♥ Q&A N°1 ♥ : Mlle Mahboula Répond A vos Questions ♥

سـلام البنــــــــــآت راكم بخير انشاء الله ... توحشتكم انشاء الله راح يكون كاين موضوع كل سبت كيما كنا نخططوا في الاول ربي يقدرني انشاء الله و نعاونكم قد ما ننجم ... انشاء الله ♥

الوغ موضوع اليوم طولت عليكم فيه ... هو الاجابة على كامل الاسئلة تاعكم ♥ حتى لي جاوبت عليهم راح نعاود نجاوب هكذا يستفاد منهم الجميع ... انشاء الله يعجبكم الموضوع و يفيدكم ...

الــــــــــــــــــــــوغ نبداو ... ♥

للتذكير فقط : الحلول المقدمة هي عن تجربة شخصية ما نجيبش من راسي برك ♥

 

كيفاه حتى درت Blog  الحقيقة من بكري و انا حابة ندير حـــــــــآجة للبنات ... نحب نعاونهم نحل معاهم مشاكلهم نقص عليهم نضحكهم ... كلش ... على هاذي حليت لا باج الاولى لي هي Fille Algérienne   منبعد بلوكاهالي مارك الله يجيبهالــــوا ... و خسرت بزاف بنات منها ... منبعد زكارة فيه زدت حليت لا باج مدموزال مهبولة الفتاة الجزائرية ... لي راه فيها 5 الاف بنت جزائرية ... منبعد قررت و قلت علاه ما نديرش كيما Les Youtubeuse   و نفيد البنات بصح ب Blog  بالدارجة مخصص للبنات الجزائريات نبدلوا شوية ما نهدروش فرونسي ... هكذا كامل البنات يفهموني و نفهمهم و نقدر نتواصل معاهم ... و الحقيقة كانوا بزاف بنات يتابعوني و شجعوني ب لي ميساج تاعهم ... الوغ قررت نكمل و هاذي هي ... الحمد الله لي لقيت بنات نساوني ف الهم و نسيتهم في الهم ... الحمد الله 

نقرى اولى جـــآمعي 

بالنسبة للحب شباب كاين بزاف بنات سقساوني الوغ نجاوب مرة وحدة  ... الوغ موضوع حساس ما عندوش حل نهائي ... الوغ نصيحة الاولى هي كانوا يقولهانا موالينا ... ما تخربيش في حب الشباب خاطر يخليلك البقع و الحفاري في وجهك ... النصيحة الثانية زيارة طبيب البشرة اذا عندك مشكل كبير في حب الشباب ... النصيحة الثالثة انا استخدمتها الغسل بصابون DERMOVIVA  هايل و الله ... اشروا لي مكتوب فيه ضد الحب ... اغسلي بيه كل صباح ... و بالمطول يعني a force a force   يتنحالك الحب و البقع و البشرة تاعك تولي فاتحة .. نتيجة هايلة ... و جربتها انا راحلي كامل الحب جربتوا و خرج عليا ... النصيحة الرابعة هي ما ترقديش بالماكياج ... و اغسلي وجهك دائما لتجنب حب الشباب و الرؤوس السوداء ♥ ... لي حابة تقرى موضوع على البشرة تدخل هنا و هنا راني هدرت عليهم ... انشاء الله يفيدكم

 القردون بزاف ما يعرفوهش راح نهدر عليه في كاش موضوع ... يطول الشعر ... يعدلوا يعني يولي هابط ... يعني العناية الطبيعية بالشعر ... ديريه قبل ما ترقدي كل ليلة ... شعر ناشف لازم ماشي مشمخ ... تلقايه عند لي يبيعوا القماش و هكذا يتباع ... هاذي هي الصورة تاعوا ... لي عندهم اسم محدد في يولايتكم يفيدونا بيه ... ♥ لي حابة طول شعرها تستعملوا كل ليلة قبل الرقاد ... افضل نتيجة بالصبر ♥ 

الاسنان اول شيئ لازم تغسليهم كل يوم 3 مرات في اليوم  كامل علبانا هاذي ... اذا كانو صوفر يعاودوا يردوا البياض تاعهم ... و كاين معدون الاسنان المليح ... سانسوداين مليح و الا عندك اسنان حساسة نتيجة سريعة جدا ... جربتوا هايل ... المسواك ثاني يبيض كاين CREST   هاذوا كامل جربتهم ملاح ... لازم تغسليهم دايما ...

