♥ JE VOUS EN PARLE N°20 ♥ : Défrisage ANDREA DOTTI #FORT

ســـلام البنات ان شاء الله تكونوا بخيـــر... و على خير.... و الحمد لله على كل حــآل... قبل ما نبداو تعــــيشوا... البنات.... ديروا Abonné  في ال Blog  قبل ما تهبــطوا ما يديش من وقتلكم اكثر من دقيقة... شكـــرا فريزاتي  

 اليوم راح نديرلكم مــوضوع على حـــآجة حوســـتوا عليها كامل ههه ... هي ال Déffrisage  تع Andrea Dotti  الجــديد... كنت درتـــوا في ال 2015 كيما هو بصــح هذا Produits  جديد ب Formule  جديدة و خـــير منـــوا.... و درت موراه في 2016 ال Kératine  بصــح التجربة ما كانتش كيما كنـــت حابتها يعنـــي... هاذ المرة درت هاذ الجديد .

تجديد : راني كتبتلكم article جديد 2018... راني استعمتو مرة اخرى و راه خرج عليا...

 الموضوع تاع 2018 فيه بزاف les détails... تلقاو كامل الاجابة على الاسئلة تاعكم فيه... 

و اذا مزال عندكم اسئلة راني هنا نجاوبكم... 

تلقاو l'article  هنا : http://bit.ly/2NPSDgh

بللا ما نطـــول نقولكم راي تاعـــي فيه.... بصح قبل ! نقولكم اقراو مليـــــــــــح مليح واش راني نقول ... ماش تثرايلي زوج كلمات و تهربي و ارواحي قوليلي خرجلي عجــب هههه راني نشرحلكم كلش كلش بالتفصيل الممل... الوغ حلي عينيك و اقراي

شعــري... درتلوا واحد الخمس خطرات Deffrisage  من 2010 و انا ندير فيه... تسمى جربت بزاف Les Deffrisage  كيما wella  و هاذوك القدم لي ريحتهم تصرع هه ... و جربت هذا Andrea   ... و درت خطرة Keratine  ... تسمى علبالي ... واش راح نهدرلكم على تجربة.

الوغ اذا شعرك ناشف... حرش... Sec  ... مهبلك... يتكركد ديريه... ههه من اللخر هاذي... ضرك نروحوا للتفاصيل المملة ...

عنـــدي شحال من لي درتــــوا... اكثر من شهرين واقيلا... المهم خليت بزاف وقت يجوز باش درتلكم article عليه. 

نوع شعـــري ؟؟

شعري ناشف... و Bouclé  يعنــي خاصة في La Racine ... تسمى في La Raccine  يتكركدلي بزاف بزاف حتـــى كرهت منـــوا... و اذا كانـــــت Humidité  خلات ههه ( علبالي كاين بزاف كيما انا ) ... ساعات بلى والوا نديلروا Brushing  حتـــى ساعة... و تطلع La Racine  نكـــره منوا والله... و محــال نقعد بلى  Brushing  خاطر كارثة

انعــــم ايه اظحكــي انا كشرودة باتم معنـــى الكلمة هههه ...

رانـــــي نقولكم و نوصفلكم باش تعرفوا شعــري كفاش داير هههه ... يعنـــي شعري صح مهبلني و كنت حابة نتهنى منــوا خاطر قلقنــي مليار ... و خاصة مور ما راح L’effet  تاع ال Kératine  .

قبل ما نديرلوا ال Deffrisage  قـــطعتوا و نحــيتلوا كامل Les Fourches  ... خاطر مع ال Deffrisage  يزيدوا شوية.... و ثاني خاطر كنت حابة نقطع شعري ههه و خلاص .

النتيـــجة ؟

كانــــــــت هايلة بزاف... بزاف.... شوفو ضرك رهــوا حتى و اذا ما درلوش Brushing  ... نورمال La Racine  راهي ميـــتة... يعنـــي ما تتكركدليش كامل... يعنـــــــــي تهنيت صح باتم معنى الكلمة... ال Brushing  نكملوا بلخف... في 20 دقيقة ولى اقل نكون كملت ال Brushing  ... يتسلكلي بلــخف كيف كيف... ما نطولش و انا نغسل فيه... و كي ندوش يهـــبط كامل تقول ما عنديش كامل Volume  .... يعنــي نتيجة ولى بالاحلام... انا من جيهتـــي راني Satsfaite  من النتيــجة... تهنــيت من شعري... و الله الحمد لله.

هاذي بالنسبة للنتيجة... يعنــــي راني فرحانة بها... مئة بالمئة... خاطر اول مرة ندير Deffrisage  هكذا تحرجلي Résultat  هايلة كامل هكذا .

