♥ JE VOUS EN PARLE N°21 ♥ La Konjac Spong

ســلام فريزاتــي ان شاء الله تكونوا بخيــير و على خير .... عليالي بلي راني طولت علكم بصح و الله ماشي بغرضي كنت خلاص راحتلي كامل الطاقة و كلش باش نكتب ولى ... كنت بزاف نبان في ال Instagram   كنت نبان بزاف فما... خاطر فريزات ال Instagram بزاف بزاف Actif  ... و ثانــي كنت نحاول نطور من La photographie  و تصاور و ديكور الخ... تسمى ركزت فيه بزاف... و ضرك و ليتلكم ان شاء الله ب بزاف حاجات ان شاء الله نديرهملكم كامل...

الوغ كيما شفتوا في تصويرة شيء غريب و علبالي بلي نصكم ما فهمش واش هذا ؟ واش ادير ؟ من واش مخدومة هاذ l’éponge  ؟ ههه الخ... ضرك نقولكم كامل المعلومات... و كامل واش تحبوا تعرفوا باش كون عندكم فكرة مليحة و واضحة عليها مليح مليح... الوغ ما تتقلقوش ...

واش هو ال Konjac  .. ؟؟

اليوم نديروا شوية ثقافة عامة... ال Konjac  هة نبــــتة بطبيعة الحال حنا ما تنغرسش عندنا ….  تنموا في الغابات الاستوائية و شبه استوائية في  دول جنوب شرف آسيا... اليابان, كوريا الجنوبية , الصين, اندونسيا, و الفيتنام.

هاذ النبـــتة كبيرة يعنـي عندها حجم كبير.. و ما نكذبوش غريب... يعني من شكلها البشع ما تقولولش بلي فيها فوائد تجميلية... يعني الورقة الوحدة من هاذ النبتة قادرة توصل الى 1.3 متر في الطول... و زهرة تاعها توثل الى 55 سم... يعني نخليكم تتخيلوا حجم النبتة.

و نزيدلكم هاذ النبتة تنموا من جذمور درني كروي... الحجم تاعوا كبيــر بزاف يعني يجاوز وزنوا 3 الى 4كغ... و طولوا في 25سم.

وهي من عائلة النباتات اللوفية يعنـــي هي فصيلة من النباتات تتبع رتبة المزماريات من صف كاسيات البذور...    يقولولها بالفرانسيس Araceae  ...  و هي كيف كيف une plante vivace  الي يعني نبات معمر تقدر تعيش اكثر من عامين.  

شكرا ويكيبيديا هه

قصة ال Konjac  :

الكونجاك عرف في الصين لاكثر من 2000 سنة... يعني اثروا القديمة في الصين... و عرف في اليبان من القرن السادس ... و في 1846 خرج كاب طبخ خاص بوصفات خاصة بالكونجاك.

استعملت نبتة الكونجاك لفترة طويلة كنبتة طبية... ولى استعملت لأغراض طبية... كانوا يداواو بيها السعلة... اظطربات المعدة... الحروق... و كيف كيف كعلاج للسرطان.

ارواحوا نهدروا بالفصيل... ثقافة عامة يعنـي ههه زيادة فيكم .

النبتة هاذي في الصين و اليابان و اندونسيا تنغرس شغل خضرة يعنــي مصنفينها مع الخضر... و يخدمو بالجذمور تاعها الفاريــنة... منبعد الفارينة هاذيك يخرجوا منهـــآ عجينة باش ستعملوها للطبخ و يطيبوا بيها و ياكلوها... و يطيبوا بيها خاطر ما فيهاش بزاف سعرات حرارية يعنـــي من 5 الى 10 سعرة حرارية في 100 غرام ... و فيها كيف كيف الالياف يعني فيها كمية مليحة منهم... من 2 الى 3 غرام من الالياف في كل  100 غرام.

لهاذا في وقتنا الحالي راهي تستعمل يزاف في ال Régime   يعني لهاذ السبب .... يديرو بيها شغل مقارون les nouilles  ولى على شكل une grêlé  يقلك بلي ما عندهاش  gout  ... و ذوب بلخف في الفم .

يعنـــي في وقتنا الحالي مراهمش يستخدموه بزاف ضد السرطان... خاطر مافيهش بزاف سعرات الحرارية و ضعيف بزاف... في القديم كان ينفع ضرك لالا... بصح راهم يستخدموه اكثر شيء للرجيم و خفض الوزن... خاطر يساعد بزاف بزاف

نهدروا ضرك  coté cosmétique  :

كيما قلتلكم... من جذور تاعها الكبار... يخرجوا الفرينة ... و هاذ الفرينة يخرجوا منها ال l’éponge  الي راكم شوفوا فيها في الصورة... الي استخدموها لتنظيف الوجه... و يزيدوا يخلطلهوم حاجات واحداخرين باش خدمتها تزيد تكون اقوى .

