♥ SCHOOL CONSEILS N°4 ♥ : Rentré Conseil pour Bien Commencé

سلام البنات انشاء الله تكونوا كامل بخير ... الوغ اليوم راني جيت و الحمد الله قررت نكتبلكم موضوع Back To School  ... هاذ المرة الموضوع راه نهدر En général  على كامل لي دخلوا هاذ المرة ... لي جابوا ال BEM  و لي جابوا ال Bac  ... لي جابوا السيزيام ههه نقولكم حاجة ضرك اقراو و اخطيكم من الحب و  ال Talon  و الماكياج مازلتوا صغـــآر ... ههه انشاء الله تفهموا راكم صغيورين و حلوين ابقاو هكذا .

 المهم ... راني رايحة نقولكم مجموعة من النصائح ... يعني بزاف نصائح ليكم انشاء الله يعجبوكم و تستفادو منهم كيمى كل مرة ... ماراني شرايحة نصنف يعني تاع كل طور وحدوا راني رايحة نهدر  par catégorie  على اللبسة و Les affaires  و هكذا .

الوغ الحاجة الأولى هي les Vêtements  :

يعنــــي Votre Style Vestimentaire  ... مهمى كنتي بالحجاب ولى بلى بيـــه ... البسي لبسة تساعدك و تخليك مرتاحة يعني dans ta peau  ما تحسيش روحك ثقيلة ... و بالطبع تكوني شابــــة ههه ( كامل هذا واش نحبوا ) .

البسي حاجة تكوني انت مرتاحة فيها ... ترتاحي في السروال البسي سروال ... ترتاحي في Jupe  لبسي ال Jupe  ... فاش انتي مرتاحة البسي الحاجة لي ترتاحي فيها ... و خاصة النقطة المهمة البسي على حساب La taille  تاعك ماشي انت 36 تلبسي 34 ولى 38 ... ما تزيري روحك ما تعرضي حتى تحسي روحك مخلوق فضائي ... ( قلت هاذ النقطو خاطر كاين لي يديروها خاصة المزير ) ... راني نهدر من جيهة الراحة في الملابس ماشي حاجة واحد أخرى باش ما تفهمونيش غالط .

الوغ Les chaussures  هي اهم حاجة ... خاطر الملابس ماكانش واش نهدر فيهم حاجة كبيرة ... بصح Les chaussures  هي اهم حاجة يعني اذا عرفتي تختاري تكوني مرتاحة و العكس راكي رايحة تتقلقي  .

انا من راي تاعي Les chaussures  مع ال Talon  يعني صبابط Talon  ماشي تاع قراية مهمى كان الشكل تاعهم ... كومبونصي ولى أي حاجة ... للأسباب التالية :

-         أولا ال Talon  في جميع الحالات Généralement  يضر في الرجلين كي تمشي بيه ساعة ساعتين ... حتى لي موالفين ... الوغ ايماجيني تقراو 8 ساعات في اليوم بلى ما نحسبوا الراحة ... و تريحوا 8 ساعات بيه ... أصلا كي تنحوه تنحوه يا ربي 30 دقيقة جهد ما تفطروا و تعاودوا تدخلوا تقراو ... و الجامعة ما نهدروش اقل ولى اكثر المهم ... اكثر من ساعتين و انتي رجليك في ال Talon  ... بطبيعة الحال رجليك يبادو يصطروا و يضرك ال Talon  ... قوليلي كيفاش راكي رايحة تواصلي النهار ولى راكي رايحة تركزي مع دروسك و مع الأستاذ و انتي رجليك يتعذبوا ... هاذي اول حاجة رجليك اضريهم .

-         ثانيا ... كي تمشي و خاصة صباح ربي انا نكره نكون مصروعة و نسمع تقرقيب تاع ال Talon  مع صباح ربي ... ازعاج لزملاء التاعك ( علبالي بلي ماكان ما راحلك فيهم ) ... بصح يبقى يبقى ازعاج .

-         ثالثا مع مرور الوقت رجلك تتعوج ... خاطر في ال Talon  رجليك يكون ماشي على شكلهم الطبيعي كيما Normalment  نوقفوا عليهم ... يعني كيما راكم شوفوا في الصورة ... الوغ راكم تمرضوا في رجليكم بلى ما تفيقوا .

كامل نحبـــوا نكونوا شابين بصح ماشي على حساب الراحة تاعنــآ ... يعني انا ننصح البنات ما يلبسوش ال Talon  برك خاطر راكم رايحين تقراو ماشي عرض أزياء ... و أيضا باش انتم تكونوا مراتحين من كل النواحي و كل حاجة تكون في راصك هي التركيز ... خير من تخممي و تتالمي من الصطر في رجليك ... و à force à force  راكم اضروا رجليكم مع الوقت بلة ما تردوا البال لهاذ الشيء .

الوغ انا ننصحكم بحاجة Plat  و تساعدك Converse balerine babouche basket  أي حاجة ... و Les Balerine  كي تروحوا تشروهوم عوجوهم باش شوفوا اذا Souple  و طرية ولى لا لا ... و اشروا Souple  هكذا ما يضركمش .

ثاني حاجة : Les Affaires Scolaire  :

يعنـــــي  Pour ce Motivé  و باش نطلعوا المورال حنى البنات ماكانش حاجة خـــــــير من الأدوات الجميـــــلة ههه كي راني نهدر راني نحس روحي Motivé  ههه ... كي تشروا خيروا غير الألوان الزاهية و لي تحبـــوها ... اشروا Les Stylos  بجميع الألوان et les Markeur  و هكذا حاجات ... باش اطلعوا المورال لروحكم .