كفاش يجي ؟

كيما شفتوا في La Photo  ... اجي بواطة كيما هاذي... فيها الداخل Tube  تاع ال Deffrisage  و 2 Sachet  تاع Le Lait  ... ان شريت 2 بواطات... و ننصحكم تشروا زوج بواطات ... خاطر بواطة وحدة موحال تكفيكم تغطوا شعركم مليح مليح مليح.... خاطر ال Tube  ما يكفيكش... يفيض خير من لي يخصك...

و هاذاك LE Lait  اديريه كي تغسلي شعرك باش تنحــي ريحة شوية... هو أصلا ما فيه حتى ريحة بصح جاي مليح خاطر يزيد يرطب الشعر... ضرك نفهمكم التحت كفاش.

طريقة الاستــعمال ؟

انا صراحة... ما درتوش وحدي و هذا واش ننصحــكم... ما ديروش وحدكم... خاطر ال Déffrisage  كي ديروه وحدكم ماشي كيما كي واحد يديرهلكم... ديريه عند حفافة و لى اختك ديرلك ال produits  .... ولى كاش وحدة تعرف وحدة... من الأفضل اديرهولك حفافة... خاطر هوما مولفين بهاذ نوع من Les Produits   يعـــرفوا خير مني و منك... شوفي وحدة Confiance  برك يعنــي وحدة موالفة تتعاملي معاها تمديلها راصك بلا ما تخافي هههه ... ( راكم تعرفوا ) .

كيما قتلكم انا درتوا عند الحفافة الي موالفة نمشــط عندها خرجلي ال Resultat  هايل... ما عندي ما نقول.

بصح ضرك نقولكم كيفاش اديروه... هو فيه La Notice  بصح ما تبعوهاش حرفيا خاطر شوية شوية...

مـــــــــــلاحظة : لازم يكون شعرك موســـخ مليح.... اقعدي واحد ال 4 أيام اقصى حد م تغسليهش و استعمليه.... فوق شعر نقي شغل ما درتـــي والوا والوا... الوغ خلي شعرك يتوسخ و ديريه.

اقسمي شعرك بشوية... و Appliquer  ال produit  و امـــشطي مليح مليح الخصلة هاذيك... ماشي ديري خصلة صغيرة لا لا .... ديريها متوســطة ماش مكانش كامل ههه تباتي معاها ...

كيما قتلك احكمي الخصلة بين يديك .... و حطي فيها ال Produits  و هبطي بيديك فيها كيما اديري الماســك ههه شفتوا كفاش اديروا بيديكم ... ما نقدرش نفهمكم بالكتبة من بعد امشطوها مليح مليح...  من بعد بظهر المشطة Inssisté  على La Racine  ... باش تهبط و تموت كامل.

 كي تكملوا كامل شعركم... ما تحبسوش هنــأ... عادوا امشطوا شعركم كامل بالمشطة... و كيف كيف Insisté  على ال Devant  تاع شعركم و La Racine  وحد ال 15 دقيقة و انتي Tapliquer  في ال Produits  باش شعركم جيبوه مليح... خلوه يريح واحد ال 20 دقيقة... و اغسلوه

كي تغسلوه... اغسلوه ب Shampoing  عادي كيما موالف...  غسلة ولى زوج... منبعـــد ديري Sachet  واحد تاع Lait  هاذاك ولى زوج المهم ما ديريهمش كامل خاطر يكفيك... و شلي شعرك... و Hello  لشعرك الجديد ههه ..

انا قـــتلكم درتوا عند الحفافة.... و النتيجة تاعي تاع الحفافة... تسمى النتيجة تاع كي ديريه وحدك ما علباليـــش كفاش تخرج... و انا ننصـــحكم و نقول و نعاود... ديروه عند وحدة  Confiance  موالفين تمدولها راصكم ... ههه If you Know what I mean  .

ضرك نقولكم بعض النقاط المهمة.... شغل شوية تلخيص و شوية نصائح :

-         اشري زوج بواطات بواطة ما تكفيكش ههه à part  اذا دايرة coupe garçon  يعنــي قصيــــــــر شعرك بزاف.

-         فيه ال FORT  و doux  و ال Normal  ... اشري ال FORT  مهما كان نوع شعرك... انا هاذ كامل L’article  على ANDREA DOTTI FORT  ههه ... يعني اشري fort  و ما تخليهش يطول بزاف Max  20 دقيقة و اغسليه... و اذا خفتي ديري Normal  خاطر ال DOUX  شغل درتي Mask  هه

-         يعنـــي وحدة قاتلي درتوا و شعري هبطت La Couleur  تاعوا ... C’est Normal  هاذي شيء عادي بزاف بزاف... تنقص La Couleur  بدرجة وحدة ولى درجتين... و اذا كنتي دايرة سبيغة يعني سابغى شعرك... Normal  تهبطلك La Couleur  ما تخافيش.... مراحش يولي صفر ههه لا لا شوية برك.