كاين القارص , البيكاربونات , الماء و الملح ... شوية من واحد منهم ماشي تخلطيهم ... ديري في القطن و حكي اسنانك ... يعطيك نتيجة مليحة ...

بالنسبة للوزن و الاكل الصحي ... لازم تبعدي على كل ما هو صناعي كيما العصير و المشروبات الغازية ... كل ما هو تاع برى ثاني ... يعني Les fast Food  ... لازم تزغدي يعني الرياضة ولا ههه الرياضة تاع الدار لي هو الشغل ... لازم ما تبركيش و ما تتفنين اخطيك منوا خاطر راح يمرضك ... الارز يسمن المقارون هاذوا كامل ... الخضرة كلي منها ... و راني قتلك النشاط و الحيوية راح يردلك الشهية تاعك باذن الله هو افضل دواء ... اذا شفتي روحك ما زاد فيك والوا زوري طبيب افضل حل لكلش يعطيك الدواء ... انا ثاني كنت نقول انا ما نسمانش ما نسمانش حتى لقيت روحي مريضة ... و بالدواء الحمد الله بريت و اكتسبت الوزن ... ♥

 

البــــــــآك والوا ... و مور ما جوزا الباك راح تتاكدوا من هاذ الشيء ... هاذا هو الوقت الي لازم تبداي تحوسي على الدروس لي ماراكيش فهمتهم تفهميهم ضرك ... الحل الشباب كامل هو تتلقاو كامل لي راكوا فاهمين في مجموعة و تراجعوا كيف كيف ... باش كل واحد راه فاهم و الاخر ما رهش فاهم يفهموه ... هكذا كل واحد يكمل الاخر ... الحل الفضل للحفاضة خليها شهرين قبل الباك ... و استعملي الملخصات ... تلقايهم في هاذ الموقع الدراسة ... و ديري بورقرام ... قولي سمانة لازم نكمل تاريخ و جغرافيا مثلا ... تكمليه ... باش يمات الباك تعاودي غير تراجعيهم فقط ...

الباك حاجة والوا ماشي كبيرة ... لازم فقط ما تخافيش منوا ... خليه هو يخاق منك هههه ... بالتوفيق للجميع

كيفاش تبغي روحــــك ... اقنعي بواش عطاك ربي و قولي بلي كاين ناس ما عندهمش الربع واش عندي ... ما شوفيش لي فوقك شوفي لي تحتك و قولي الحمد الله ... ثاني حاجة كل وحد فينا شابة ... كل وحدة الشارم تاعها ... حبي روحك لازم ... تكون عندك ثقة في نفسك و ما تخلي حتى وحدة طيحلك بقيمتك ... و ما طيحي روحك بحتى واحد ... سامحي و حبي و عيشي ...

قولي في نفسك لازم ننسى لازم ننسى لازم ننسى ... تنساي ... كلشي بيدك اختي ... لازم تكون عندك ارادة ... شغلي روحك قد ما تنجمي ... كل ضربة جيك اتعلمي منها ... كل حاجة تصرى على جال حاجة ... اتعلمي و عيشي كيما قتلك ... و انشاء الله تنساي انا و البنات ندعولك ... ♥

 

بالنسبة للقراية راني جاوبت الفوق هههه البروقرام انتي ديؤيه واحدك على حساب واش يساعدك الحال و على حساب وقت الفراغ تاعك ... لازم الارادة كل حاجة اجي بالارادة والله لا زهر لا ميمون الارادة هي كلش لي يحب يقرى يقرى يالوكان ساعة في اليوم ... انا كنت باش نضمن انول نشد كراس و نقرى ندخل للدار نشرب قهوة نبدل حوايجي ما نتكسلش باش نضمن انوا ما نعجزش و نشد كراس و نقري و ربي يوفقكم انشاء الله ... بالنسبة للرؤوس السوداء انا نستعمل روتين يقلل الرؤوس السوداء ما يقضيش عليهم نهائيا ... بصح يقلل منهم ... تريحي منهم شوية ... ادخلي هنا موضوععلى الروتين لي نتبعوا 

La Gamme Dove  لي فيها Shampoing après shampoing et un Masque

مليحة و الله يساعد بزاف الشعر باش يرد الحيوية تاعوا و يولي شباب و تنحى التقصف بالنسبة لي سقساتني الثانية والله الحل الافضل هو دوف انا ساعدني تخلصت من هاذ المشاكل كاملين   ... راني هدرت عليه في موضوع هاذا ... و باش طولي شعرك راني قتلك انا نستعمل القردون ماكنش حاجة افضل منوا للتطوال الطبيعي 