ثالث حاجة كيفاش تكتبوا في كراسكم :

الوغ هذا شيء مهم ... اكتبوا بنظـــآم باش مرة أخرى تروحوا تراجعوا اجيكم ساهلة و كي تحلوا كراسكم اجيكم ساهلة و تحسوا بالراحة و يطلعلكم المورال كي شوفو كراسكم منظـــم ... الوغ راني رايحة نككتبلكم مجموعة من النقاط لي انا نديرها الى يومنا هذا :

-         شفتوا كي يكون الأستاذ يملي و لى تكونو نقلوا اطيحو في جمل ما بين قوسين و لى مزدوجتين ... انا هاذي نحب نكتبها بلون آخر خطر بطبيعة الحال جملة مهمة .

-         كي يكون الأستاذ يملي و لى نكتبو و تكون جملة فيها تـــعريف ... و لى شرح لكاش حاجة ... انا نفضل نكتبها بلون آخر ولى نماركيها بال Markeur  ... خاطر حاجة مهمة ... هكذا باش كي نكون نراجع ما نبقاش نحوس على هاذ الحاجة .

-         نفضل نكتب العناوين الكبيرة تاع كل فقرة من الدرس في الهامش ... راكم تعرفوهم من بعد يجيك عناوين تحتوا و تبداو تكتبوا ... انا نحب نكتبوا على الهامش ... من بعد العنوان لي تابع ليه من تحتوا نقربوا شوية عليه باش نفرق بيناتهم .

-         نحب نعتمد لون واحد في كامل الكراس .. مثلا العناوين الرئيسية مثلا احداث اول نوفمبر ( مثال فقط ) نكتبوا بالاحمر ... من تحتوا يجي العنوان الثانوي مثلا الاسباب نكتبوا بلون وردي ... و هي رايحة ... في كامل الدروس هكذا و بنفس اللون باش كي نروح نراجع كيف كيف نعرف كل لون لواش معناه ... حتى اذا درتهم بال Markeur  نخليهم من نفس اللون في كامل الدروس باش نعرف العنوان الكبير و العنوان الآخر .. باش ما تتخلطليش

-         النقاط ... مثلا الأسباب ما تكتبوهمش في فقرة تكتبوهم على شكل نقاط ... نحب ندير Tiret  ( مطة ) ولى النقطة بلون آخر ... و لى نكتب كل حاجة نكتبوها بهاذ الشكل بلون آخر ... كيف كيف باش تسهل عليا منبــعد المراجعة .

-         الملاحظة نحب نكتبها بلون واحد مثلا نحب نكتبها بالاحمـــر كامل ... الملاحظة دائما تكون مهمة شيء خطيـــر يا محاينك ههه

-         بالنسبة للتمارين ... نحب نكتب رقم التمرين و الصفحة للتسهيل ... و نحب نكتب الشرح المفصل للحل تاع التمرين خاصة في مادة الرياضيات ... نكتب و الأستاذ يكتب ما نسناش حتى يكمل هكذا باش مانراطيش كل حاجة يشرحها من الحل ... خاصة في الرياضيات كيما علبالكم ما تقدريش تشفاي على كلش .

هذوا هوما Normalement  الحاجات لي معتادة نديرهم يعني والفت بح انتوما تقدروا تستعملوهم ولى لا لا ماشي لازم ... بصح نظمي كراسك على ما يناسبك باش تسهلي عليك الامر مرة أخرى في المراجعة .

راني حكيتلكم كل حاجة نحب نديرها و ما نديرهاش في La Rentré  ... و هذو هوم الحاجات المهميــــن بالنسبة يليكم ... الوغ نلخصلكم في بعض النقاط :

-         البسي حاجة مريحة تحسي روحك فيها مرتاحة ... من حيث الملابس و الاحذة هكذا باش ما تشغليش روحك بزاف في حاجات اخرين ... يعني حتى شعرك امشطيه بطريقة ما تقلقكش بالنسبة لي ما يديروش حجاب .

-         اشري أدوات مدرسية بسيطة تكون فيها الألوان و كثري من الحاجات لي يكونوا Mignon  باش طلعوا المورال لروحكم ... و مقلمة شابة .

-         كي تكتبوا دروسكم اتعودوا و والفوا تكتبوا بشكر منتظم ... باش تسهلوا على روحكم المراجعة في وقت آخر و تربحوا بزاف وقت في المراجعة .

بالنسبة لموضوع اليوم هذا واش فيـــه ... نصائح بسيطة و انشاء الله مازال السلسلة Back to School  يكونوا كاين حاجات اخرين و نزيد نخدملكم Les Calendrier et les Agendas et les TO DO LISTES  اذا عجبوكم ولي مازال ما شافهمش ت Cliqué  على هاذ القلوب ♥♥♥♥ ...

و انشاء الله ندير Articles  خاص باالبنات لي جابوا الباك ... و البنات لي رايحين يجيبوا الباك ...

ولي حابين يشوفو الموضوع الأول تاع العام لي فــــآت Cliqué  على هاذ القلوب ♥♥♥♥ .

الموضوع تاع اليوم خلاص ... انشاء الله يكون عجبكم  و استفدتوا منــــوا شوية ... نحبكم بزاف و ما تنسوش تابعوني على Instagram / twitter et snapchat  على mlle_yasmina  ... و اديروا J’aime ou Je N’aime Plus  على L’article   و تقولولي في الكومنتـــآر الحاجت لي موالفين اديروهم ... نحـــــــــــبكم