♥ HAUL N°2 ♥ : School Haul + Astuces Pratiques

ســـلام فريزاتي... ان شاء الله تكونو بخــــير و على خير.... و الحمد لله على كل حال... ما تنسوش الحمد لله على كلشي و في كل وقت...

الوغ كيما شفتو في العنوان راح نوريلكم واش شريت لل la rentré  ( راني ندير هاذ L’article  في نوفمبــر خاطر وليت نقرى في نوفمبر.. راكم تعرفو حكاية الماستر 1 و المهزلة لي صرات هاذ العام ههه تاع انستغرام راهم علبالهم كلش )

ما راني شرايحة نوريلكم واش شريت و فقط !... راح نوريلكم واش شريت و لواش راح نستعمــلهم ثاني و كفاش راح نستعـــــملهم... بالإضافة لشوية تاع les astuces  و نصائح pratique  موالفة نستعــــملهم راح يفيدوكم ثاني كيما انا يفيدوني... و يخلوكم تربحـــو شوية وقت يعنـــي ... و تكونو منظمين في دروسكم...

ملاحظة : راح كلامي يكون موجه اكثر شيء للجامعيات... و الجامعيين ( علبالي ولاد و رجال راح يقراو ههه ) ... بصح هاذ الشيئ ما يمنعش البنات لي يقراو في الثانوية و المتوسطة انهم يستعملو هاذ النصائح... يعني اقعدو حتى الأخير... خاطر هاذ الكلام موجه لكامل الناس لي راهي تقرى.

شريت هاذ ال Super cahier ... فيه 250 ورقة... مقسوم على 5... بصراحة هاذ ال cahier  كل عام نشريه منلي طاعت للجامعــة و انا نشري غير هذا... خاطر يكفيني عام كامل... نشريه و نريح.... و زيد نرفد فيه كامل المحاضرات ولا الاعمال الموجهة... باش نلايمهم ف مكان واحد كي نروح نراجع ولا نلقى كامل واش نسحق فيه ما يبقاوش محضراتي مبعثرين.

ال 3 سنين لي فاتو  كنت ديراتو لل TD  فقط... خاطر كنت نقرى بزاف الحسابات و المقاييس النظرية كانو زوج ولا ثلاثة برك كراس صغير يكفيني للمحاضرة ... يعني يساعدني في ال TD  اكثر من ال cours  ... بصح هاذ العام ما عنديش بزاف كتبة في ال TD  الوغ قررت نحتفظ بيه للمحاضرات خاطر نكتبو بزاف هاذ العام ... باش هكذا نلايمهم في كراس كبير و منظم افضل.

بزاف بزاف يساعدني هاذ ال Cahier  يعنـــــي نشري واحد لعام كامل و يفضللي منو ههه

السعر : 350 دج

كي موالفة نستعمل ال Super cahier  الكبير... قررت هاذ العام نشري واحد صغير لل TD  ... فيه 288 صفحة و قسوم على 5 كيف كيف... صغير و نفس شيء بالنسبــــة للكبير برك هذا يجي صغــير من La Marque HIPPONE  ... وخفيف... كيف كيف راح يساعدني نلقى الاعمال الموجهة تاعي في بلاصة وحدة... و منظمين.

السعر : 300 دج

قبل ما نكمل حبيت نقولكم على طريقة نستعملها بزاف... هي انو نقسم صفحــة على زوج... ما علباليش علاه ندير هكذا صراحة ههه بصح والفت نديرها...

في الحقيقة هاذ الطريقة ساعدتني انو الكراس يكفيني عام كامل ... يعني حتى كي يتبدلو les modules  في السداسي لي منبعـــد... نقسمو و نكمل فيه... من نزيدش نشري كراس جديد... كي يفضلي من هذا ... التبذير علاه هه

صراحة هاذ العام ما علباليش اذا راح تنفعـــني هاذ الطريقة ولى لالا هههه  خاطر نكتبو بزاف... المهم انا والفتها ههه ... خاطر العوام لي فاتو ساعدتني قد ما يكون ال cours  طويل قد ما ما يبانش و ما يديليش ورق بزاف ف الكتبة... خاطر لوكان ما درتش هكذا كنت بالاك يخلاصلي بلخف ههه... ونحصل وين نكمل

وضرك توالفت نخدم هكذا وليت ما نحملش لوكان نكتب في ورقة نورمال ههه ...

على هاذيك دائما نشري les cahier  لي فيهم مربعات باش يجوني ساهلين.