علاه مادرتش شان يوتوب ... فقط هه خاطر ما نضنش انوا الفايدة من واش راني ندير الشهرة و نبين وجهي ... و نولي نمشي بلاك نتلقى بوحدة تقول ايــــــــــــه مدموزال مهبولة الي دير لي فيديوا ... و ككذا و كذا الوغ نريح نفيدكم بلا م يعرفني حتى واحد ههه خير ... الحمد الله راني قانعة بالكتبة ولا واش رايكم ؟ بلاك منى للفوق نخمم ندير شان يوتوب شكون عرف ههه

اشري صبغة تاع الحوايج مليحــــة اصبغيه وحدك ... Si non  اديه لعند Dégraissage   يصبغلك السروال و يردلوا الالوان تاعوا هاذي هي افضل نتيجة  

  

كريم لتقشير الوجه هي الي نستعملها VENUS  و كنت نستعمل EL ghaliya ثاني مليحة بزاف ... لي مارك لي نستعملهم بزاف كامل علبالهم هي ORiflame يستعملو كلش طبيعي اذا ما نفعوش ما يضروس هايلين كام المنتوجات تاعهم لي جربهم قال ملاح

  

هاذ المشكل شايع بزاف ههه ... اشري سيروم serum Andrea Dotti   على حساب نوع الشعر تاعك ... ديري القليل منوا على شعرك مشمخ يعني قبل السيشوار ... منبعد ديريه مور ما تكملي السشوار و عاودي جوزي على شعرك بالسيشوار غير م الفوق باش ينشف ... ناكدلك بلي راح يشدلك كثر من المدة لي مضاري يشدلك فيها السيشوار ... انا استعملتوا هاذا ... السيشوار يشدلي سمانة ...

بالنسبة للتساقط الشعر كاين شامبوا ... يحرش الشعر شوية بصح يفيدك شعرك يولي عامر ...  هاذ shampoing اسموا touch me please مستخلص من ذيل الحصان horsetail extract 
هاذ produit كتر من رائع جرباتوا اختي شخصيا نتائج هايلة ... تغسلي بيه زوج خطرات ثلاثة يبدى يبان l'effets تاعوا ... شعرك الفارغ يبدى يتعمر ... هايل و ماشي غالي بزاف ... يعني تقدروا تشروه ... زيد على هاذا القرعة تاعوا كبيرة ... المهم لي تشريه ما تندمش ... مجرب شخصيا 

السؤال الاول جاوبت عليه هو الاول ... ههه اما الثاني الام الحادة ... انا ننصحك بالتيزانة تاع النعناع هي الفضل ... باش تسخني كرشك اشربيها شوية سخونة ... خاطر الكرش كي تكون باردة من الداخل كي تشربي الدواء ما يفيدكش بزاف ... من بعد اشربي مسكن الالم ... بصح لازم تشربي حاجة سخونة افضل شيء هي التيزانة تاع النعناع ... لازم تتجنبي القعاد في الارض و المشية بالحفى ... و شرب المشروبات الغازيه ههه هاذي قبل منبعد افضل حل هو انوا دفي كرشك و شربي مسكن و ارقدي تنوضي تسوطي

 انا و الله ما نعرف حل مليــــــــح بصح شوفي هاذ الفيديوا بالاك يفيدوك شوية ... قالك فيه الاكياس تاع الشاي ديريهم على عينيــــك ... ديري الماء و الملح الدافي في قطن و جوزي علة الهالات السوداء ... انشاء الله يفيدوك ... الفيديوا هنا ... 

ههه اسمي مدموزال مهبـــولة ...♥  

انا من ولاية تيبازة ♥ 

الموضوع تاع اليوم خلاص مع الاسف لكن راح يكون موضوع ثاني على الاجابة عن الاسئلة تاعكم ... الوغ انشاء الله يكون عجبكم و خاصة يكون فادكم الموضوع ... الوغ انتضروني في موضوع جديد ... لي حابة تطرح سؤال تطرحوا هنا ... ما تنساوش جام لا باج تاعنا ... و ما تنساوش ابوني في الانستغرام ... بالتوفيق للجميع و نتلقاو في موضوع جديد الاسبوع المقبل بـــــــــآي ♥

-------------------------------------------------------------------------------------
المزيد من المعلومـــــآت :

.