♥ JE VOUS EN PARLE N°23 ♥ Le bullet journal

ســلام البنات... سلام فريزاتي ... عندي شحال ما كتبتش هنــا ههه و الله توحشت نكتب... ان شاء الله تكونو كامل بخير و على خير... و الحمد لله على كل حال

الوغ اليوم جيت نهدرلكم على شيء انا صراحة فادني بزاف ... و بزاف راكم حابين تعرفو عليه و تفهمو واش هو ؟ و منين جا ؟ ز شكون دارو الخ... الوغ اليوم جيت نجاوبكم على كامل الاسئلة تاعكم... يعني كنت هدرت عليه زوج مرات من قبل... بصح ماعليش راح نعاود تهدرلكم عليه من الصفر خطوة بخطوة منبعد نخليلكم lien  باش شوفو ال bujo  تاع شهر نوفمبر.

قبل ما نقولكم والو ارواحو نديرو شوية ثقافة عامة... منين جا ال bujo  و شكون دارو ؟ و واش من عام خرج ؟

ال Bullet journal  ظهر اول مرة في أمريكا و بالظبط في نيويورك New Yrok  ... ولي اخترعو هو Ryder carrol  الي كانت المهنة تاعو Désigner intéractif  او désigner Numérique  ... يعني يصمم كل ما هو الكتروني...

هذا Ryder  شاف بلي الناس تستعمل بزاف بزاف les Agendas  ... مثلا Agenda  لارقام الهواتف... وحدة للمواعيد... وحدة للتدوين... بلا ما ننساو les Sticky notes  لي يطايرو من كل جهة... خاصة عندهم بالعكس علينا يستعملو بزاف بزاف اكثر منا... وهاذوا كامل يدو بلاصة.. ياكلو الجهد... و ما تقدريش ترفديهم معاك في كل بلاصة بطبيعة الحال... الوغ هو شاف بلي هذا بزاف ز بالطبع الناس بالرغم من واش يضلو يدونو و ينساو موعيدهم و الخ غير على جال انو كل note  وين جاية...

الوغ Ryder  قرر باش يصمم حاجة تلايم كامل هاذو ف مكان واحد... بطريقة جميلة مفيدة... و بزاف Créatif  تخلي الناس يدونو واش ما لازمش ينشاو... و ينظمو واش لازم يتنظم بلا ما يحسو بالملل... بلا ما ننساو الجانب لي يمدهولنا يعني وسيلة للترفيه ... زيحفزك في نفس الوقت... الوغ اخترع ال Bujo  ... الي اصبح ضرك اكثر وسيلة استعمالا للتنظيم و التدوين و الخ.

يعني Ryder  ... فكرتو كانت انو الناس يحكمو un cahier  ولا agenda  كون simple  و فارغة... و هوما يصممو L’agenda  تاعهم على حساب واش يساعدهم... هوما يخدموها كيما يحبو... يعني هوما يرسمو ال calendrier  و الخ ... و يديرو فيه صفحات كيما يحبو.

كيما قلت اصبح الوسيلة الأكثر استعمالا... يعني منلي خرج للهنا راه لقى اقبال كبير كبير من الناس... يعني خاصة البنات اصبحو يستعملوه بزاف... و كل واحدة زادت فيه صفحات و كل وحدة زادت فيه اسلوبها... و كل وحدة خدمت فيه على حساب واش تحب هي و واش يساعدها و واش ما يساعدهاش.

بالنسبة ليا ال  Bujo  هو وسيلة ترفيه... و يخليني décontracté يعني وسيلة تخليني نريح moralement  و انا نكتب و نرسم فيه...   و هو وسيلة خلاتني خاصة نتنظم شوية... ونحس شوية بالمسؤولية تجاه واجباتي اليومية لي لازم نديرها... و بين انو نتفكر واش عندي ندير و التواريخ المهمة لي مالازمش ننساها... هاذي هي اكثر شيء فادني بيه ال Bujo  ... خلا روح المسؤولية تزيد عندي شوية يا لوكان ب 1%  ههه .

مكونات ال Bujo  ... ( حطيتلكم صور جبتهم من ال pinterest  و الخ... خاطر ال  bujo تاع هاذ العام نقصت فيه بزاف صفحات كنت درتهم من قبل و نحيتهم خاطر ما نفعونيش راح شوفوهم ف l’article  الاخر... لي مفروض يكونو ف ال bullet journal  ... يعني نقصت بزاف صفحات ما يلزمونيش... و نخليلكم lien  تاع les bujo    القدم تاوعي باش شوفو كفاش كنت نخدمههم... )

ال bujo  يتكون من :

-         Indexe  الي هة الفهرس تاع ال bujo  ( نعم راح ترقموه )

-         Key  الي هو الرموز لي راح تستعملوها لتنظيم ال bujo  ... ولا خلينا نقولو مفاتيح كيما مفاتيح الخريطة.

-         Calendrier Annuel ... الي هو رزنامة تاع العام .

-         Calendrier mensuel  ... رزنامة الشهر.

-         منبعد عندكم حرية الاختيار بين ال monthly … weekly… daily  ... راح نشرحلكم منبعد.

-         والاضافات زيادة الي هوما les tracker  ... صفحات خاصة بالدراسة و الخ.