في الجامعة لازم كل وحدة فيكم تلقى جو ولا طريقة تعتمد عليها... تتوالفها و تخدم بيها... تكون تساعدها هي باش منبعد في المراجعة و الخ... علبالها كل حاجة وينها الخ... " اخدم يا صغري لكبري " هه

زدت شريت هاذ ال cahier  الصغير... غير شفتو عرفت لواش راح نديرو... خاطر انا كي يحكمني ال vide  ولا نكره من المحاضرة ولا TD  ... نبدى نخربش في كراسي ههه نرسم ولا... منبعد لازم نقطع واش خربشت... هاذ المرة جبت هذا Spécial  باش نخربش فيه ... ولا نكتب فيه ملاحظات ولا اذا كان صاكي ثقيل ولا ما حبيتش ندي كراريسي الكبار نرفدو معايا... المهم هذا راح يكون ديما معايا... للخربشة و الملاحظات لي لازم نتفكرهم.

السعر : 300 دج

شريت بطببيعة الحال المقلمـــة هههه خاطر انا ندي مقلمة مكنش كفاش نسمح ف المقلمة... هبلتوني بها هاذ المقلمـــة... شريتها من واحد الحانوت في تيبازة في شهر أوت هه لقيتها بالصدفة... 

السعر تاعها 100 دج

( بصـــح كاينة في Aliexpress  ... الي حابة تشري ولا موالفة تشري من المواقع... ادخلي هنا تلقايها... و ادخلي هنا تلقاي article  كتبتو على كفاش تشري من المواقع بدون بطاقة " carte de crédit  " من هنــــأ )

وشريت les markeur  ولا les highlight    ... ما نقدرش نستغنى عليهم... خاطر انا ما نشريش سيالات تاع الألوان نستعمل هاذو برك... يعني نكتب غير بالاسود ولا... من بعد نلون... كيما راكم شوفو في الصورة... العنواين الرئيسية بلون و الخ... و دائما يكون نفس اللون لنفس الحاجة... باش كي نسحق نراجع ولا كي نحل كراسي عقلي تعود عليهم بهاذ الشكل... الوغ غير نشوف مثلا الللون البرتقالي علبالي واش يعنـــي... و كي نروح نراجع اجيني ساهلة... قتلكم قبيلة " اخدم يا صغري لكبري "

بالإضافة انو هاذو يساعدوا بزاف الذاكرة باش تتفكري بسهولة.

السعر 240دج

وباينة شريت سيالات les post it  كيف كيف شريت هاذ les marques pages  و الخ...

ال post-it  السعــر تاعهم 100 دج ... و les marque pages  كيف كيف...

وباش نكملو هاذ ال Haul  شريت deux agendas  وحدة كبيرة لل Bullet journal  ... و الأخرى صغيرة عليها مازال ما علباليش واش راح ندير فيها...

الي ما شافتش الموضوع على ال Bujo  تكليــــكي في التصويرة تروح مباشرة.

تنبــــــــيه 

حبيت نبهـــكم... بلي الاسعار لي حطيتهم... كي حطيت في الانستغرام بزاف بنات جاو قالولي بلي في techno  لقاو دوزان كيما انا شريتهم بصح السعر تاعهم طالع بزاف... انا نقلكم اخطيكم منهم خاطر زايدين بزاف ف ال prix  ... و  بزاف بنات بعثولي حتى les facutres  بلي بزاف شاعلين النار... حتى في ال groupe  تاع ال Bullet journal Algérie هدرنا على هاذ الموضوع و بالصور ... مثلا stabilo برى يدير و انا موالفة نشريه 60دج... عندهم من 120دج- 180 دج ... يعني بالدوبل و فايت علاه ؟ ما نعرف ... ما تقوليلي ماركة و ما نعرف خاطر نفســـهم برى تلقاوهم ارخس... الوغ غير بعدو عليهم دراهمكم ما ينوضوش في الشجر و ثاني نصنا رانا des étudiante الوغ ال budget  تاعنا صغير باش نرموه في حاجات زايدين فيهم .... كان هاذا مجرد تنبيه صغير. 

وصلنـــا لنهاية الموضوع ان شاء الله كون فادكم و مديتلكم شوية أفكار تساعدكم... ما تنسوش أبوني ف الانستغرام خاطر لي قلتهم الفوق كامل شاركته ف لي سطوري مع البنــــآت الوغ ارواحو كامل فما... راني كل ما نلقى حاجة مفيدة نحطهالكم...

نحـــــــــــــــــــــــــــبكم

.