رانـــي حكيتلكم كامل الحكاية وين تنبت... كفاش تستخرج.... لواش تستعمل... و من وقتاش و هي كاينة... هكذا باش تعرفوا المنتوج لي راه في يدكم لواش ينفع واش فيه و واش ما فيهش صح طويلة بصح في فايدتكم.... درت الي عليا و حكيتلكم كلش بمساعدة ويكيبديا.


واش هي ال Konjac Spong  ؟؟ 

عندهم لكل انوع البشرة... grasse, sec, mixte  و حتى كاينة وحدة طبيعية لكام أنواع البشرة... كاين خاصة للأطفال... و كاين عندهـــم حتى Spécial  للجســم. و حتـــى الرجال يقدروا يستعملوها ماشي غير النساء . 
هي مئة بالمئة طبيــعية يعنــي ما فيهاش حتى الملون... و الالوان لي فيها مثلا تاعي كحــلة... لونها جاي من فحــم البامبـــو الخاص باليشرة الدهنيــــة... يعني كل نوع بشرة لون محدد ... و هذاك لون مستمد من اضافة طبيعية يعني مكانش ملـــون. 

كاين كيما راهم مصورين في هاذ la notice : المدورة للوجه و الطويلة للجســم . 

- الاسفنــجة النقية : يعني الاصلية ما فيها والوا اضافات - لكل انواع البشرة 

- الاسفنجة مع فحم الخيزيران ولى البامبو - للبشرة الدهنية و التي تعاني من مشاكل و البشرة المعرضة للبقع. 

- الاسفنجة مع صلصال فرنسي ازرق - للبشرة المركبة يعني المختلطة Mixte 

- الاسفنجة مع الصلصال الفرنسي الاحمر - للبشرة الجافة او الناضجة 

- الاسفنــجة مع صلصال فرنسي وردي - للبشرة المرهقة و الخائرة هاذي واقيلا تاع للي كبار في السن 

- الاسفنجة خاصة للاطفال - ملائمة لحديثي الولادة 

الوغ لازم تعرفوا بلي هاذ الاسفنجة مئة بالمئة... طبيعية و من نبات... و تستعمل لمدة 3 اشهر 3 اشهر و خلاص الاستعمال تاعها... و الحاجة لي مليحة فيها... تقدري ما ترميهاش... تشتعمليها كسماد عضوي للنباتات تاعك اذا  عنــدك في الدار... يعني تتحلل في التراب... و ما تارميهاش هه قتلكم هايلة.

هاذي شغل une notice صغيرة اجي في الصاشي مع الاسفنـــجة فيها كامل المعلومات... و ببزاف اللغات من العربية الفرنسية و الانجليزية و الخ ماراحش تتودروا. 

هاذا هو الصـآشي الي جي فـــيه en cas ou كاش نهار تصيبوها تتباع و ما تعرفوش واش هي راكم تعرفوا شرط واش هاذي و لواش تستعمـــل. 

ضرك كفاش كانت تجربتي معاها ؟ كيف كيف نروحوا شوية شوية ههه باش نفهمكم مليح مليح... كل حاجة... تبعوني مليح.

الوغ اول ما شوفوها تقولو ؟؟ بصح يابسة... بصح هاذي تجرحلي وجهي... هاذي كيفاش نستخدمها نطير بيها وجهي هههه مهبولة هاذي تستعم حاجة يابسة ؟... تحكموا على مظاهر خاطر ههه .

الوغ اول ما تحكموها في يدكم هاذوا هوما الأفكار برك الي يجوكم في بالكم.... بصح اول ما تفهموا كفاش تستعملوها راح تحبـــوها من اول نظرة.

كفاش تستعمل ؟؟

تبعـــوا مليح خاطر هاذ النبتة فد ما راهي كبيرة و ضخمة قد ما راهي كيف كيف طرية و sensible  بزاف يعني sensible  حساسة على البشرة تاعك و لاز تستعمليها بحذر تام .

الوغ جيبوا وعاء ولى bolle  ولى طاسة ( ماعلبالبش كفاش تعيطولها بصح طاسة هاذيك لي نفرغوا بيها الماء في الحمام و كامل ههه ) ... عمروها بماء دافء ما بارد ما سخون... في الوسط عسنك ميزانك كل وحدو كفاش يبانلها الدافئ.. المهم ماء داف و غطسوها الداخل... حتى شوفوها تنتفخ و تطلق روحها ... و تتحول من اقسى اسفنجة الى éponge  طريــة و حنـــــينة بزاف بزاف ... راح طيحي فيها love  مكانش كفاش ما تعجبكش محال... تولي ناعمـــــة بزاف بزاف بزاف...

كيما قلتلكم غطسوها و خلوها تطلق روحا في الماء... و كي تعصريها بالاكي تعصريها كيما تعصري اسفنجة عادية ولى شغل راكي تعصري في حوايج... ديريها بين كفك اليمين و اليسار و اضغطي حتى تنعصر... تماما...