أولا : L’indexe  :

هو الفهرس... الي راح ترقمو صفحات... ما ترقموش الصفحات كامل من قبل... كي تعمرو الصفحة رقموها... و هنا تكتبو رقم صفحة و واش فيها كيما الفهرس بالذات... باش اذا كنتو تحوسو على كاش صفحة راح تلقاوها بسهولة.

لي حبت اديرها اديرها و لي ما حبتش ماشي لازمة.

ثانيا : Key  :

الي هي المفاتيح تاع ال bujo  كيما تحبو تحبو يكونو رموز و تحبو يكونو الوان... راح يساعدوكم نظمو ال Bujo  تاعكم مليح ...

مثلا تختارو رمز ؟ للبحوث ... رمز X  للحاجات لي كملتو درتوها... رمز – للحاجات لي راح ديروها الخ...

ثالثا : Calendrier Annuel  و ال Mensuel  :

الي هوما رزنامة العام... كي تبداو عام جديد... راح تكتبو كامل شهور تاع العام...

و منبعدها تبداو تنظمو بالشهر... و اديرو calendrier  تاع الشهر لي راح تنظموه مثلا كيما ضرك رانا نظمو في شهر نوفمبر...

رابعا : daily / weekly / monthly  :

الوغ عندكم الاختيار بين انكم تنظمو شهركم ب كل يوم و يومو ولا كل سمانة... ولا شهر كامل... على حساب la charge  تاعك... اذا عندك بزاف حاجات اديريهم كل يوم ننصحك باليومي ولا الأسبوعي... و اذاا ما عندكش بزاف... ننصحك بال شهري و تكتبي غير واش ما لازمش تنساي... منبعد راح شوفو انا كفاش درتهم...

خامسا : الإضافات :

انتم حرين تضيفوا واش تحبو... انتم على حسب خيالكم و حاجتكم و واش تحتاجو يعني... مثلا كاين :

-         Les tracker  الي هوما يسمحولك تبعي حاجة معينة مثلا water tracker  لي كل ما تشربي كاس ماء تلوني باش تعرفي شحال راكي تشربي... ولا Sleep log  تولني عدد الساعات لي رقدتيهم باش شوفي شحال رقدتي من ساعة و تعدلي رقادك... مثلا كاين book tracker… series tracker… movies tracker  الي يسمحولك شوفي شحال شفتي من حلفات ولا شحال من يامات قرتي فيهم ولا شفتي فيهم فيلم... تقدري اديري tracker  لكل حاجة حابة تبعيهيا و tsuiviha  ... و كاين بزاف اشكال لل tracker انا نحب تاع المربعات... راح شوفوهم في ال bujo تاعي تاع شهر نوفمبر.

-         كاين wishliste… objectifs… bucket listes  كتبي فيهم اهدافك... واش حابة تشري هاذ الشهر... واش حابة حققي يعني كنوع من التحفيز لروحك... ماشي لازم تحففي منهم كاش حاجة... بمجرد انك تكتبيهم هاذي تعتبر خطوة أولى تديك ليهم... يعني راح تزيدي تصممي باش تحققهم... واذا ما حققتي منهم والو عاودي اكتبيهم في شهر الجاس و هاذي ثاني خطوة باش تزيدي تصممي عليهم اكثر.

بالمختصر المفيد ال bujo  هو moyen de détante  وسيلة استرخاء و ترفيه... و ثاني وسيلة باش تنظمي ايامك و واش عندك اديري... وماشي لازم يكون شباب المهم سكون مفيد... المهم يساعدك... و بشوية بشوية تمشي يدك فيه و تولي فنانة ههه.. ولي حابين أفكار و يدو صفحات حوسو ف ال pinterest  ... و ال youtube  راح تلقاو بزاف بزاف أفكار و صفحات ممكن يفيدوكم...

واش لازملك أدوات ؟

كراس و ستيلو ههه برك والله... يعني هاذو هوما القاعدة... الألوان و les feutre  و الخ هاذو زيادة برك... اذا هاذي او مرة تستعملي فيها ال bujo  وراح تبدايه جديدة... ننصحك استعملي كراش عادي تاع 288 صفحة... منا حتى يبدى عام جديد... تكون مشات يدك فما... اشري كراس شباب و ابداي فيه ال bujo  تاع 2019... 

وضرك روحي شوفي ال bujo  تاعي تاع نوفمبر منـــآ ( اكليكي على القلوب ) ♥ ♥ ♥ ♥ 

واذا حابة تعرفي اكثر على bujo و شوفي بداياتي فيه كفاش كان داير... ادخلي هنا... ولا هنا 

وبهاذا نكونو وصلنا للنهاية الموضوع تاع اليوم انشاء الله يكون فادكم و فهمتو شوية... ولي عندها سؤال راني 24سا/24 في الانستغرام اسؤلوني... ولا حطو كومنتار في ال blog  و انا نرد عليكم...

ادخلو هنا باش شوفو bullet journal  تاعي تاع November  و تدو أفكار... درت هاذ المرة theme  بزاف simple  كامل تقدرو تعاودوه... و ثاني ساهل و عملي بزاف درت فيه غير واش نسحق.

اتهلاو في رواحكم فرزاتي ز نتلقاو في موضوع جديد انشاء الله... ما تنسوش أبوني في ال blog  و في ال instagram  نحـــــــــــــــــــــــبكم

.