-         اذا رايحة تصبغي شعرك بعد Deffrisagee  اصبري شوية واحد شهر ... اصبغي شعرك و استناي واحد شهر و ديريه... خاطر تخافي حتى الحفافات و يقولك اخطيك... و اذا كنتي درتيه اصبري شهر ولى و اكثر من الاحسن اكثر و ديريه في شعرك... و اذا كنتي رايحة اديري Les Méches   ديريهم يا هوما يا Deffrisage  ... كيف كيف ما يمشوش خاطر راح يضروك ماشي كيما Keratine  ما عندك حاجة.

-         اذا راكي تقراي في هاذ L’article  في الصيف حلي عينـــيك تروحي تعومي يعني تروحي للبحـــر تبحري بعد ما اديريه ههه خاطر راح يضر شعـــرك... راني قـــتلك ههه ما ديريش رايــك ... خلي يخلاص الصيــف و ديري Defrisage  على روحك... ماش غير هو حتى Kératine  ديريها من بعد تروحي للبحر كيف كيف تهردي شعـــرك... كامل Les Produits  يمشـــي هكذا

-         يشـــد 6 اشهر ... بصح الأفضل اذا حبيتي تعاوديه ولى باش تحافظي على نفس 4 اشهر و عاودـــيه

-         مكانش Shampoing spécial  يعنـــي اغسلي باش حبيتي .... بصح اذا حبيتي نقدر ننصحك ب Les Shampoing  ال Sans Sulfat  

-          شعرك كي ينـــشف وحدوا مراحش يولي كيما كي ديرلوا Brushing  ... بصح نوعــدكم بلي La Racine  تعكم تهبط... و ال Brushing  اديريوه في نص الوقت تاع موالف... راح تتهنـــآو تع الصح

-         و اهـــــم حاجة ما فيه حتى ريحة.... تقول ما درتي والوا.... و ثاني ما فهش هذاك L’effet  لي يبين بلي درتي  Défrisage  ... يعني TOP 

- اذا كان عندك من قبل Les Fourches راح يزيدهم شوية... ما ينحيهمش كيما Kératine  و ثاني ما يطولش الشعر... شعرك ينجبد برك... كي يكون مبوكلي منبعد يتكسل هاذ الشيء باين هه 

- انا كانت عندي من قبل القشرة و نسوفري منها ( الي عندها كاش حاجة تنفع تحطهالي ) ... تسمى ما نقدرش نقولكم اذا يدير القشرة ولى لالا... انا جابلي ربي ما زادتليش القشرة على من قبل. 

- اذا لاحظتي شعرك يتزيت بلخف هاذ الشيء باين يا بنتي كان ناشف و ولى مليح يعني C normal  يتزيت شوية بلخف و هاذا دليل بلي شعرك تسبسب 

ملاحظة : انا هدرت على ANDREA DOTTI  ههه الوغ كامل هاذ L’article  عليه.... ماشي تروحي اديري ماركة أخرى و اجي تقوليلي ما خرجليش شباب ههه ها بنتي ما تهبلينيش... و ثاني انا درت ال FORT  تسمى ال faible  و ال Normal  ما عندهمش نتيجة كيف كيف ... و ثاني انا درتوا عند الحفافة... و النتجة تاع الحفافة و الدار ماشي كيف كيف ... و انا ما نقولك ديريه ما نقولك ما ديريهش ههه انت و خاطرك اذا هناك ... و اذا موالفة تريسكي بشعرك كما انا ... و ثاني انا شعري ناشف جاف... و النتيجة ما تكونش كيف كيف لجميع أنواع الشعر... تسمى اذا عندك شعرك خلاف على شعري زدي سقسي الحفافة و هي تقولك و جاوبك خير مني انا... و ثاني اذا رحتي ديري Défrisage  اديلها انت ال Produit  اشريه  و اديه معاك افضل.

طلعوا التصويرة... و وروها لمول ال Cosmétique يمدلكم خـــوه ... يعني كيما هوا 

البواطة وحدة ادير 250 دج ... و انا شريت زوج ... المهم مع خدمة الحفافة ستقاملي 1500 دج ... و كل حفافة كفاش تخدم... انا حفافتي تخدم رخيس و كاين لي يديروه غالي... المهم... السعر تاعوا 250 دج للبواطة .

لحقنا للنهـــآية البنات ان شاء الله تكونوا اسفدتوا... و ان شاء الله نكون قلت كلش ... و الله طولت باش كتــبت L’article  حتى جازو شهور ... باش هكذا نكون متاكدة من النتجية ... و نزيد نكتبلكم واحد مور ما يجوزوا 6 اشهر ... الي عندها سؤال تخليه هنا ولى في La Page  ولى في ال Instagram  المهم كاين 70 طريقة باش تتواصلي معايا و نجاوب على اسئلتكم.

شـــــكرا على القراءة و ما تنسوش تابعــــــــوني هنا ... باش نبقاو على تواصل مستمر ... و اديروا Abonné  في ال BLOG  . 

.