عندي بحث
... كتبتهم... و كل ما تكون عندي حاجة مهمة ملازمش ننساها ف تاريخ معين نكتبها
هنا... كي نحلها ... راح يكون الشهر في يدي... و محال ننسى واش عندي ف هاذ التاريخ
...
كيما قلت نكتب غير الحاجات المهمة برك... ما نكثرش حاجات ما ينفعوني ف
والو... هذا كامل باش ما ننساش الأولويات في هذك النهار...
كيما راكم شوفو طويت صفحة على زوج درت جيهم Bucket liste نكتب فيها اهدافي لهاذ الشهر و واش حابة نحقق...
و من جهة الأخرى memories نكتب فيها واش صرى و
تواريخ مانيش حابة ننساهم ... يعني صراولي فيهم حاجات ملاح... و اذا تعمرتلي
الورقة... نقلبها للجهة الأخرى و نعاود نسعملها... هكذا كيف كيف ربحت بزاف بلاصة.
منبعد درت Daily ... هنا مثلا في الليل قبل ما
نرقد... و غدوة عندي بزاف حاجات نديرهم... مثلا كاين حاجة لازم نشريها... ولا حاجة
لازم نديرها نكتبها... خليتو فارغ كيما راكم شوفو ما كتبت حتى تاريخ... خليتو فارغ
... هكذا باش نكتب و نخطط لنهار غير كي يكونو عندي بزاف حاجات نديرهم ... مثلا اذا
غدوة ما عندي والو ما نكتب والو... هاذي علاه خليتو فارغ يعني باش ما نعمروش ب
تواريخ فارغين... و نقتصد في البلاصة... و نكون حرة ماشي مقيدة... خاطر قد ما
تعمروه قد ما جيفو رواحكم... الوغ خلو رواحكم في اتساع... و عمروه غير كي تكون صح
عندكم كاش حاجة اديروها...
كيما راكم شوفو قسمتو على زوج كل صفحة على زوج... كيما L’indexe باش
يكفيني... و باش نقتصد في البلاصة كيف كيف ههه ... و خاطر علبالي بلي ما عنديش 100
حاجة نديرها ف النهار مانيش مديرة اعمال هههه انا مجرد طالبة جامعية...
منبعد واش نحب هوما les tracker خاطر نحب نلون ههه ... درت
لل books,
movies, series, ... للكتب, الأفلام,
المسلسلات... و كل نهار نشوف فيه نلون مربع... كل مربع يمثل نهار...
و من تحت خليت بلاصة باش نكتب فيها واش شفت مسلسلات و أفلام و واش قريت
كتابات.... هاذي هي ...
خليت صفحة الأخرى فارغة باش نزيد فيها واحداخرين ... كي نعمرها نوريهالكم
في ال Instagram
... ( تلقاو ال NAMETAG على
اليمين سكانوه يخرجلكم انستغرام تاعي... ولا تلقاوه في آخر موضوع )
و أخيرا... درت لل Blogging لازم ههه ... درت ملخص الشهر لي فات... درت لل Instagram كيما
راكم شوفو كتبت... Week 1 … 2 ..3 الخ... باش كل سمانة جوز نكتب وين لحقت في
عدد المتابعين...
ومن تحت درت les articles ...
يعني لي راني حابة نحطهم هاذ الشهر...
وطويت صفحة على زوج باش ندير فيها les hashtags لي خدمو مليح... هاذي منبعد نفهمهالكم في موضوع
خاص بال blogging
ما تخافوش هه ...
وخليت صفحة فرغة... كي نعمرها نوريهالكم في الانستغرام....
و هاذي هي و هذا هو... وصلنا للنهاية... لي عندها أي استفسار على ال bujo تسقسيني في les commentaires ولا اجي للانستغرام تاعي راني نضل... فيه
24سا/24 نجاوبكم ...
ما تنسوش تدخلو لل Groupe تاع ال Bullet journal Algérie ... تلقاوه
هنــــآ ( اكليكي على القلوب ) ♥ ♥ ♥ ♥ ... راني حاضرة فيه بقوة... كونو معانا راح تتعلمو بزاف صوالح ملاح... و
زيد L’ambiance
بزاف هايلة في ال Groupe هذاك
والله فيه بنات مشاء الله عليهم يهبلو...
باش شوفو المواضيع لي فاتو تاع ال bujo خيرو وحدة من هاذوا
اتهلاو في رواحكم فريزاتي ما تنسوش تابعوني هنا... اكليكي على وحدة من هاذو
تروحي مباشرة.... نحــــــــــــــــــــــــكـبم
.
merci
RépondreSupprimer