من بعــد استعمليها في وجهــك ... يا اما وحدها يا اما مع ال Nettoyant  تاعك الي موالفة تستعملـــيه... حكي بيها وجهـــك بشكل دائري يعني حكي و دوري... و اضغطي ولى insisté  على الأماكن لي يقلقوك بزاف... مثلا الانف ولى الجبهة ولى... انا كنت نقعد واح ال 15 دقيقة و انا نحــك.... خاطر هايلة بزاف... تحسي وجهك يترخى و yrelaxé  كامل واش كاين...

خاطر هي ما تنظفش برك... تستعمل كيف كيف باش تنشط الدورة الدموية في وجهــك بالحركات الدائرية لي ديريهم... وجهك ينور بسيف عليه ههه حب ولى كره...

كي تكملي شللي وجهك شوية برك... ولى تقدري ما تغسليهش...

طريقة الغسل... بنفس طريقة لي شمختيها بيها... تغسليها بيها عمري كاسة ديريها الداخل و اغسليها... و العصر كيف كيف ...

ننصحــك شوفي les vidéo  في ال Youtube  باش تفهمــي مليح كفاش تغسليها و كفاش تغسليها... حتى انا شفت باش استعملتها...

واش راي فيها ؟؟

 

انا لي وصلـــتني كونجاك تاع كوريا الجنوبية... و هاذ les éponges  مخدومين في UK  يعني ف الانجليــز هه ...  و وصلتنـــي خاصة تاع البشرة الدهنية... مخلطة مع الفحــم علابيها جاية سوداء... كل نوع تاع بشرة بواش مخلطة... كاين بزاف  أنواع تاعها.

استعملتها لمدة 3 اشهـــر... يعنـــي ما حبيتش نقولكم راي فيها حى جازو 3 اشهر كاملين... يعني ما كنتش نستعملها كل يوم.. بصح كنت راضية عليها... يعني Satisfaite  بزاف... تنقي الوجـــه بزاف مليح.. ايه و نسيت باش نقولكم تستعمل حتى كيما démaquillant  ...

كيما قتلكم كنت نستعملها اكثر شيء في الليل مور العشاء قبل ما ندخل في فراشي... نغسل بيها وجهــي وحدها... كنت نبقى واحد فايت 15 دقيقة و انا نحك في وجهي بحركات دائرية و غير بلعقل... كنت نحس انوا وجهــي ترخى و relaxe  على الاخر يعنــي هههه ... و كيف كيف وجهـــي كان يولي نقي بزاف... و يشعشع نور... يعني راني راضية عليها خاطر هي ادات ما فيها حتى مواد كميائية ضرك... اذا ما نفعاتكش ما ضرطش... و اسهل طريقة باش تنظفي فيها وجهـــك بطريقى طبيعية كيف كيف و بلى مواد كميائية...  

فادتني بزاف يعني من حيث نظافة البشـرة كانت صح تنظفلي بشرتي و يعني هذا هو المطلوب منــها... و هي يقلك بلي من الأفضل... تستعمليها في الصباح و في المساء لنتـــيجة سريعة و لنتيجة افضل يعني وجهــك يصفى... و يولي فيه نظارة اكثر... انا صبت عليها... يعني النتيجة تاعها ما عندي ما نقول فيها تباني كي تسعمليها تبان بلي كاين فرق بين قبل و بعد الاستخدام... هايلة صغيرة و محاينها كبار في الحقيقة ههه

كيما قتلكم بعد ما تتشمخ بالماء الدافئ تولي بزاف بزاف بزاف حنــينة و ناعمة على البشرة تاعك راح تحبيها بزاف.... يعني تمد الراحة لوجهم و وجهك راح يجاوب معاها... يعني راح تحسيها تزلق في وجهـك... و تمدلك نظارة هايلة... ز كيما قتلكم طبيعية مئة بالمئة و خالية من مواد الكميائية.

هاذي هي راني حكيتلكم حكاية الكونجاك من بداية للنهاية... و مديتلكم ثقافة عامة هه مليحة ليكم... و زيدوا شوفوا d’autre revue  عليها...

ادخـــلوا هنا باش تلقاوها في ال Site تاعهـــم... clique ici 

اذا عجبكم L’article  تاع اليوم و قريتوا حتى لهنا... خلولي Fraise  في كومنتار و قولولي رايكم فيه... و اذا تحبـــوا اكثر مواضيــع هكذا.... ما تنسوش تابعونـــي في كل بلاصة... clique  صغير على هاذ les icons  تروحوا مباشرة لكامل مواقعي instagram, facebook & snapchat  ... نحـــــــبكم فريزاتي... و اتهلاو في رواحكم... الي عندها سؤال حابة تبعثهولي في privé  تبعثلي par e-mail  ... اتهلاو حبيباتــــــي  

.